احسن صنايعية في العالم

**Mr_SelvesteR** · 07-05-2013 06:06 PM

المشاركة الأصلية كتبت بواسطة ahmed nasser

كلام جمييييييييييييييل
بس اغلبنا معنوش ضمير والناس اللى حضرتك بتكلم عليهم قليلين جدااااا

بس موجوديين ولو شجعناهم ونسينا الي معندوش ضمير الفكرة هتعم والكل هيبقي زي محنا عاوزيين المهم مسترخصش

**Mr_SelvesteR** · 07-05-2013 06:08 PM

المشاركة الأصلية كتبت بواسطة dede_dodo88

نحب أحنا نصبر نفسنا بأي حاجة حتى لو مش حقيقية.. زي كده اللي يقولك المصري ده أذكي واحد في الكون بس اللي يكتشفه!! Lol

يا باشا دي حقائق علمية بس المشكلة اننا معندناش ثقافة تنمية القدرات
والتلميذ او الطالب بينسي كل حاجة والتعليم بيعتمد علي التلقيين والمهم الطالب يكون حافظ ومش مهم فاهم

**Mr_SelvesteR** · 07-05-2013 06:10 PM

المشاركة الأصلية كتبت بواسطة wessamraafat

الفكرة ازاى تثتمر الشطارة و تطلع منها حاجة مفيدة
الموضوع مش شطارة فردية و بس....الموضوع اكبر من كده بكتير
الموضوع:
1- قوانين تحترم و تتطبق على الكبير و الصغير (وفرض قوانين عمل صارمة تمشي على العامل و صاحب العمل وضمان حياة كريمة للعامل طالما انه مجتهد و منتج)
2- ثبات و مرونة القوانين (تغيير القوانين بدون داعي لا يشجع أبدا على الأستثمار وكمان لابد ان تكون مرنة لإستيعاب التطورلت المرحلية)
3- تشجيع الصناعات الأستراتيجية و الصناعات المكملة لها و صناهة بيئة مخدمة عليها
4- البحث عن اسواق جديدة لتسويق المنتجات زي أفريقيا و امريكا الجنوبية بدل ما عايزين نصدر لأوروبا و أسيا و هما سابقيننا بمراحل (بالبلدي ماتروحش تبيع المية في حارة السقايين)
5- عدم استخدام الطرق المباشرة لتوجيه طاقة الشعب لانها طرق اثبتت فشلها و استخدام وسائل ذكية غير مباشرة (يعني مثلا ماتقولوش بلاش تعليم عالي الصنعة احسن ، بدل كدة اعمل بيئة محترمة للعامل و مرتب كويس و تأمين شامل و حتلاقي الناس بتجري لوحدها على نوعية الشغل دي......مثال أخر بدل ماتقول للناس ماتخلفوش عيال كتير اعمل زي الصين و افرض ضرائب و مصاريف اعلى تصاعدية على الكفل التاني و التالت و هكذا....دا مجرد مثال مع ايماني بأن العدد مش هو المشكلة دلوقتي)
6- تشجيع العمل الجماعي للطفل و هوا صغير عشان يعرف قيمة التعاون مع الأخرين و كمان تخصيص عدد ساعات معينة للعمل الأجتماعي و الأنشطة المختلفة لأن الحتة دي عيب متأصل فينا و دايما تلاقينا بناكل في بعض سواء في الشغل او في الخارج و كل واحد هامه نفسه و بس
7- خلق القدوة الحسنة عن طريق حكومات محترمة و مسؤلين جيدين و رقابة صارمة عليهم ، تشتغل للناس فعلا و تحترم القوانين ، ماتلاقيش بوكس الشرطة مثلا هوا اللي بيمش عكسي
8- تكافؤ الفرص ، و نبطل حكاية ابن الباشا و ابن البيه لأن دي من اكبر مصايبنا....البني ادم البسيط لما يحس ان اللي بيبنيه في سنين بيعمله واحد تاني في يوم عشان قريب فلان واللا علان بيكفر بالشغل و يقوللك ماهي محصلة بعضها و كمان بيتحول لأنسان ناقم على المجتمع و احيانا مخرب ليه و بيدور على اي نهيبة ينهبها ماهي بايظة بايظة

و انا أول واد باكسر الأشارة لما سافرت برا مصر...بس لما حسيت ان الناس كلها حواليا بتحترمها انكسفت من نفسي و ابتديت اعمل زيهم

بجد انا نفسي مصر تبقى احسن بلد بس لازم الأول نعرف احنا فين...حتي لو مستوانا في الحضيض بس نعرف عيوبنا و نبتدي نصلح و نخطط كويس...و الأامثلة كتير
بس لو اعتمدنا اسلوب الشطارة و الفهلوة و المصري دا احسن واحد في الدنيا......كمل و انزل لتحت كمان لغاية محتلاقينا بنشتغل عند الفلبينيين و برضه هنقول ان المصري مافيش زيه

انا اسف انى طولت بس الموضوع يستاهل....لازم نغير ثقافتنا و نظرتنا لنفسنا و للعالم حوالينا و نبقى واقعيين
وللامام يامصر

لو حضرتك بصيت لكلامي وكلامك هتلاقي ان تقريبا احنا متفقيين
المصري ليه قدرات كويسة بس مش بيوظفها
بيحفظ خطوات وبيمشي عليها وبقي في كسل حتي ان الواحد يفكر
والمشكلة مفيش اهتمام ولا توظيف صح ولا قانون يحكم العملية ولا حتي حد سلط الضوء علي الموضوع دا

**kokowasfy** · 07-05-2013 08:33 PM

متابع

**rahmanboud** · 07-05-2013 08:58 PM

أنا أتعاملت مع صنايعية زمان الناس الكبيرة اللى كان عندها صبر فى التعلم وإخلاص فى العمل وشوفت كمان شباب اليومين دول الواحد فيهم عايز يعرف كل حاجة فى وقت قصير جدا وبعدين يفتح ورشه وهو ناقصه كتير من الخبرة والممارسه - المقصود من كلامى لو شباب النهارده يمتلك صبر الجيل الماضى وضميره أكيد مصر حتحقق مكانة عاليه وترجع رائده من جديد