الموضوع: موضوع مهم اوي بالنسبة للسيارات الجديدة .... و عايز رأيكم

عادي خالص ايه المشكلة من غير ABS ماتفرقش اوي يعني

=============
يرجى عدم الكتابة باللون الأحمر وفي التوقيع
حيث أنه مخصص لأستخدامات الادارة فقط
وشكرا

الادارة 3

المشاركة الأصلية كتبت بواسطة MMamdouh

يا جماعة فيه لبس كبير فى المفاهيم

اولا لا الABS ولا الEBD حيمنعوا حادث لان كل شىء مقدر و مكتوب... و مهما كانت درجة مهارة السائق و سرعة رد فعلة المقدر من الله سبحانة و تعالى سيكون... حلو؟

نتكلم شوية ميكانيكا... الABS زى ما الاخوة الافاضل شرحوا حوالى 10 الاف مرة هو نظام منع انغلاق المكابح... يعنى بيمنع ان العجل يقفش مع الفرملة و بالتالى تفقد خاصية توجيه العربية لو اللى قفش العجل الامامى او ان العربية تلف حوالين نفسها لو اللى قفش العجل الخلفى او ان العربية تعوم تماما لو الاربع عجلات قفشوا... اظن كدة وضحت الميزة الاساسية للABS

حالات انغلاق العجلات دى بتظهر لما يبقى التماسك مع الطريق ضعيف بسبب الامطار و الجليد او الرمال الخ الخ الخ و بالتالى احتمال غلق العجلات بيبقى احتمال كبير و بالتالى احتمال وقوع حادث بيبقى اكبر و اكبر و بالتالى اهمية وجود الABS بتبقى اكبر

نتكلم شوية جغرافيا... مصر او على الاخص القاهرة... بتبقى فيها امطار كام يوم فى السنة؟؟ و كام يوم بيبقى فيها تلج او رمال و خلافة؟؟... اخرها اسبوع او 10 ايام مطر و باقى الظروف مسحيل تحصل... يعنى بنسبة 99% انت ماشى على اسفلت ناشف و بالتالى احتمال انغلاق العجلات ضعيف جدا جدا الا اذا حطيت نفسك فى مزنق وهمى و كنت بتجرى جامد و اضطريت تفرمل جامد لدرجة ان العجل كلبش و اضطريت مع كل دة تحود كمان... اعتقد كدة الموضوع تعدى حاجز العقل و دخل مجال الجنان الرسمى و بالتالى مش حينفع معاك اى حاجة غير سرير فى الخانكة لحد ما تعقل

شوية منظق... كلنا عرفنا الABS بيشتغل ازاى... بس حد لاحظ انة بيشتغل على نفس منظومة الفرامل بتاعت العربية اللى مفيهاش ABS؟؟؟ بالعربى كدة العربية اللى مفيهاش ABS و اللى فيها ABS فيهم نفس الكاوتش و الجنط و الطنابير و الكالبرات و التيل و ماستر الفرامل و السيرفو.... يعنى من الاخر مكونات الفرامل هى هى يبقى من المستحيل تكون العربية اللى فيهاABS فراملها "اقوى" او "احسن" او "بتوقف العربية اسرع" لان دة مستحيل...

"طيب يا كابتن لطيف لما القصة كدة ايه لازمة الABS اللى واجعين دماغنا بية؟؟"

اقولك ان الABS بينظم عمل الفرامل او بمعنى ادق بيوازن ضغط زيت الفرامل بحيث يحافظ على اقل سرعة ممكنة للعجلات بدون ما العجلة تفقد تماسكها مع الارض... السواق المحترف ممكن "يكارك" فرامل عشان يتفادى المشكلة دى بس مش كل السواقين محترفين و بالتالى ممكن السواق العادى يبقى معرض للخطر... و طالما العجلة ماسكة فى الارض حتعرف تحود و العربية مش حتلف بيك... بس خللى بالك ان مش شرط تقف فى مسافة اقل من الفرامل العادية

"ازاى يا كابتن لطيف... انت بتشتغلنا ولا ايه؟؟"

لا خالص... جرب كدة بعربية فيها ABS و على طريق اسفلت علية طبقة رمل كدة ظريفة من اللى بيحبها الناس بتوع التخميس و كدة... و خش بقلب جامد على سرعة 60 مثلا و اكبس فرامل على الاخر... انت ممكن توصل لاخر الشارع و العربية موقفتش... و دة لان الABS مش قادر يزود القوة الفرملية عن حد معين اللى بعدة العجل حيقفش و الاسفلت اللى عليه طبقة رمل بيزحلق موووووت و بالتالى مسافة التوقف حتزيد جدا جدا فى الحالة دى...

و على فكرة دى عن تجربة بعربية BMW E36 فيها ABS و تقريبا العربية اخدت اسبوع عشان تقف... انا اصلا مكنتش قاصد اجرب الABS بس دخلت شارع لقيت فى اخرة حفر و كان لازم اقف عادى و ارجع بضهرى يعنى لا موقف خطير ولا بفادى حادثة ولا غيرة

"برضة مفهمناش ايه ميزة الABS هنا؟؟"

فى وسط الفرملة دى انت ممكن تحود يمين و شمال و يمين و توجع العربية زى ما نت عايز و تفادى الحواجز و الحفر و النمل اللى ماشى على الارض لو انت عايز لان العجل بيلف و بالتالى انت ممكن توجة العربية فى اى اتجاة و دى النقطة اللى بيفيد فيها الABS... انت المتحكم فى اتجاه العربية و تقدر تعمل اى مناورة انت عايزها و انت بتفرمل على اى سطح مهما كان زلق

"طيب معنى كدة ان العربية اللى مفيهاش ABS حتقف اسرع فى الحالة دى؟"

طبعا

"ليه بقى؟"

لان العجل حيقفشفورا نتيجة لضعف التماسك و العجل حيبداء " يكنس الاسفلت من الرمل و الكاوتش حيمسك فى الاسفلت النضيف و يكلبش العربية فى مكانها... و نفس الموضوع ينطبق لو انت ماشى على طين او طبقة جليد هشة

"طيب ما دة كوبس ان العرية بتقف بسرعة..."

خللى بالك ان اول ما العجل قفش بيتحول الدركسيون اللى فى ايدك الى قطعة زينة لا توثر فى اتجاه العربية... يعنى من الاخر بقى زيك زى اللى قاعد جنك فى العربية... قاعد بتتفرج على الاحداث و بتدعى ربنا انها تنتهى على خير

"يعنى من الاخر الABS مهم ولا لا؟"

مهم بس مش فى الظروف بتاعت مصر... لو انت فى بلد فيها ظروف جوية دايما بتخلى التماسك مع الطريق قليل زى الامطار و الثلج و خلافة يبقى مهم... لو مفيش الكلام دة يبقى ملوش لزمة

"شكرا يا كابتن لطيف.. انا مش حشترى عربية اساسا"

العفو يا حبيبى... ابقى تعالى كل يوم

MMamdouh

سيبك من ABSانت مسخرة خلتنى اضحك جامد جدا و ماتقلقش حبقى اجى كل يوم

المشاركة الأصلية كتبت بواسطة MMamdouh

"شكرا يا كابتن لطيف.. انا مش حشترى عربية اساسا"

العفو يا حبيبى... ابقى تعالى كل يوم

MMamdouh

جامدة دى جدا

قولتها في موضوع قبل كده و حقولها هنا برضه
ال abs عمره ما يمنع حادثه
ولو سائق متمرس و فاهم هو بيعمل ايه مش حيبقي محتاج ال abs
شركات العربيات بس هيا اللي دلعتنا و نزلت انظمه في العربيه كتير
جعلت الفرق طفيف جدا بين السائق المحترف و السائق الهاوي او المبتدئ

الأخوة الأعزاء: بما أن هذه هى أول مشاركة لى فى هذا المنتدى فأود أن أبعث بخالص تحياتى لجميع الأعضاء والقائمين على هذا المنتدى ، وكل عام وأنتم بخير ، أما بخصوص موضوع المناقشة فأود أن أوضح أن عدم وجود نظام منع إنغلاق الفرامل لا يعنى أن السيارة غير آمنة فسواء كانت السيارة مركب بها هذا النظام أم لا فستتوقف عند استخدام الفرامل بشدة ما لم يكن هناك عيوب فنية تمنع ذلك ، وأن الفارق بينهما هوأن نظام منع الانغلاق Abs يتيح إمكانية المناورة بعجلة القيادة لتفادى الحادث أثناء استخدام الفرامل بشدة فى حين أنه عند استخدام الفرامل بدون وجود جهاز Abs يحدث انغلاق للعجل مع الأرض مما يجعل السيارة تندفع بوزنها فى نفس اتجاهها مهما حاولت الانحراف بعجلة القيادة. وقد شاهدت برنامجاً على التليفزيون يقارن بين هذين النوعين من حيث مسافات التوقف فى ظروف قيادة مختلفة ، وقد أدهشتنى نتائج المقارنة ففى بعض الحالات كانت مسافة التوقف للسيارة الغير مجهزة بهذا النظام أقل من مثيلاتها المركب بها النظام.والفرق الآخر هو فى إمكانية التحكم بالسيارة فى حالة وجود النظام عند استخدام الفرامل فى وجود نوعين مختلفين من التربة تحت السيارة
مع تحياتى وتقديرى للجميع