الموضوع: طلب مساعدة بخصوص نقل الملكية

بص انا علشان لسة مخلص نقل الملكية من اسبوع وعارف الحوار بيمشى ازاى
اولا اعمل حسابك من 500 جنيه ل 1000 جنيه مصاريف نقل ملكية وترخيص
ثانيا حضرتتك هاتخد العربية وتنزل على مرور بلدك اللى انت فيها ( بلبيس الشرقية ) وتدخل شباك نقل الملكية والموظفة هناك هاتقولك اعمل فحص عن المهندس وحضرتك تروح شباك تانى تشترى نماذج الفحص بعد سنين الترخيص فى حالتى انا اشتريت 3 علشان رخصت 3 سنين

ثالثا هاتدخل على مهندس الفحص ويرفعلك رقم الماتور والشاسيه ويكتبوا على الورقة ويطلب منك مطابقة بصمة من مرور السلام

رابعا حضرتك هاتروح مرور السلام ومعاك رخصة العربية و بطاقتك الشخصية ودايما اعمل حسابك قبل ما تخش اى مرور فى دول يبقى معاك ملف ورق ب 1جنيه وعدد من صور البطاقة و الرخصة و عقد البيع المسجل

خامسا بعد ما تدخل مرور السلام تعمل مطابقة بصمة والكلام ده على الورق يعنى الموظف بيفتح ملف العربية اللى عنده ويتاكد من الرقم اللى كتبه مهندس مرور بلبيس ويختملك عليه

سادسا وده الاهم علشان ما تدبس فى مشواير لازم يبقى مع حضرتك شهادة بيانات العربية وشهادة بيانات تانية بس دى بيبقى مكتوب عليها محولة لمرور بلبيس ودى تطلعها من مرور السلام
وكمان يبقى معاك شهادة مخالفات العربية وما يكنش مر عليها اكتر من 15 يوم
ودول اهم ورقتين علشان امورك تمشى فى مرور بلبيس

سابعا بعد ما تخلص ده كله تطلع على مرور بلبيس وتدخل تانى على المهندس وتسلمه الشهادتين و الرخصة وهايعملك الفحص وده شكليات فقط لا غير بس فى حالتى خلانى شيلت فاميه العربية من الزجاج الخلفى

ثامنا بعد ما المهندس يخلص هاتروح تعمل حاجة اسمها التامين الاجبارى ودول هاتلاقيهم اكشاك جوه المرور وكلها واحد مفيش فرق بينهم وتدفع تامين اجبارى بعدد سنين الترخيص وتخلص من هناك وتطلع على كشك الطفايات وتكشف على طفاية العربية ولو صلاحيتها انتهت هاتضر تشترى واحدة وفيه حاجة كمان نسيت اقولها ابقى استلف المثلث العاكس و شنطة الاسعافات ممن اى حد تعرفه علشان محدش يرخم عليك هناك

تاسعا تخلص ده كله وتطلع على موظفة نقل الملكية تانى وتاخد وصل وتطلع على الخزنة تدفع وتعقد نص ساعة وتستلم رخصتك باسمك ومبروك عليك الرخصة مقدما

طولت عليك انا عارف بس مش عاوزك تلف كتير وتخسر ايام علشان الحوار ده انا خلصته فى يومين لوحدى
ولازم يبقى معاك حد من اصحابك او اخواتك علشان الطوابير وكده يعنى ويبقى معاك مبلغ زى ما قولتلك لحد 1000 جنيه ويبقى معاك فكة كتير علشان تصوير الورق وكده والباركينج خارج المرور

وفيه حاجة تانى ماكنتش حابب اقولها بس خلى فيه فى جيبك فكة من فئة ال 10 جنيه و ال20 جنيه علشان تمشى حالك جوه المرور :)

والف مبروك على العربية وربنا يديك خيرها ويكفيك شرها

شكرا جزيلا على تعبكم معايا وردودكم المفيدة
بس اللى لاحظته دلوقتى انى هابدأ من السلام مش من بلبيس عشان اجيب شهادة بيانات للعربية لو الرخصة منتهية (او شهادة مخالفات ) من السلام..صح كدة؟؟؟...يعنى لازم اروح السلام عشان اجيب حاجة من دول
وهل دا يتطلب مالك العربية الاصلى ولا الشهادات دى ممكن اطلعها انا بعقد البيع؟؟؟
اعذرونى على الاسئلة الكتيرة لان الحاجات دى كلها جديدة عليا