الموضوع: أحبيبتي يا ألنترا , من غيرك مش عارف كان حصل لي أيه ؟

الاخوة و الاخوات الكرام / مالكي و محبي سيارات هيونداي

أسعد الله أوقاتكم ....
و كل عام و كل مصر بخير بمناسبة أعيادنا
(كلنا أخوة و ليس هناك فرق بين مسلم أو مسيحي)

النهاردة نازل الصبح مبتهج و حاسس بأمل و أنتعاش غريب و أن اليوم جميل و كالعادة أخدت لفة حول الالنترا للتأكد من أن كل شئ تمام , و شغلت المحرك و بدأت أتحرك و شغلت الراديو علي نجوم أف أم علشان أسمع حاجة هادية علي الصبح بمناسبة المود الجميل ده

و فجأة ألاقي المذيع بيتكلم في السياسة مع ضيف مالوش ملامح و عمال يتريق و يهبل كالعادة و مش عاجبه حاجة بصراحة لم أنتظر كثير و هوووووب غيرت من الراديو مود الي كارت الميموري مود و بصراحة عندي الكارت مليان من كل صنف و لون (حتي اغاني و موسيقي حرب أكتوبر و الاغاني الوطنية موجودة - ههههههههه) المهم قلبت بالريموت و لاقيت أكثر صوت ملائكي بأحبه

Celine Dion

Céline Dion - I'm Alive - YouTube

و قولت أيوه كده خليني أحس أني عايش و أن فيه أمل

و أنطلقنا أنا و الالنترا اللي حسيت أنها طايرة هيا كمان من الفرح و مستمتعة بصوت سيلين معايا حتي الموتور هدي صوته خالص علشان مايقاطعش صوت سيلين و كأنه عايز يسمع هو كمان

ووسط هذا الجو الملئ بالفرح و التفائل و بعد أن وصلنا الاوتوستراد و تحديدا بعد أجتياز محطة وطنية بقليل كان امامي هوندا سيفيك الشكل اللي قبل الحالي و أمامها سيارة أخري سيفيك موديل 2012 بس ماشي بيحسس أو مش عارف يمشي (أومال هوندا أيه و سرعة أيه بقي ؟؟)
و فجأة الطريق وقف و يادوب بأشغل الانتظار و لاقيت المسافة بيني و بين السيفيك اللي وقف خالص فجأة (لأنه كان خبط في السيفيك الجديدة اللي قدامه) ضاقت تماما و خلاص أنا هأدخل أختم السيفيك بختم هيونداي هههههههههه

قولت مابدهاش و ضغت علي الفرامل علشان اسمع صرخة عالية (مع أننا ماشين أقل من 60 كم/س ) و هووووب وقفت يادوب قبل ما ألمس شنطة السيفيك بحوالي ربع متر و علي طول بصيت في المراية علشان أشوف اللي ورايا هايعمل أيه لكن لاقيته لحق نفسه و فرمل بسبب الانتظار المبكر اللي شغلته

طبعا الحادثة قطعت الجو الجميل اللي كنا عايشيين فيه أنا و الالنترا و لكن ... طالما ان ماحصليش حاجة أخدت شمال و طلعت من الاثنين سيفيك و قولت مافيش داعي نعطل الطريق و مشيت و شوفت السيفيك القديمة وشها أتدمر (فوانيس و شبكة و كبوت) و السيفيك الجديدة (أكصطدام فقط)

المهم كملت ووصلت الشغل بسلام و لم أترك كل هذه الاحداث الصغيرة تؤثر في المود الخاص بي و قررت أن أكمل اليوم مع سيلين ديون

Céline Dion - That's The Way It Is - YouTube

يا جماعة أفهمواااااااااااااااا بقي

أنا مش بأشكر في فرامل الالنترا و لا حاجة و خلوا بالكوا أننا كنا ماشيين كلنا 60 كم/س بس صاحب السيفيك كان معاه واحد و عمالين يتكلموا وواضح أنه ماخدش باله من اللي قدامه

القصة و مافيها أني عايز اقول أن الالنترا أنقذتني مرتين :

- الاولي : لما رحمتني بامكانيات الراديو اللي فيها من جحيم مذيعي قنوات الراديو
- الثانية : لما فراملها قدرت توجفها (علي رأي عمنا الكبير سبعاوي) و ماحصلش حاجة للعربية

أما قصة الصرخة اللي في الكاوتش :
العربية دي أول فئة يعني مافيهاش أي بي أس و لا حاجة و كل القصة أن فتحات الكاوتش لما بيكون فيها زلط و حصي كتير بتتقفل و مابتعملش تفريغ كويس للهوا فممكن تحصل الصرخة دي

عادي يعني خدوا الامور ببساطة و الهوندا علي عيني و علي رأسي طبعا و عربية جميلة و فراملها أكيد ممتازة لأني مجرب اللي زيها قبل كده (التويوتا بكل أنواعها)