العين السخنة والمصيف .. تقرير كامل بالتفاصيل والصور

**mohamed_selim** · 11-05-2013 08:53 AM

المشاركة الأصلية كتبت بواسطة blazer

كنت عاوز استفسر منك على حاجه انت بتصور بكاميرا ايه؟
ولا بتصور بكاميرا عاديه وجايبها ليها هاوسينج ووتر بروف " واشتريه منين لانى دوخت عليه وملقتش الكفر بتاع الكاميرا :( "

وغير كدا انا اشتريت الزعنفة دى
tusa reef tourer

بس للاسف لما استخدمتها حسيت انها طريه زياده عن اللزوم و بتلب فى المية لما تحاول تزيد سرعتك " فيها نسبه سليكون كبيره فى الزعنفة نفسها " ,, فهل دا عيب استخدام منى ؟

الهاوسينج غالبا بيتعمل للغطس عشان يتحمل الضغط مع الاعماق و بيتباع هنا فى مصر بس بيكون غالى .... سعره اغلى من الكاميرا نفسها و بيكون ليه معامله و طريقه خاصه للحفاظ عليه عشان ميدخلش ميه و يبوظ الكاميرا
بالنسبه للسنوركلينج اللى هتحتاجه هو حاجه واتربروف بس و دى هتلاقيها برضه بس مش هاوسينج بس زى كيس كده بيتقفل كويس و فى كاميرات نفسها جاهزه للتصوير تحت ٣-٤ متر بس مشوفتهاش فى مصر

لو عايز هاوسينج بلغنى وانا اشوفلك موجود ولا لا و سعره كام و اقولك تجيبه منين بس خلى بالك مش كل الكاميرات و موديلاتها ليها هاوسينج

**مصطفى-حسن** · 11-05-2013 12:50 PM

المشاركة الأصلية كتبت بواسطة karim_monir

موضوع شيق وجميل يا مصطفي
وانا شخصيا اعجبت بيه
اما عن الرسالة اللي انت كاتبها دي كلها :-)
مكانش ليها لازمة
اي عضو في المنتدي عايز يفتح لنفسه مجال رزق في حاجة محترمة وتفيد الاعضاء
بيبعت يستاذني وغالبا بوافق لان المنتدي هنا قايم على خدمة الناس وبعض مش علي الربح
والحمد لله بنغطي تكاليفه من اماكن تانية فخلاص الموضوع منتهي

خلصنا الجد ونيجي للهزار بقي
هو انت عايز تعدي حاجة من تحت عين الزعيم من غير مايدوقها الزعيم :-)
وبعدين انت مش بعيد عني ده انت في العاشر انا 5 سنين هناك في اراب :-)
وراجعينلكم تاني اخر السنة :-)
شوف حط تليفونك عادي ده هديه مني ليك
اعمل تقرير مشاركة خلي المشرف يحطهولك في اول موضوع
ولما ترفع صور تانيماتخليهاش كبير كفياة قوي 640* 480
عشان الموضوع مايبقاش تقيل
وانا هاتصل بيك ارتب معاك طلعه على اخر مايو باذن الله
وبينا تليفون عشان نرتبها
عشان احنا فعلا اكتر من 10 ونشوف هانخفض مين ومين مايجيش ومين هايتقمص ويزعل
بالتوفيق
تحياتي

الكبير قوى قوى منور الموضوع بنفسة
دا شرف لينا ياباشا
وشكرا على سعة الصدر فى موضوع رقم التليفون
وبالنسبة للطلعة شوف الوقت اللى يناسبك وانا تحت امرك
بس كلمة فى سرك
((( كل ما العدد فى الطلعة بيبقى متوسط 4 او 5 او 6 كل ما يبقى احسن))))
عشان مجهودى واهتمامى فى المية بدل ما يبقى متوزع على 10 يبقى متوزع على عدد اقل وخصوصا لما يكون حد فيهم مبيعرفش يعوم او عندة خوف من البحر بياخد وقت ومجهود على اما اكسر الخوف دة ويدخل معانا البحر المفتوح

لكن لو كلهم او غالبيتهم بيعرفوا يعوموا بتعامل مع 10 افراد زى الفل
وفى انتظار تليفونك

**ramymechanics** · 12-05-2013 07:03 AM

نظرا لحبى الشديد للعين السخنة من قديم الأزل أحب أضيف بعض المعلومات لعلها تكون مفيدة .... أبتدى مثلا ببعض الأماكن اللى رحتها
بالميرا .. دى 10 كيلو شمال "وحط خط تحت كلمة شمال" نقطة الصفر يعنى كأنك رايح السويس مدخلها يخض وتحس انها مقلب بس تدخل جوة عالم تانى من الهدوء والأستجمام .. الأوضة فيها 550-650 جنيه فطار وعشا أوبين بوفيه مفيهاش زلط فى البحر وفيها اتنين بيسين ظراف وواحد للأطفال .. سعر الداى يوز 120 جنيه للفرد شامل الغدا فقط من 8 ص الى 6 مساء

موفنبيك ... الليلة تبتدى من 900 جنيه بوفيه فاخر ... غرف ممتازة جدا وفخمة .. بيسين واحد وشاطئ صغير بس نظيف

بورتو .. الشقة الفندقية شامل الأفطار والغدا تبتدى من 2200 جنيه لأربع أفراد والشقة طبعا ممتازة جدا وميكروويف وحركات بس فى المناسبات ممكن توصل لأربع تلاف بلبل "جنيه يعنى" الفندق الليلة فيه بردو مش أقل من 1200 للغرفة المزدوجة وتختلف حسب السيزون ... طبعا فى ملاهى ومطاعم وكافيهات وسوبر ماركت المحمل ودول برة القرية يعنى ممكن تروحهم لو انت نازل فى قرية تانية .... بيسين كبير جدا وتلفريك وبحر رمل مفيهوش زلط بس هيتقطع نفسك فى المشى جوة القرية لأنها مهولة وعالية فمفيهاش عربيات جوة

رمادا .. نظام شاليهات شبه الفلل مكيفة بالكامل فطار وعشا اوبين بوفيه تبتدى من 900 جنيه للشاليه غرفتين و على ما أذكر 1300 للفيلا ال 3 غرف .. البيسين حلو بس صغير والبحر فيه زلط ومش ظريف للأطفال بس لو بتعرف تعوم يبقى كويس وفيه زلط كتير

واحة الحجاز ... شاليهات صغيرة بس ناس بتأجرها مش خدمة فندقية يعنى بتأجر شقة ومع نفسك

الشهر اللى فات رحت فندق بس بعد بورتو ب 27 كيلو عند مراوح الزعفرانة "حوالى 53 كيلو من نقطة الصفر اسمه Cancun beach and resort تبع عامر جروب بردو ممتاز بس بحره مش اد كدة اليوم فيه فى جناح فخم أشبه بالشقة وسراير اطفال وحمامين وسفرة والأهم حمام سباحة دافى ب 1600 جنيه اليوم شامل الأفطار بس ... الكلام دة فى الويك اندز طبعا لكن الأيام العادية الغرفة ب 550 جنيه الليله اقامة كاملة

رحت ستيلا ... كبيره جدا من جوة بطريقة زهقتنى ... اليوم بردو فى رينج ال 1200 جنيه بس فخمة وكلها ناس هاى كلاس ومايوهات استغفر الله العظيم كلها ماركات

الأكل بقا المشكلة الأزليه فى العين السخنة ... بصراحة بقا من الآخر انا لو رايح مكان مش بالأكل بجيب من الناس اللى واقفة بتشوي عالطريق ... سمك طازة بس طبعا هم مش شيفات كيلو البلطى ب 28 جنيه والبورى 45 جنيه والجمبرى ب 160 جنيه طبعا الكلام دة مطبوخ أو نى

نصيحة أبدية ... ابعد عن مطعم حلقة السمك اللى فى بورتو غالى جدا وهتطلع 8 كيلو فى الجبل "لو مطلعتش بالتلفريك " بس فيو تحفة وأكله معجبنيش بصراحة كفاية اقولكم ان طبق الطحينة ب 14 جنيه والحاجة الساقعة ب 12 جنيه وزود الخدمة والضريبة 22% ... لو انت مصر على مطاعم عندك مطعم اسمه ضى القمر وجنبه مطعم اسمه ابو على غاليين بس مش أوى عند موفنبيك كدة

كنتاكى وبيتزا هت اللى شمال نقطة الصفر ب 8 كيلو بصراحة معجبونيش اوى

دة اللى فاكره دلوقتى وأيدى وجعتنى الصراحة أول مرة اكتب موضوع طويل كدة

صحيح نسيت أقولكم اللى رايح ياخد معاه قارورة المية ال 14 او العشرين لتر عالأقل عشان فى اى مكان يروحه مفيش مية فى الحنفيات تتشرب

**ramymechanics** · 12-05-2013 07:08 AM

معلش نسيت أكمل نصيحة

لو انت فى ايام زنقة والعين السخنة كومبليت نتيجة لقربها من القاهرة والضغط عليها اعمل أكونت على booking.com وممكن تحجز من عليه بيبقى ليهم حاجات محجوزة ليهم هو أو hotels.com أو tripadvisor.com بالكريديت كارد بتاعك بيعمل هولد لحق ليلة من حجزك لحد ماتروح وعلى كدة ساعات مش بلاقىعليهم بردو ويقولك ازمة اقتصادية

**ahmedhilmy** · 12-05-2013 08:26 AM

تقرير اكتر من رائع و الله حمستنا لرحلات الصيف ممتاز

**friendship7897** · 12-05-2013 02:21 PM

ما شاء الله
تقرير فوق هايل
أنا كنت في شرم أسبوع أجازة شم النسيم
وعملت سنوركل وغطس
ومن خلال تقريرك دا حسيت أني لسة في البحر
تقرير حي جداً
وواضح أنك حد بروفشينل
لأني أستمتعت وأستفدت بالدرس أكتر من الغطاس اللي كان معانا
وأعتقد أني لو غطست دلوقتي ( بعد الدرس ) هكون أكتر فاعلية
جزاك الله خير

**mohamed_selim** · 12-05-2013 02:34 PM

المشاركة الأصلية كتبت بواسطة chicobon

شكرا للتقرير جميل جدا بس ازاي الغطس من غير الاوكسيجين

مفيش غطس باكسيجين ... الغطس نوعين: حر free diving و ده بيعتمد على النفس و بيكون لمده محدوده دقيقتين تلاته حسب كل واحد و نفسه ... او scuba diving و ده بيكون باسطوانات هوا مضغوط و بتقعد فتره تحت الميه ممكن توصل لساعه حسب العمق و حسب حاجات تانيه

الfree diving ليه تدريب و كورسات و اعداد بدنى و نفسى .... حاجه زى اليوجا كده
ال scuba diving ليه تدريبات برضه و لازم تاخد رخصة غطاس عشان تقدر تاجر و تستعمل الاسطوانات بس تانى الاسطوانات دى فيها هوا مش اكسيجين :)

**مصطفى-حسن** · 12-05-2013 10:23 PM

المشاركة الأصلية كتبت بواسطة romieh

والله تقرير رائع وفتحت نفس الواحد للسفر

عندى فكرة لو اتنظمت هيبقى يوم جبار

ايه رايك لو ترتب على يوم من ده لاعضاء المنتدى

هيبقى يوم جامد جدا جدا، وكمان علشان الناس تتعلم منك اساسيات السنوركل

مفيش اى مشكلة

المشاركة الأصلية كتبت بواسطة youssef_u

تقرير رائع و ممتاز و فتحت نفسي عالمصيف والله اللللف شكر

انا مشكلتي في النفس بخاااف جدا وانا تحت الميه و بعوم نص نص او احسن شوية

سهلة بأذن اللة

المشاركة الأصلية كتبت بواسطة hossam_elwani

موضوع روووووووووووووعه

تحياتى على وتقديرى على المجهود فى اعداده

ان شاء الله اول طلعه لميصف حتكون السخنه

بأذن اللة تعالى

المشاركة الأصلية كتبت بواسطة rapid

ايه الجمال ده
تقرير تحفة ومتكلف من بتوع زمان :)

ربنا يكرمك يا باشا

المشاركة الأصلية كتبت بواسطة ghostmido

ايه الموضوع الجامد ده......
بصراحة انا ماشوفتش حد فى الزمن ده بيعامل الناس كده....
يعنى عازم صحابك وجايبلهم الادوات كلها ومخليهم يختاروا كمان وبتديهم تدريب ساعة ونص و بتصورهم وبعدين تعمل تقرير بالحلاوة دى ....
والله اعلق واصفق على راى الشوالى ....انا حاولت اعمل اعجاب وشكر بس للاسف مش ينفع ياريت تعتبرها وصلت ...
هههههههههه.

وصلت واكتر يا معلم

المشاركة الأصلية كتبت بواسطة buddha

الله يبارك لك
وتسلم ايدك يا باشا
ربنا يباركلك

"العين السخنة من اجمل الاماكن على الاطلاق وحتى الطريق بداية من الادبية الى اخر العين السخنة اكثر من رائع"

بس للاسف هيا مصيف يوم واحد فقط

واعتذر من الجميع على تأخرى فى الردود