تقرير مصور لصيانة ال 40,000 كم للألنترا md (الجزء الثاني : الاطارات و الوقود)

**Samir Elshahawy** · 11-05-2013 06:26 PM

المشاركة الأصلية كتبت بواسطة S O P H O S

الف مبروك تكملة الصيانـة ..

الله يبارك فيك , بس لسه فيه جزء ثالث كمان هههههههه

المشاركة الأصلية كتبت بواسطة mhkorayem

مبروك الصيانه وعقبال صيانه الـ 400000 كم
بس انا ليه حبه استفسارات في الموضوع ده بس هاخدهم واحد واحد كده عشان متقلش عليك مره واحده
بس قل ما اسأل أول سؤال أنا عاوز اعرف ازاي بترفعوا الصور في التقرير عشان الموضوع ده جنني ومش عارف اعمله

نرجع بقى للسؤال الأول:
موضوع تدوير العجل ده بيبقى كل قد ايه ؟
وبيفرق في ايه ؟
ولو متعملش فيه مشكله ؟

بصراحه انا عامل 160000 كم وعمري ما عملت الموضوع ده
والكاوتشات اللي عندي دلوقتي الأتنين الامامي عاملين 20000 كم والخلفي عاملين 15000 كم (ماكنتش مركبهم مع بعض) فأعمل ايه دلوقتي

معلش بتقل عليك بس ده السؤال الأول بس لسه بقى باقي الأسئله بس لما نخلص من السؤال ده الأول

حضرتك أتفضل أسأل براحتك طبعا
أولا بالنسبة لرفع الصور : ده موقع رفع الصور الخاص بالمنتدي
مركز تحميل نايل موتورز

بتدخل عادي باليوزر نيم و الباسورد اللي بتدخل بيها للمنتدي و تحمل الصور اللي أنت عايزها و بعد كده تقدر ترجع لها في أي وقت و تفتحها و تعمل لها كوبي و بيست في الموضوع

ثانيا.. موضوع تدوير العجل بيكون كل 10,000 كم أو علي حسب الكتالوج بتاع العربية
عندي في الالنترا مكتوب كل 12,500 كم لكن أنا بأمشيها مع الصيانات

و طبعا بيفرق .. لأن معدل التأكل بيكون واحد في كل الاطارات لما تعمل التدوير لأن معروف أن معدل التأكل في الاطارات الامامية بيكون أعلي من الخلفية بسبب ميل الاطار مع الملفات و كمان لو أنت متعود تمشي في طريق معين و مثلا بتأخد فيه ملفات أو يوتيرنات كتير بيكون معدل تأكل الكاوتش الامامي الايسر مثلا أعلي من باقي الاطارات
لكن ... لما تعمل تدوير كل فترة فكده الكاوتش كله بيتعرض لنفس الظروف و بالتالي معدل التأكل بيكون متساوي

طبعا لو ماعملتش الحكاية دي هايكون معدل تأكل أحد الاطارات أعلي من الباقي علشان كده بتضطر ساعات أنك تغير فردتين مثلا

بالنسبة للحالة اللي عندك ممكن تعمل التدوير بشرط أن تكون الاطارات نفس النوع و نفس النقشة

و في أنتظار باقي أسئلتك

المشاركة الأصلية كتبت بواسطة atyam

شغل تمام يا بشمهندس بس سؤال هو ظبط ضغط الاطارات مش بيكون على 30 مش 32؟
انا معايا ار بى وبحط نتروجين وبظبط على 30

ضغط الاطارات بيكون مكتوب علي القائم الشمال عند الباب و بيكون حسب :
- مقاس الاطارات
- الحمولة
و الضغط مالوش علاقة بنوع الغاز المستخدم سواء كان هواء أو نتروجين

المشاركة الأصلية كتبت بواسطة Walid_M

تسلم إيدك يا باشمهندس ...

بصراحة تقاريرك مميزة , وتضيف المتعة للتصفح على الانترنت !!!
كمان أنا معجب بطريقتك في متابعة الصيانة الدورية , بغض النظر عن اختلافي في موضوع الالتزام بجدول الصيانة بتاع الشركة من عدمه ...

سؤالين كده على الماشي

- حضرتك قلت لنا معدل التأكل للكاوتش كام !!! , يا ريت لو نعرف إيه هو معدل التأكل اللي مفروض نغير الكاوتش عليه ؟
- منظف دورة الوقود نحطه كل كام الف كم ؟

تحياتي

معدل التأكل عندي في كل الاطارات (الاربعة) داخلي و خارجي هو 1 مم و العمق الاصلي للمداس بتاع الاطار 8 مم و في بعض الموديلات الاخري بيكون 9 مم

كده معدل التأكل حوالي 12.5 % و منتظم نتيجة لأني بأعمل التدوير من أول ماجبت العربية

المفروض الكاوتش يتغير في الحالات التالية :
- أن لايزيد عمره الافتراضي عن 3 سنوات حتي و لو كان جديد و لم تمشي به
- لو زاد معدل التأكل عن ال 50%

أما موضوع تغيير الكاوتش بعد عدد كيلومترات محدد فلم أجد شئ مؤكد أو دليل علي هذا الكلام

بالنسبة لمنظف الوقود بيتم أضافته وفق نوعه
يعني في أنواع بتستخدم كل 5,000 كم
و فيه أنواع أخري كل 10,000 كم و ده بيكون مكتوب علي العبوة نفسها

المشاركة الأصلية كتبت بواسطة s7oda

تسلم أيدك يا هندسة تقرير بجد يستفاد منه
عندي استفسار بسيط
هل من الضروري وضع منظف لدورة الوقود والذي وضعته مع البنزين وما مدى تاثيرة على العربية
فردة الكاوتش الاستبن هل هتدخل ضمن تبديل الكاوتش علشان قرأت قبل كدة انها تدخل مع تبديل الكاوتش
بالامانة احسن فرع لغبور في الصيانة ابو رواش والا العبور علشان زهقت من ابو رواش وعايز اولع فيهم
بس مش لاقي ولاعة

فعلا في كتالوج العربية مكتوب ضرورة وضع منظف لدورة البنزين و لكن كل 5,000 كم لكن أنا بأستخدم نوع أخر أفضل كل 10,000 كم

تأثيره علي العربية كالتالي :
- صوت أهدي للمحرك
- أداء أفضل للمحرك و بالتالي توفير في أستهلاك البنزين
- المحافظة علي الرشاشات و دورة الوقود نظيفة بقدر المستطاع
- تنظيف قواعد الصبابات و أزالة أي ترسبات عليها

بالنسبة للأستبن أيوه بيدخل في عملية التدوير بشرط أنها تكون قياسية زي باقي الاطارات

المشاركة الأصلية كتبت بواسطة Kareem.ElAraby

يباركلك فيها
غيرت لفالفولين ولا رجعت لشل ؟!
حلوه الصيانات ديه و متابعتك لعربيتك
تعالي انزل معايا و انا بأدور لصاحبي في المستعمل و انت تعرف العك و الملي*ه اللي حاصله

لا يا باشمهندس كريم .. رجعت لشل تاني لأني في ظل قراري بالعودة لنظام صيانة ال 10,000 كم شل سيكون أقل تكلفة مع الاخذ في الاعتبار أن زيت فالفولين بدأ يكون لونه غامق أكثر من شل و كمان صوت المحرك أرتفع في الفترة الاخيرة

نظام الصيانات اللي أنا بأتبعها دي نتيجتها :
- أني لما بعت اللانوس كانت عاملة 60,000 كم و الزيت كان بيطلع نظيف بعد صيانة ال 10,000 و حالة الموتور و ادائه و أداء العربية كان ممتاز
- في الياريس اللي كانت عاملة 70,000 كم :
الكاوتش كان زي ماهو و معدل تأكله لم يزد عن ال 30%
كبس الموتور كان ممتاز (فوق ال 85 %) مع أن العربية كانت بتسافر و بتقفل العداد
تيل الفرامل لم يتم تغييره
طبعا لو بتلتزم بالصيانات المظبوطة العربية هاتريحك و تبقي ماشي مطمئن و لو هاتبيعها برضه هاتتباع بسرعة و بسعر كويس ة يكفي أقول لك أن الياريس أتباعت بعد 4 سنوات أستخدام (70,000 كم) بمبلغ فوق ال 86,000 جنيه

**mhkorayem** · 12-05-2013 03:46 AM

المشاركة الأصلية كتبت بواسطة Samir Elshahawy

حضرتك أتفضل أسأل براحتك طبعا
أولا بالنسبة لرفع الصور : ده موقع رفع الصور الخاص بالمنتدي
مركز تحميل نايل موتورز

بتدخل عادي باليوزر نيم و الباسورد اللي بتدخل بيها للمنتدي و تحمل الصور اللي أنت عايزها و بعد كده تقدر ترجع لها في أي وقت و تفتحها و تعمل لها كوبي و بيست في الموضوع

ثانيا.. موضوع تدوير العجل بيكون كل 10,000 كم أو علي حسب الكتالوج بتاع العربية
عندي في الالنترا مكتوب كل 12,500 كم لكن أنا بأمشيها مع الصيانات

و طبعا بيفرق .. لأن معدل التأكل بيكون واحد في كل الاطارات لما تعمل التدوير لأن معروف أن معدل التأكل في الاطارات الامامية بيكون أعلي من الخلفية بسبب ميل الاطار مع الملفات و كمان لو أنت متعود تمشي في طريق معين و مثلا بتأخد فيه ملفات أو يوتيرنات كتير بيكون معدل تأكل الكاوتش الامامي الايسر مثلا أعلي من باقي الاطارات
لكن ... لما تعمل تدوير كل فترة فكده الكاوتش كله بيتعرض لنفس الظروف و بالتالي معدل التأكل بيكون متساوي

طبعا لو ماعملتش الحكاية دي هايكون معدل تأكل أحد الاطارات أعلي من الباقي علشان كده بتضطر ساعات أنك تغير فردتين مثلا

بالنسبة للحالة اللي عندك ممكن تعمل التدوير بشرط أن تكون الاطارات نفس النوع و نفس النقشة

و في أنتظار باقي أسئلتك

شكراً يا هندسه على الاجوبه دي
وبخصوص موضوع تحميل الصور هدخل اجرب كده لحسن الموضوع ده كان معقدني

وقبل ما ندخل في الجد احب اشكر باقي الاعضاء على الاسئله عشان منها اسئله كنت هسالها فعلاً وهما وفروا عليا السؤال ولازم طبعاً أشكر شكر خاص جداً جداً جداً للبشمهندس سمير على سعة صدره ورده على الأسئله وبشكل مفصل وواضح وبلتمس منه العذر لو في حاجه موضحتش ليا عشان المشكله هتبقى في قله خبرتي أنا ( ربنا يصبرك يا هندسه عليا

)
ندخل بقى في المهم ( وهتبقى برضوا الأسئله متعلقة بموضوع الأطارات عشان نقفل الموضوع ده ونركز بعد كده في موضوع تنظيف دوره الوقود)

1- (وده سؤال ينطبق على حالتي انا مش سؤال عام)
انا عندي الاطارين الاماميين prielli P1 راكبين من 20.000 كم تقريباً
الاطاريين الخلفيين prielli P4 راكبين من 15.000 كم تقريباً
والاستبن اعتبروا مش موجود (انا سايب واحد من القديم اللي غيرتهم عشان حالات الطوارئ فقط)
دلوقتي حضرتك قلتلي ممكن اعمل عمليه التدوير بشرط يكونوا الاطارات نفس النوع والنقشه
طيب هما هيفرقوا في ايه لما يكونوا نفس النوع والنقشه مش المهم يبقى الاتنين الاماميين نوع واحد والاتنين الخلفيين نوع واحد
طيب ما ده هيحصل حتى بعد عمليه التدوير عشان احنا بنرجع الاتنين الاماميين ورا والاتنين الخلفيين بنطلعهم قدام (زي الصوره اللي حضرتك رافعها) يبقى ايه المشكله في كده

2- هو ضغط الهواء مش بيختلف على حسب درجه الحراره يعني في الصيف حاجه والشتاء حاجه تانيه. ولا اسيبني من الكلام ده واشوف ايه اللي مكتوب على القايم بتاع العربيه واثبته صيف وشتا

3- ايه فرق النيتروجين عن الهواء وهيفرق معايا في ايه بالظبط
مع العلم انا معظم قيادتي للعربيه هاديه وفي الأغلب مش بعدي 100 غير نادر جداً جداً ده إذا وصلتلها (حتى لما بعدي ال 100 مش بتخطي ال 125 تقدر تقول معديتش 125 من 2008 غير بتاع 5 - 6 مرات مش أكتر)
انا بوضح الموضوع ده عشان في ناس بتقول ده بيفرق في السرعات (مش عارف صحه الكلام ده ايه) فبالاستخدام اللي بقول عليه ده له لازمه عندي ولا لأ

4- اخيراً بالنسبه لموضوع الكاوتشات ده (ان شاء الله)
مركز بريدجستون ده في سوق الرحاب مش كده ولا انا غلطان ؟
وبعدين هو مش بيخدم غير اطارات بريدجستون ولا اي حاجه مش فارقه يعنى لو رحت بالبريللي اللي عندي عشان يعملو موضوع تدوير العجل وقياس التاكل وضبط الهوا أو ملئ نيتروجين هيعملولي الحاجات دي ولا هما بيعملوا سيرفيس للأطارات البريدجستون بس كنوع من الخدمه لعملائهم
انا بسأل عن المركز ده بالتحديد عشان طالما المهندس سمير بيروح لهم يبقى خلاص خدوا الايزو بالنسبه لي (أصل بصراحه بتوع الكاوتش دول بحس انهم بيعكوا واجهزتهم بايظه وكل واحد بقرايه شكل)

معلش بقى هتقل عليك بحاجه اخيره لو المركز ده مش بيشتغل غير في بريجستون ياريت حضرتك ترشحلى حد تكون بتثق فيه (عشان قرايه ضغط الاطارات عندهم سليمه)
مع العلم ان انا من سكان التجمع الخامس يعني جيران

**khaabas** · 12-05-2013 04:03 AM

المشاركة الأصلية كتبت بواسطة atyam

شغل تمام يا بشمهندس بس سؤال هو ظبط ضغط الاطارات مش بيكون على 30 مش 32؟
انا معايا ار بى وبحط نتروجين وبظبط على 30

لأ على 32

**Samir Elshahawy** · 12-05-2013 10:26 AM

المشاركة الأصلية كتبت بواسطة mhkorayem

شكراً يا هندسه على الاجوبه دي
وبخصوص موضوع تحميل الصور هدخل اجرب كده لحسن الموضوع ده كان معقدني

ياباشا علي العفو و كلنا بنتعلك لسه ...

وقبل ما ندخل في الجد احب اشكر باقي الاعضاء على الاسئله عشان منها اسئله كنت هسالها فعلاً وهما وفروا عليا السؤال ولازم طبعاً أشكر شكر خاص جداً جداً جداً للبشمهندس سمير على سعة صدره ورده على الأسئله وبشكل مفصل وواضح وبلتمس منه العذر لو في حاجه موضحتش ليا عشان المشكله هتبقى في قله خبرتي أنا ( ربنا يصبرك يا هندسه عليا

)
ندخل بقى في المهم ( وهتبقى برضوا الأسئله متعلقة بموضوع الأطارات عشان نقفل الموضوع ده ونركز بعد كده في موضوع تنظيف دوره الوقود)

أنا تحت امرك و الجميع و حضراتكوا اسألوا براحتكم و ربنا يقدرني و يكون عندي الاجابة لتساؤلاتكم

1- (وده سؤال ينطبق على حالتي انا مش سؤال عام)
انا عندي الاطارين الاماميين prielli P1 راكبين من 20.000 كم تقريباً
الاطاريين الخلفيين prielli P4 راكبين من 15.000 كم تقريباً
والاستبن اعتبروا مش موجود (انا سايب واحد من القديم اللي غيرتهم عشان حالات الطوارئ فقط)
دلوقتي حضرتك قلتلي ممكن اعمل عمليه التدوير بشرط يكونوا الاطارات نفس النوع والنقشه
طيب هما هيفرقوا في ايه لما يكونوا نفس النوع والنقشه مش المهم يبقى الاتنين الاماميين نوع واحد والاتنين الخلفيين نوع واحد
طيب ما ده هيحصل حتى بعد عمليه التدوير عشان احنا بنرجع الاتنين الاماميين ورا والاتنين الخلفيين بنطلعهم قدام (زي الصوره اللي حضرتك رافعها) يبقى ايه المشكله في كده

بالظبط كده , أهم حاجة يكون الاثنين اللي قدام زي بعض و الاثنين اللي ورا زي بعض
فيه طرق تانية و كتير للتدوير علي فكرة مش بس اللي أنا شرحتهم و لو حضرتك أتفضلت بالذهاب لمركز خدمة أطارات كويس هايعمل لك الموضوع ده

2- هو ضغط الهواء مش بيختلف على حسب درجه الحراره يعني في الصيف حاجه والشتاء حاجه تانيه. ولا اسيبني من الكلام ده واشوف ايه اللي مكتوب على القايم بتاع العربيه واثبته صيف وشتا

مافيش حاجة في الكتالوج و لا علي الجدول اللي موجود علي القائم الشمال بتقول الكلام ده , الاختلاف في الضغط بيعتمد فقط علي :
- مقاس الاطار
- الحمولة (كلما زادت الحمولة كلما زاد الضغط)

3- ايه فرق النيتروجين عن الهواء وهيفرق معايا في ايه بالظبط
مع العلم انا معظم قيادتي للعربيه هاديه وفي الأغلب مش بعدي 100 غير نادر جداً جداً ده إذا وصلتلها (حتى لما بعدي ال 100 مش بتخطي ال 125 تقدر تقول معديتش 125 من 2008 غير بتاع 5 - 6 مرات مش أكتر)
انا بوضح الموضوع ده عشان في ناس بتقول ده بيفرق في السرعات (مش عارف صحه الكلام ده ايه) فبالاستخدام اللي بقول عليه ده له لازمه عندي ولا لأ

الفرق أن النتروجين يعتبر من الغازات المخمدة DAMPING و لذا بيستخدم في الانظمة الهيدروليكية لتقليل الصدمات و بالتالي تاثيره بيكون علي العفشة اكثر , يمكن مش هاتشعر بفرق كبير مع المطبات لكن فعلا له تأثير

الحاجة الثانية أن النتروجين ليس به بخار ماء مثل الهواء و بالتالي بيحافظ علي مادة الاطار الداخلية و بيقلل من تأكلها

أما موضوع السرعات مالوش علاقة بنوع الغاز المستخدم و لكن له علاقة بنوع الاطار زي ماحضرتك عارف

4- اخيراً بالنسبه لموضوع الكاوتشات ده (ان شاء الله)
مركز بريدجستون ده في سوق الرحاب مش كده ولا انا غلطان ؟
وبعدين هو مش بيخدم غير اطارات بريدجستون ولا اي حاجه مش فارقه يعنى لو رحت بالبريللي اللي عندي عشان يعملو موضوع تدوير العجل وقياس التاكل وضبط الهوا أو ملئ نيتروجين هيعملولي الحاجات دي ولا هما بيعملوا سيرفيس للأطارات البريدجستون بس كنوع من الخدمه لعملائهم
انا بسأل عن المركز ده بالتحديد عشان طالما المهندس سمير بيروح لهم يبقى خلاص خدوا الايزو بالنسبه لي (أصل بصراحه بتوع الكاوتش دول بحس انهم بيعكوا واجهزتهم بايظه وكل واحد بقرايه شكل)

فعلا أنا باتعامل مع بريدجستون الرحاب أو اي مركز بريدجستون لأنهم فاهمين كويس جدا و ثانيا بتحصل علي خصم طالما انك عضو في المنتدي و معاك الاستيكر
و نوع الكاوتش مش بيفرق معاهم و هما علي فكرة موزعين برضه لأنواع تانية مش بس البريدجستون يعني ممكن تلاقي عندهم
كومهو - هانكوك - فايرستون

كمان فيه مركز خدمة أطارات بريللي في السوق بالرحاب قدام بريدجستون بس لم أتعامل معه الصراحة و فيه بسمارك بجانب مركز خدمة رينو و ده برضه كويس جدا

ميزة بريدجستون أنهم فاهمين و عداداتهم مظبوطة

معلش بقى هتقل عليك بحاجه اخيره لو المركز ده مش بيشتغل غير في بريجستون ياريت حضرتك ترشحلى حد تكون بتثق فيه (عشان قرايه ضغط الاطارات عندهم سليمه)
مع العلم ان انا من سكان التجمع الخامس يعني جيران

انا جاوبتك فوق هههههههههه

**Ashraf_Ibrahim** · 12-05-2013 11:14 AM

تقرير رائع يا بشمهندس
ربنا يباركلك فيها يا رب :]

**Kareem Fawzy** · 13-05-2013 01:09 AM

تقرير رائع يا هندسة
ربنا يباركلك فيها ان شاء الله
وعقبال ال 200 الف

**Samir Elshahawy** · 14-05-2013 08:38 PM

المشاركة الأصلية كتبت بواسطة ahmedsho3a3

أنا الأنترا عامله 8000 كيلو و دايمأ أستهلاك البنزين 9.2 /100 كم , أقل حجه جابتها كانت 9 /100 كم
مش عارف ليه كدا ؟!!!!

ده بيعتمد علي :
- طبيعة قيادتك للالنترا
- طبيعة مشاويرك (كلها داخل المدينة و هل فيه زحام مروري و اشارات و توقفات ؟)
و ياريت تقولنا متوسط السرعة المسجلة عندك علي شاشة العربية

**mhkorayem** · 18-05-2013 02:04 AM

شكرا يا بشمهندس سمير على الرد وعلى سعه صدرك
انا فعلاً قمت بعمليه تدوير العجل وتم تنفيذها عند م. هاني في مركز سبيد عشان كنت بظبط العفشه هناك وبركب تيل خلفي فبالمره عملت عملية التدوير
وبما اني جبت سيره تظبيط العفشه لازم اشكر م. هاني عشان العربيه فرقت كتير جداً
والحمد لله خلصت من اصوات الخبط والرزع المتواصله يارب ما اسمعهم تاني
وبعد ما خلصت الشغل عند مهندس هاني تفضل مشكورا ووصفلي مكان اظبط فيه زوايا هو بيتعامل معاه وبيثق فيهم (بنزينه كالتكس جسر السويس امام حديقة بدر) وكلمهم بنفسه ووصاهم على الشغل والحمد لله تمت العمليه وسلموني تقرير فيه نسب وحاجات كتير مش فاهم منه حاجه بس ان شاء الله هيكون الشغل كويس
بعد ظبط الزوايا قلت بقى بجمله المصاريف نجرب بقى موضوع النيتروجين ده فغيرت للنيتروجين بدل الهوا وظبطه على 30 زي اللي مكتوب على قايم الباب
طلعت على الدائري في طريقي للبيت لقيت الدركسيون بيرج جامد فوق ال 90 وانت طالع قلت بالمره اروح ارصص قبل ما أروح رحت داخل على مدينه نصر ورحت رصصت عند اولاد نصار اللي في مصطفى النحاس
وانا راجع على التجمع قلت اجرب اشوف ايه الاخبار والحمد لله العربيه وصلت لحد 125 وتمام جداً مفيش اي رجه في الدركسيون
بس كل ده ونسيت اجرب اسيب الدركسيون واشوف في حدفه ولا لأ بس هجرب الموضوع ده ان شاء الله
بخصوص بقى الكشف على معدل التاكل بصراحه قلت ملهوش لازمه دلوقتي لان الكاوتش عندي عامل من 15000 الى 20000 كم يعني مش قديم اوي فمش محتاج اشيك عليه
بخصوص بقى موضوع تنظيف دوره الوقود
نصيحه المهندس هاني ليه كانت باضافه منظف ليكوي مولي هو قالي هتلاقيه في شارع دمشق بس للاسف انا مش رايح هناك قريب ودورت عليه في كذا مكان مش لاقيه
والمنظف اللي انت حاطط صورته برضوا ماشوفتهوش
فايه البدايل الي ممكن تكون متوفره وعلى نفس المستوي عشان انا لقيت حاجات كتير زي (اس تي بي - ايه سي ديلكو - وفي نوع الماني برضوا بس مش فاكر اسموا بصراحه) وحاجات كتير كده مش عارف ايه الحلو وايه الوحش فيهم
وبما اننا اتكلمنا عن المنظفات فان شاء الله هحاول اجيب فلاش ليكوي مولي عشان اضيفه مع الزيت في تغير الزيت الجاي بس برضوا لو ملاقيتهوش في ايه كويس ممكن استخدمه

-

الموضوع: تقرير مصور لصيانة ال 40,000 كم للألنترا md (الجزء الثاني : الاطارات و الوقود)

LinkBack

أدوات الموضوع

عرض

-

-

-

-

-

-

المواضيع المتشابهه

تقرير مصور لصيانة 40,000 كم للألنترا md (الجزء الاول : المطار الكوري)

تقرير مصور لصيانة 40000 كم لالنترا 2008 خليجى مانيوال

تقرير مصور لصيانة 50000 كم للالنترا 2007 وكيل اتوماتيك

تقرير مصور لاستهلاك الوقود في البيرسونا 2012

تقرير مصور لصيانة الشاهين 1400 سي سي

الكلمات الدلالية لهذا الموضوع

المفضلات

المفضلات

ضوابط المشاركة