اقتباس المشاركة الأصلية كتبت بواسطة zarkoor مشاهدة المشاركة
اولا ارجو من حضرتك ان تقبل احترامى لشخصك الكريم

حضرتك دايما لما بنتكلم على اداء اى عربيه بنتكلم عن اداء الموتور و الفتيس مع بعض . حضرتك لازم تعرف ان الموتور بيولد عزم دوران و هو ده المهم علشان العربيه تزيد سرعتها ... كل ما كان اقصى عزم عند لفات موتور اقل كل ما كان التسارع احسن

اما الهورس بور فا ده معناه قد ايه اقدر اخد سرعة على نفس غيار الفتيس ... بمعنى اخر لو تخيلنا موتورين لهم نفس العزم بس واحد منهم له هورس بور اعلى فا ده معناه ان العربيه الاقل حتحتاج تدى نقلة فتيس بدرى لانها وصلت للحد الاقصى للفات

حضرتك بص على الرسم ده بيوضح العزم و الهورس بور.



ده موتور ميتسوبيشى بيولد اقصى عزم عند 2000 لفه و منحنى العزم تقريبا بيفضل ثابت بين 300 و 275 نيوتن متر. و تقدر توصل لالعلى rpm اللى على 6000 rpm

علشان كده حضرتك فى المواتير الصغيره 1300 و 1600 دايما اقصى عزم بتلاقيه عند rpm اعلى علشان كده تلاقى نسب سرعات الفتيس قريبه علشان هو عاوز دايما ياخد عزم الموتور اللى مش بيطلع الا على مثلا 3000 rpm

وطبعا ده معناه ان الموتور ده دايما شغال عند rpm اعلى و هنا تدخل بقى نوعية السبائك اللى متصنع منها الموتور و هل هى عمرها طويل ام قصير.

اما بالنسبه لزوايا الكامات فمعروف ان الكامه الرياضيه زواياها و توقيتلت فتح الصبابات انك تاخد عزم الموتور فى الحته المناسبه لوزن العربيه (التسارع مرتبط بالعزم ووزن العربيه و نسب الفتيس)

وهو ده سبب اختراع ال VVT (variable valve timing ويتم تغيير زوايا الكامات بروفع هيدروليك يتحكم فيها كمبيوتر العربيه علشان يحقق المعادلة الصعبه بين كامه موفره للبنزين و كامه لها اداء رياضى

طبعا مهم جدا حاجه اسمها gear slip factor وده بيظهر فى الفتيس ال CVT و الاوتوماتيك بالنسبه للانواع الرخيصة اللى بتركب فى العربيات الشعبيه . و هو ده السبب انك تلاقى ناس بتشتكى ان السحب وحش علشان ال CVT اللى على سير زى اللى راكب فى اللانسر ال slip فيه عالى فا ما تقدرش تاخد عزم حلو. لكن ال CVT اللى بينزل فى المرسيدس CLK دا بيبقى هيدروليك و ال slip فيه شبه معدوم.
كذلك ال CVT بتاع النيسان المورانو بيكون نوع Torroidal من غير سير و عزمه برضه حلو

اخيرا و بغض النظر عن كل الكلام ده اهم حاجه انك تكون حابب عربيتك و مبسوط بيها ومش مهم هى رياضيه وللا نص رياضيه و ربنا يبارك لكل الاعضاء فى عربياتهم و يفتكرو ان السرعه حلوه بس اللى احلى ان كلنا نروح لاحبابنا بالسلامه و كمان الناس اللى ماشيا معانا فى الشارع

تقبل تحياتى
شكرا على اهتمام حضرتك بالرد و عاوز اقول لحضرتك انى عارف منحنى الهورس باور والعزم كويس بس ما ردتش احطه و اتكلم بشكل علمى قوى عشان بحاول ابسط الموضوع للناس وعلى فكره المنحنى اللى حضرتك حاطه تقريبا العزم شبه ثابت فيه لأنه أكيد فيه خاصيه تغيير توقيت فتح و قفل الصمامات اللى اتعملت مخصوص لهذا الهدف.

تانى حاجه عاوز اقولها انه مما لاشك فيه ان الفتيس و الموتور توليفه مع بعضها ولا يجب ان نهمله و كلام حضرتك مضبوط جدا فى النقطه ده بس بردو حضرتك ما فهمتنيش كويس انا أقصد ايه فى موضوعى؟

ما ينفعش أقارن موتور 2000 سى سى و 1300 سى سى مثلا؟!!

عشان وجهه نظرى توضح يبقى لازم نثبت عده عوامل (يعنى عربيتين زى بعض و فتيسهم زى بعض بالضبط و موتورهم الاتنين نفس السىسى حتى لو الاتنين 3000 سىسى و نفس قيمه العزم و الهورس باور فى الاتنين واحد و الختلاف الوحيد بينهم هيكون ان واحد منهم بيجيب أقصى عزم ليه عند RPM منخفض والتانى عند RPM عالى ولو العربيتين دول شدوا مع بعض تعرف ايه اللى هيحصل؟؟؟؟ الأول هيسبق التانى فى البدايه و هيجمع سرعته بسرعه و بعد مرحله معينه من تجميع السرعه التانى هيجمع اكتر و هيحصله و هيقدر يجيب Top speed أعلى و الاول هيكون خسع بالنسبه للتانى على السرعه العاليه وطبعا مش محتاج أقولك ان تكنولوجيا تغيير توقيت فتح و قفل الصمام مش داخله معانا فى المقارنه لأن ده ليها كلام تانى خالص واحنا زى ما قولت بنثبت كل العوامل عشان تقدر تحس باللى انا أقصده.


فيه تعقيب كمان أحب أقوله لحضرتك و هو ان الفتيس ال CVT لا يحدث فيه Sliping خالص يسبب فقدان عدد معين من اللفات المفروض كانت تروح للعجل والا يبقه بايظ و لازم يتغير ولكن بيحصل Sliping بين البكر و السير للدخل و الخارج فقط لتغيير الأقطار و ده مالوش علاقه بانه يفقد لفات من المحرك المفروض كانت تلروح للعجل و لكن ال CVT طبعا فيه فقد للطاقه و لكن لأسباب تانيه مالهاش علاقه بالSliping خالص وهى باختصار ان معامل الاحتكاك عالى جدا بين السر و البكر (عشان ما يتزحلقش) وكمان السير بيبقه مشدود جدا(عشان ما يتزحلقش) و ده بيسبب تقل فى الحركه و ممكن أضربلك مثال قريب منك(لو جنزير البسكلته مشدود قوى هتلاقى البدال تقيل و كذلك لو غيرت سير الكاسيت بواحد مشدود هتلاقى صوت الشريط بطيىء وده كله بسبب ان الاحتكاك بيبقه عالى و ده اللى حاصل فى الCVT و ده ضرورى عشان السير يقدر ينقل الباور ده كلها من غير ما يتزحلق و طبعا كل ده فواقد فى القدره مش موجوده فى نظام التروس و لكن الCVT بيقدر يحقق نسبه الترس المثالى فى كل الظروف و ده بيغطى العيب اللى قولنا عليه و بتبقه المحصله النهائيه ليه انه أفضل من الأتوماتك العادى فى التسارع.