وش السلندر دا غطاء معدنى (يعتبر جزء من الموتور) وبيكون جزء علوى بيتربط بمسامير حوالى 6 او8 على ما اعتقد وبيمثل حوالى 25% من حجم الموتور والجزء دا بيكون اعلى الموتور فوق السلندرات (4 سلندر) ومن كدا اسمة وش السلندر
المهم من وصفة التقريبى دا انه عشان يتربط مع الموتور بيتحط بينة وبين جسم الموتور جوان
الجوان دا بعمل فاصل بين الاتى :
1- كبس البساتم (فراغات السلندرات)
2- دورة مياة التبريد (فتحات بتمشى فيها مياه التبريد)
3- دورة الزيت (فتحات بتدور فيها دورة الزيت)

المهم فى الموضوع لو درجة حرارة الموتور زادت عن الحد الطبيعى نتيجة قصور فى دورة التبريد (مروحة الريدياتير عطلت مثلا - مياه التبريد نقصت ومخدش بالك) ومشيت بيها فترة الجوان دا بيتحمص وبتتحرق حوافة الدخلية (مش شرط من اول مرة ترتفع فيها الحرارة ممكن مناول مرة او بعد 10 مرات )
المهم بيحصل تسريبات فى الاجزاء الثلاثة :

- اما دورة المياه تختلط مع دورة الزيت (زيت يدخل الى القربة او العكس مياه تدخل مع زيت الموتور وبتعمل طحينة)

-اما دورة المياة تختلط مع كبس البساتم ودا يؤدى الى ارتفاع درجة حرارة الموتور وتبخر المياه وتخرج مع العادم
والحالة الاخيرة بتظهر علاماتها لو انت دورت السيارة وهى باردة وفتحت غطاء القربة لقيت المياه بتفور وتخرج منها ولو شفت الشكمان بعد مشوار طويل لقيته بيجيب مياه كتيرة

وفى الحالتين تحس ان سخونة الموتور اكبر من المعتاد

الحل :

يتم فك وش السلندر والكشف علية لو حصلة تفقيع يتم تسويتة عند الخراط وتركيب جوان جديد
فى حالة حدوثها اكثر من مرة واتساوى اكثر من مرة يتم معادلة مقدار القشط الكبير دا بتركيب 2 جوان
بعد كدا تشترى وش سلندر جديد
تكلفة تغيير الجوان من 80 الى 120 جنية حسب سعر الجوان بالمصنعية
بس خلاص دا اللى اعرفة والله اعلم