رائحة عادم عند تشغيل التكييف

**grandfox** · 14-05-2013 11:37 PM

السلام عليكم اصدقائى الاعزاء

من يومين روحت شحنت التكييف والراجل قالى يابيه الكباس ده عفى على الموتور ما انتو عارفين موتورى 1000 سى سى
ولما سألته افضل طريقة اشغل بيها التكييف كنت فاكره فاهم طلع كالعادة كفتجى Bravo
قالى ذى ما انا ظابطهولك اللى هو ايه؟
مشغل الحرارة على Lo والمروحة على 5 قبل الاخر بسنة وعامل ايه بقى مشغل ال refresh وده بيخلى خرج الهواء شديد لأنه بسحب الهواء من الصالون مش من بره
المهم قولتله بس كده غلط
طبعا بصلى على اساس انى لامو اخذه حمار وهو ابو العريف
قولتله المفروض الواحد ما يمشيش فترة على وضع ال refresh ده
قالى يا بيه انت جبت الكلام ده منين .قولتله المانوال بتاع العربية
قالى المانوال بأستغراب ؟ قولتله الكتالوج
قالى لأ الكلام ده غلط . قولتله ده الكتالوج . قالى ماهما بيقولولك كده عشان يبوظ وتروح تغير بجديد وتدفع فى التوكيل 018A1D~146
على اساس انى هكدب المانوال وهصدقه هو
الخلاصة
بقيت اشم دخان العادم لما بشغل التكييف وخصوصا وانا واقف لكن لما بمشى الريحة بتختفى
قولت يمكن من العربيات اللى بتبقى قدامى
روحت رايح فى حتة فاضية ما فيهاش ولا عربية. ووقفت برضه شميت ريحة العادم
تفتكروا ايه السبب؟

**SYD** · 15-05-2013 01:03 AM

بص يا دكتور
اولا هتتشيك علي الشكمان عندك (الافيز والجلبة بتاعته)
ثانيا محتمل زرار غلق فتحات الfresh air يكون معلق - وبالتالي مش بتقفل - راجع عليها
ثالثا العزل الداخلي وعزل الحوض واي فتحات في الحوض - راجع عليهم كويس

وان شاء الله مشكلتك تتحل

تحياتي

**ehab_mansour** · 15-05-2013 10:03 AM

السلام عليكم
أحمد بيه بما اني معايا نفس العربية فحابب اقولك ان فعلا كباس الكوردوبا قوي و كبير و ده السبب اللي بيخلي تكيفها قوي و ثلاجة فعلا و لكن هو فعلا بيتقل العربية زي أي تكييف لما بيشتغل و لكن العربية بتكون عادية سواء شغال او لأ يعني ريحة العادم اللي بتشمها دي سببها ان حرق العربية مش مضبوط يعني فيه عندك خلل معين في المحرك و لكن مش بتحسه غير مع التكييف عشان هو بيعمل حمل زايد علي المحرك و خاصة كهربيا

استنتاجي الشخصي :-
مع تشغيل التكييف العربية بيشتغل فيها زيادة شوية حاجات (البلاور الداخلي + مراوح التبريد + كويل كباس التكييف ) دي احمال كهربية + الكباس نفسه عشن يكبس الفريون و ده حمل ميكانيكي >>>>> مقابل ده الكنترول بيرفع عدد لفات الموتور من 750 الي 800 في الطبيعي الي 1100 الي 1200 مع التكيف و اللي بينزلو الي 900 مع الأحمال السابقة

المهم ان كل حاجه كهرباء عندك محتاجه شوية تظبيط و مراجعة زي وصلات البطارية - وصلات الأرضي كلها في الحوض - دائرة كهرباء المحرك(اسبراتير كامل - اسلاك بوجيهات - البوجيهات ) - وصلات الفيوزات اللي فوق البطارية
لأن اللي متوقعه ان مع احمال التكييف عندك بيحصل فقد للاشعال misfire في بعض الاوقات و بيخرج عادم ني و بالتالي بتشم ريحة العادم اللي بتقول عليها

ده توقعي و محتمل يكون فيه شيء تاني الله اعلم