الموضوع: أفكار صناعية ......... صناعة الماسترباتش

الحقيقة أنا فرحان جدا ان الموضوع عجبكم و اشكركم جميعا على اهتمامكم

المشروع ده ينتمي الى فئة المشروعات الصغيرة و المتوسطة

و احنا كنا حسبنا التكاليف و متوسط الارباح قبل كده

خط الانتاج و المعدات المطلوبة :

1- كسارة بولي ايثيلين ( لو معاك راس مال كويس هاتها او استنى لما تكسب و هاتها )
دي فايدتها رفع جودة الخلط و تسريع الذوبان لأن البولي ايثيلين بيتكسر لقطع صغيرة جدا ..
و المصري منها بيكون من 30 الى 50 الف جنيه على حسب الانتاجية بتاعة التكسير .
المستورد منها غالي جدا و عندنا ورش بتصنع بجودة عالية جدا ..

2- خلاطة :
مهمتها خلط الكربونات والبولي ايثيلين خلط جيد جدا و بتكون مصنوعة من الاستانلس ستيل .. و منها مصري و منها مستورد و المصري ممتاز جدا و بتتكلف في حدود 40 الف لو سعتها نص طن و اقل لو السعه اقل ... لكن هيه بتكون جزء من الخط يعني نادرا ما هتحتاج تشتريها لوحدها ..

3- الاكسترودر ( Main unit ) :
و دي المكنة الرئيسية و منها صناعة مصرية ممتازة جدا عن تجربة شخصية ليا ... و منها الصيني و الالماني و الاسباني و افضل خطوط في العالم الايطالي و اعلى ماركة في الايطالي اسمها بانديرا ..
و اسعار المكن الجديد :
المصري ( 150 الى 200 الف ) و غالبا بتكون في حدود 2 طن يوم
الصيني ( 200 الف الى مليون جنيه ) حسب الانتاجية و بتبدأ من 600 كغم الى 15 طن يوم
الايطالي ( نصف مليون الى .... ) حسب الانتاجية


و نصيحة مني لو عايز تجيب خطوط جديدة هات المصري في البداية و بعد سنة هات ايطالي كبير و سيبك من الصيني لأن دي خطوط انتاج بتعتمد على حساسات حرارة و نسب خلط و الصيني كويس لكن الايطاليين اساتذة المجال ده .

المكن المستعمل :
المصري ( 40 الف الى 100 الف ) من 2 الى3 طن يومي
الايطالي ( 150 الى 400 الف ) الانتاجية من 2 الى 8 طن يومي
الالماني ( 450 الف ) دي اللي شفتها و كانت تحفة و انتاجيتها 14 طن يومي

الايطالي المستعمل افضل الاختيارات لكن لو معاك تمن الالماني هاتها عشان انتاجيتها العالية .

يعني كدة اجمالي تكاليف البدء كام ؟ بخامات انتاج مثلا لمدة شهر على كمية متوسطة بمرتبات العمال و بالايجارات بكل حاجة على اجهزة مستعملة المانية او ايطالية مثلا ، هتبقي بتتكلم فى حدود كام ؟!!
اظن الموضوع هيدخل فى 800 الف اقل حاجة ...

جزاك الله خيرا و ربنا يوفقك و تعرف تنفذ المشروع