الموضوع: عايز افضي ماية الردياتير

المشاركة الأصلية كتبت بواسطة lidosasa

الخلاصة وخد كلامى ثقة لو عايز تحافظ على عربيتك وعن تجربة
خطورة مياه الحنفية إنها بتكون فبها أملاح طبيعية ذائبة فى الماء ولما المياه تسخن يبدأ تبخر المياه وتستقر الأملاح داخل الرايداتير وبعد فترة من تراكم الأملاح يبداء مواسير الرايداتير فى الإنسداد مما يؤثر على كفأة التبريد فى السيارة .
طيب المياه الزرقا فيها أيه مياه مقطرة ( يعنى سبق تبخيرها وتكثيفها ) فمش حيكون فيها أملاح لو أتبخرت تانى فى الرايداتر +مواد مانعة للصدأ + مواد كيمائية أخرى ومنها إيثلين جيليكون . والمياه دى بتكون درجة غليانها أعلى من المياه العادية مما يرفع من كفأة دورة التبريد
طيب تعمل أيه الأفضل تروح لفنى رايداتير
1- ينزل المياه القديمة كلها ويغسلك دورة التبريد كويس ويحط ليك مياه عادية خالص من الحنفية . وتشتغل بالعربية وتسيبها لتانى يوم عشان تشوف دورة التبريد محكمة ولا فيها تسريب ( عشان لو فيها تسريب تعالجه الأول بدل ما فلوس المياه الخضرا تروح على الأرض ) . يبقى لو فيه تسريب تعالجه مفيش تسريب تنتقل للمرحلة التانية
2- تروح ليه تانى يوم وتكون العربية واخد بيها مشوار تمام وتكون سخنة عشان كل البلاوى اللى فى دورة التبريد تخرج . ويجى منزل مياه الحنفية بتاعت إمبارح ويجى غاسل دورة التبريد مرة اخرى وتيجى حاطط المياه الخضرا أو الزرقا .
أنضف مياه هى مياه موبيل سواء الخضرا أو الزرقا الجركن 4 لتر ب 80 جنيه وتركيزها بيكون 35 % وسيبك من الكنزات والإبرو والكلام الفاضى ده بيبقى لون ومياه مقطرة وخلاص .
وبعدها لو المياه نقصت شوية بسيطة بسبب التبخر ( عادة مش حتنقص غير كل أسبوعين مثلاً بمقدار ضئيل جداً ) تزود مياه مقطرة تشتريها من أى محطة بنزين ب 2 جنيه أو 3 الإزازة حسب حجمها .
أوعى تزود مياه حنفية عشان الأملاح واوعى تزود مياه خضرا أو زرقا من اللى حتفضل فى الجركن لأنك حتزود نسبة المواد الكيماوية اللى فى المياه لآن اللى بيتبخر المياه المقطرة وبيفضل المواد الكيماوية ولو زودت مياه خضرا يبقى بتزود نسبة المواد الكيماوية مما يعرض الراداتير للتآكل .
وللعلم موضوع الغسيل وتغيير المياه ده بيتعمل مرة كل سنتين عشان تحافظ على دورة التبريد
أخيراً وللأمانة لو دورة التبريد مش سليمة عندك وفيها تراكم صدأ وأملاح معالج الصدأ اللى فى المياه الخضرا بيدوبها فتبدا تنزل فى مياه القربة وتبدأ تظهر عيوب دورة التبريد ( عشان ما ترجعش تقول إن السبب هى المياه الخضرا ) . السبب هو عيب دورة التبريد ولكن المياه الخضرا أظهرته
وممكن تراجع تجربتى فى هذا الخصوص فى مشاركتى فى هذا الموضوع
http://www.nilemotors.net/nile/337256-a.html
وللعلم من وقتها وبفضل الله لا أعانى من أى مشكلة فى دورة التبريد

مشاركه مفيده و رائعه ..

بس تصحيح صغير لبعض المعلومات ...1- الماده اسمها : ايثيلين جيليكول و ليس ايثيلين جيليكون .
2- نسبه تركيز الماده دي في منتجات مياه تبريد موبيل هي 33% و ليس 35% .