[TEST DRIVE : SEAT 133
1980 (عدد الكيلو مترات=مجهول) سعة المحرك =كباية ونص..آآآآ...قصدي 850 :mrgreen:
واكيد مانوال..(بتبص على ايه؟؟)

نظرة اولى :shock: :
ابص على ايه واللا ايه....ايه الحلاوة دي؟؟ انت لسة عايشة ازاي والنبي :D السيارة كانت بحالة جيدة بالرغم من مرور ربع قرن على وجودها...و يبدو ان الصاج فعلا متين بدليل بقاء عدد لابأس به منها حتى يومنا هذا...الكاوتش كان جديد والعربية مجددة من الخارج بالكامل..و كنت خايف الصراحة ان حد يشوفني باعمل العملة المهببة دي...لاحسن يبطلوا يدوني عربياتهم اجربها :mrgreen:

العربية قصيرة كده و زعبللة جدا..تحس انها صرصار كده...ولاتقلق من انها تحك في مطبات المحروسة..لأن الأربع عجلات بيطلعوا على المطب بالتتابع...وماظنش ان العربية من تحت فيها حاجة مهمة تخاف عليها من الحك :mrgreen: (اللي مكتوب ده اذا عدت المطب من اساسه :D )

من الداخل...اول ماتفتح الباب تصاب بنفس حالة الذهول اللي جاتلي في تجربة BMW 530i وان كان الاحساس هنا مختلف كليا و جذريا و تحس انك في منتهى التواضع والخضوع (ليها تاثير روحاني غريب على السائق)..و تحس انك راجل زي غاندي كده و احساس عالي بالرضا والقناعة....
انت بتبصلها كده ليه؟؟؟ زعق صاحبي...لو قرفان قوي كده ياخويا اطلع نام و متقرفناش!!!...ابتسمت لصاحبي و مراعاة لحالته النفسية مزعلتش منه (كان في الأساس جايلى علشان هوة ظببط كل حاجة في العربية و هية برضه مش عايزة تجيب الرابع)
ما يمكن مفيهاش رابع يا حسن؟؟...بصللي بصة مش ولابد...خفت و ركبت....دور...دور تانى...طب تالت كده....كارك..مش فاكر قعدنا قد ايه بس كللت المحاولة بالنجاح...زئير الموتور(اللى مهتمتش ابص عليه) يوحي بالعظمة وانها 8500سي سي مش 850....الفيس مجهوال المعالم و المسارات كده بالبركة...الكرسي كرسي حمام تقريبا و اطي كتير(و على ما يبدو ان ده اللي بيديها الطابع الرياضي المميز)بما ان هية عربية سبور بابين بس :D
التابلوه مفيهوش اي حاجة شغالة اللا عداد السرعة و ده اوبشن هايل في ظل اللي كنا فيه...و قرايته سليمة( تقريبا)...و تحس ان كل حاجة في متناول ايديك:الدريكسيون والتابلوه...حتي صاحبي كنت حاسس انه قاعد على حجري :mrgreen: ولأني طويل موت...جالي قتب من القعدة :D

الأداء:
الفرامل هايلة...الشاب كان مظبتها فعلا كويس...بس تقريبا كانت قدام بس..لأن العربية زي ما تكون هتتقلب على بوزها :mrgreen:
مفيش حاجة اسمها تسارع والكلام اللي بنقعد نقوله ده...اهي ماشية والسلام...الموتور بيبذل مجهود جبار و يصدر اصوات مش مفهومة..واصوات مفرقعات...كل ده علشان تكون على 50 مثلا...تعطيك السيارة احساس بالرعب وسط الطريق(احساس كأنك قالب جردل علي وشه و قاعد عليه وسط صلاح سالم ساعة زحمة :D ) احساس رهيب بالوحدة والقهر و الظلم من جميع السارات اللي في الشارع...حتى اللي في 128 بيبصلك بمنتهى الالاطة..(آل يعني هوة اللي راكب عجبة!!)

اختبار التسارع:حققت السيارة نجاحا ملحوظا و وصلت من0 ال60 في ساعة الا ربع...(مع ملاحظة انها كانت في منزل كوبري :mrgreen: ) واول في تاني في تالت و هوب....الرابع اخيرا.(انهت العربية الاختبار بنفسها عند سرعة100)...حسن بكى من الفرحة و مكانش مصدق من الفرحة والدموع في عينه زي الاطفال ان العربية ربنا كرمها و اتحلت عقدتها و جابت الرابع اخيرا...(و ماخبيش عليكم..انني جبت الرابع بحكم العادة وكنت واثق ان مفيهاش اصلا!!) وطبعا انا طماع جدا..كبست على العربية زيادة 80...90...100 و حسن عمال يقول: الله اكبر...ظهر الحق....عليا الطلاق بالتلاتة...و كلام كبير قوي كده مكنتش سامعه علشان صوت الموتور..والناس في اللي في العربيات اللي حوالينا ميتين على نفسهم من الضحك...ولم يعكر صفو هذه اللحظة النادرة الا صوت:

بوووووووووووووووووووووووو ووووووووووووووووووووووووو وووووم!!

والاقى عصاية الفتيس اتسحبت من ايدي و اختفت بحركة سحرية مذهلة...و دخان و ريحة شياط طلعت من الموتور...و حاجات كتير وقعت من العربية على بعد 200 متر ورا العربية....و حسن مفيش على لسانه اللا:الله يخرب بيتك يازيزو!!

بالنسبة للعفشة والتعليق....لاتعليق

نقطة حلوة..:سهولة القيادة..كأنك ماشي على رجليك مش فارقة

الحماية: اذا استثنينا فرض ان العربية ممكن تتعرض للدهس من العربيات التانية و انك ماشي على 40 في الشارع لوحدك يبقى 100 100 و هتوصل سليم :mrgreen: :mrgreen:

نصائح: ممكن تزويد السيارة بعلبة بنادول او اسبرين...وسدادات للودن كمان...ازالة غطاء الكبوت بدلا من سنده بالخشبة :D

بدائل في نفس الفئة: المواصلات العامة والمشي والعجلة بديل في فئة اعلى

الخلاصة: سيارة انتهى عصرها تماما و ادت الغرض المطلوب منها ايام جدي و جدك :mrgreen:

ملاحظة: هذه التجربة و ماورد فيها ليست دعوة للسخرية من ملاكها اطلاقا..ولهم مني كل احترام..وما ورد فيها على سبيل الطرافة و الضحك...و ليس لتقليل شأن احد ايا كان...و حسن بيسلم عليكوا و بيقول: يا باسط :mrgreen: :mrgreen:[/size]