الموضوع: اللي بيفهم في أسعار الدهب و الدولار

هو دهب حضرتك جنيهات ؟ حضرتك عارفة انك حتخسري الضريبة ؟
بصي للمستقبل ولاي حد من الاعضاء ناوي ، في اربع صور من الاحتفاظ بالدهب كقيمة ولازم تعرفوا الكلمتين دول كويس علشان متخسروش بدل ما تكسبوا:

1- مشغولات ذهبية ودي اسوأ شيئ علشان عليها ضريبة ومصنعية
2- الجنيهات الدهب ودي عليها ضريبة اولا ، وثانيا المصري منها مش بيتباع بره مصر ، والانجليزي نادر جدا ولازم توصي عليه جواهرجي معرفة
3- السبايك ال 32 جرام الانجليزي ودي برضه عليها ضريبة بس اي حد بياخدها جوه وبره مصر
4- كسر الدهب وده لا عليه مصناعية ولا ضريبة يعني لو اشتريتيه بالف جنيه النهاردة ، تبيعيه بعد ساعة بالف جنيه ، عيبه انك حتلفي عليه شوية لو عاوزة كمية كبيرة ، وده عبارة عن مصوغات بايظة يعني فردة حلق من غير اختها غويشة مكسورة سلسة مقطوعة وهكذا وعليه صعب تلاقي 300 جرام مثلا في محل واحدبتضطري تلفي الصاغة محل محل علشان تلمي ال 300 جرام اللي انت عاوزاهم ، انما هي افضل مخزن للقيمة على الاطلاق علشان مفيش اي فاقد ملوش لازمة كضريبة ومصنعية

واذكركم ونفسي ان الدهب بغرض الاستثمار عليه زكاة