العربية رشه بره نضافه وفابريقه جوه وكل الميكانيكيه اللي شافوها بشكروا فيها وبيقولها حالتها ممتازة واللي جابهالي ميكانيكي اكتر من اخويا
بس تقريبا من ساعة ماجبتها كل اسبوع تقريبا مشكله
اول مشكله الدريكسيون فلت من العصاية اللي مسكاه من العجل وبيلف على الفاضي والحمد الله ربنا سترها وكنت ماشي في شارع زحمة على مهلي ولحقت نفسي ووقفت
رحت للمكانيكي وربط على الدريكسيون وقالي تمام
تاني مشكله كانت بتنتش على الاول والتاني رحت لميكانيكي تاني ونضف الكاربيتير بالهوا وقالي تعالى يوم تاني ننضفهولك باسبراي الكربيتير
قعدت اسبوع لحد مانتشت تاني ورحتله ونضفنا الكاربيرتير وبقت تمام
تالت مشكله مش لاقي لمبات عددات التابلوه وعملت حركة اني انقل مكان اللمبات اللي مش محتاجها لمكان اللمبات المحروقة زي ما موجود في موضوع شرح هنا
نور شوية بس لسه محتاج 4 لمبات تاني على الاقل
بعد كده مشكله السخونه
العربية الطبيعي بتاعها 90 وفي السفر 100 ومع التكييف بتقرب ل110 وبضطر اقفل التكييف تاني ولسه ماشوفتش ايه المشكله
بعد كده الفرامل بدأت تهرب مني ورحت لكذا ميكانيكي وقالولي الماستر
واول امبارح وانا رايح اشتري الماستر انا والميكانيكي من عند واحد بتاع استيراد الدريكسيون فك تاني والحمد الله ربنا ستر لتاني مره وكنت لسه ماطلعتش من الشارع بتاعنا ومعايا الميكانيكي اللي اعصابه سابت والمفروض انه على كلامه ربطه كويس والدنيا تمام
النهارده بقى الحركة الاوسخ
وانا مسافر على طريق الكريمات وقبل ما اوصل حلوان العربية بدأت تنتش جامد لحد مابقت ماتسحبش بنزين خالص
سحبت بنزين من الخرطوم وفتحت عمة الكاربرتير وحطيته وبرضه ماشتغلتش
وقفت في عز الضلمة ساعه تقريبا مش عارف اعمل ايه واقعدت احاول انها تدور
ابدا وانا واقف مرعوب حد يطلع عليا من الصحرا
لحد ماعدى عليا الحمد الله دورية مرور ووقفوا معايا واتصلوا بالقيادة بتاعتهم وجابوا منهم رقم شركة لقطر العربيات وكتر خيرهم فضلوا واقفين معايا ساعه تاني لحد العربية ماجات وشالت عربيتي ودفعت 300 جنيه غير اكرامية السواق ورجلي فوق رقبتي
اكتر حاجه حرقت دمي بقى النهارده اني بعد ماوصلت البيت بدور العربية لقيتها دارت زي الفل بس الاشارات والنورالعالي فاصل مع العلم ان الانتظار شغال والنور العادي ونور التابلوه شغال
والنور العالي بيشتغل لما بسحب الدراع لورا
انا راكنها دلوقتي تحت البيت وبكره بعد الشغل هوديها عند ميكانيكي تالت غير اللي بتعامل معاهم
انا جايب العربية من شهر ونص تقريبا وخلاص انا اتعقدت
تقريبا كل يومين او تلالته عند الميكانيكي ده غير مشاكل ورقها في المرور
ملفها في مرور ورخصتها مرور تاني في محافظة تانيه وماشي بتصريح وتوكيل ادارة
والدي بيقولي سيبهالي واخد عربيته الكورولا بس انا خايف عليه من مشاكلها
ياريت لو تنصحوني اعمل ايه بالظبط علشان انا بسافر كتيير تقريبا كل 4 ايام
ومش عايزها تقف معايا تاني
وياريت اسم ميكانيكي محترم مايشتغلنيش وبيفهم في الفليشيا في مدينة نصر علشان انا على قدي في ميكانيكا العربيات