الموضوع: ضرورى جدا .. ياريت الدخول لكل حاجزى الاليزيه للاهمية

بص الكلام الى حقول مش عشان اقنعك بالعربيه ابدا
صوت الموتور زيرو لعربيه بارده فى مكان مقفول لزم يكون عالي
الابواب للعربيات الزيزو كلها تقيله و لزم تتقفل جامد فى الغالب عشان لسه الكوتش مريحش
التكيف مش ممكن تحكم عليه فى عربيه لسه مدورها و وقفه مكانها
فكك من كلام اى بتاع سيلز حتى لو صحبك مع كام احترامى عشان طريقه التفكير بتتختلف من الى بيبيع و الى بيشترى
انا لسه شارى فيات نيو جراند بونتو و مسمعتش كلام اى حد من بتوع السيلز و دورت على النت لحد ما اقتنعت

خد وقتك فى التفكير و استخير ربنا و ان شاء الله بالتوفيق لما فيه الخير

المخاطرة كبيرة اكيد طبعا عشان العربية لسة جديدة.
بس انا لما بقارن ما بين الاليزيه ونسيان صني على سبيل المثال (اللي ناس كتير بتواجهم بعض المشاكل فيها بسبب التقفيل اللي مش اد كده) عشان تقريبا هما نفس الفئة السعرية والحجم بحس اني وانا مغمض الاليزيه تكسب بدون تفكير كتير.
بالنسبة لصوت الموتور اعتقد انها عشان في مكان مقفول .. ولو اني لما دورتها في فرع العجوزة كان الصوت معقول جدا.
العربية بصراحة مغرية جدا .. مواصفات مقابل سعر .. شكل وفخامة مقارنة بعربيات كتير.
انا متفق معاك على موضوع التكييف ده .. حاسيته برده ضعيف .. بس انا مكملتش دقيقة وانا فاتحه وقفلته على طول فمش هاقدر اقيمه.
اللي ممكن يقلق اذا كان التوكيل عنده القدرة على حل المشاكل اللي ممكن تظهر ولو ان اخونا احمد عادل بيقول ان المعاملة في سيتروين مختلفة عن المعاملة في بروتون والدنيا مش سودة اوي والمشاكل بتتحل.
وانا والله اعلم بقول ان الكمال لله وحده ومفيش حاجة 100 في 100 هترضي رغبات الانسان .. الواحد بيقارن مميزات وعيوب الحاجة المقبل على شراءها وبعدين يقرر.
والاستخارة والاستشارة مفيش احسن منها في المواقف اللي زي دي.
والله المستعان

المشاركة الأصلية كتبت بواسطة mahmoudhanfe

السلام عليكم
يارب تكونوا بخير ,, وفى احسن حال

انا انهاردة كنت فى فرع عز العرب كارفور - الاسكندرية

لان فى كام حاجة كدة كنت عايز اشوفها واتاكد منها وكمان اشوف ايه نظام التسليم

كان بعض الاخوة استفسروا على الالوان ومواعيد التسليم

بالنسبة للالوان .. مفيش الوان غير الاسود والسيلفر والفيرانى حاليا ودول اللى بيتحجز عليهم

بالنسبة للتسليم .. قالولى ان مفيش اى حد استلم حتى هذه اللحظة وهما بيعملوا توزيعة التسليم ,, ويبقى الحال كما هو عليه الدفعة الاولى حتتسلم والدفعة التانية نص 6

تمام واللي عرفته كمان ان الدفعه الاولي معظمها هتتسلم فالقاهره مش ف اسكندريه

.................................................. .....

اللى انا عايز اقولوه بقى

اولا : انا حاجز مع استاذة ايناس ,, وهى بجد شخصية محترمة جدا وخدومة جدا جدا وفى منتهى الذوق


بس اللى انا حسيته بكل عام .. ان الناس اللى شغالة فى التوكيل معندهومش اى معلومات ,, وهما حافظين بعض الكلمات بيردوا بيها على كل الاسئلة ..

نفس احساسي برضه بص بصراحه انا سألت علي نظام التعليق ومدير الفرع مكنش عارف بس قالي 5 دقايق هسألك قسم الصيانه وفعلا اقل من 5 دقايق ولقيته بيتصل بيا وجاوب سؤالي

بالنسبة للعربية

طبعا العربية فخمة جدا .. وواسعة بكل مش طبيعى ,, طبعا وركبتها ,, مريحة جدا واحساس عالى بصراحة ,, تحس انك فعلا راكب عربية .. والكراسي رائعة

العربيه نفس فئه الرينو فلوانس في الفخامه ومن جوه واسعه جدا وتابلوه شيك اوي

بس الامانة تخلينى اقول كام نقطة مهمة .. لان بجد فى ناس بتاخد قرار الشراء على اساس التقيمات بتعاتنا فى المنتدى هنا وده انا شوفته بعينى ,,

انا حتكلم على كل اللى شوفته والتجربة كاملة بكل امانة برغم من حبى للعربية

اولا : انا طلبت من انى ادور العربية ,, وطبعا جابولى المفتاح وقالولى اركب ودور ,, فطلبت انهم يدوروها هما ,, فقالولى اركب فى الكرسى اللى جنب السواق ,, فقولتلهم ,, لا عشان عايز اسمع صوت الموتور وهى بتدور

طبعا :: صوت الموتور كان عالى بشكل مفزع بجد ,, كان عالى جدا فطبعا قالولى اركب مش حتسمع الصوت ,, وبالفعل ركبت ,, الصوت يكاد يكون منعدم والعزل جيد جدا جدا ,, ومش حتحس بيه
قمت فتحت الازاز ,, سمعته بس برده صوتوه هادى ولكن مسموع

فعلا وانا جوه العربيه مفيش صوت نهائي حتي وانا مشغل التكييف وده يدل علي العزل الجيد جدا , وفعلا كان صوت الموتور وانا بره العربيه مسموع والي حد ما عالي , بس انا قلت برضه يمكن عشان المكان هادي ومتقفل كله فأكيد الصوت هيبقي عالي , زي صوت عربيتي وانا جوه الجراج بيقي غير فالشارع اكيد

وديه كانت اول مرة اسمع صوت الموتور وانا برة العربية وكانت مفاجاة بالنسبالى الصراحة

المهم ,, انا قولت فى نفسى ,, يمكن عان المكان مقفول وازاز ورخام وكدة الصوت باين عالى


ثانيا : والعربية دايرة طلبت انهم يفتحولى الكبوت

وديه برده كانت اول مرة افتح الكبوت والعربية دايرة

خدوا بقى الصدمة زى ما انا اتصدمت ::

الموتور بيترعش رعشة شديدة جدا ,, هى مش مأثرة على العربية ولا تحس بالهزة وانت راكب ,, بس الواقع الفعلى ان الموتور بيترعش بغباوة لا تصدق


ياريت حد يفيدنا ف موضوع رعشه الموتور ده عشان انا مفتحتش الكبوت وهيا دايره ومعرفش يارتي ده الطبيعي ان الموتور يترعش جامد ولا ايه؟؟؟ انا اعرف انه ممكن يتهز عادي بش مش رعشه جامده يعني وطالما ان الأهتزاز لا يصل لجسم العربيه فأعتقد ان ده طبيعي ... بس ياريت حد يفيدنا اكتر برضه
بصراحة لحد هنا وجالى اكتئاب

( المشكلة انى متعقد من حكاية صوت الموتور و الرعشة ديه ,, لانى فى عربيتى غيرت تقريبا الكامة باللى فيها بالشواكيش بالكوستبانات وطقم رشاشات و3 قواعد عشان م عايز الرعة ديه فى الموتور ,, لحد ما اتظبط)


ثالثا : كان اخويا zooma2009 الىل متحمس للعربية اكتر منى ,, كان ذكر ملاحظة على التكييف
وكان موصينى اجربه

ربنا يخليك ويشرفني طبعا واحنا هنا كلنا فالمنتدي اخوات وكلنا عايزين نفيد بعض اكيد :s_thum1[1]:
المهم ركبت وجربت التكييف ,, ويارتنى ما جربت ,, اسقع حاجة وعلى اعلى سرعة ,, كأنك مشغلتوش اصلا
ضعييييف لابعد الحدود ,, م شحتسمع بس غير صوت المراوح بتاعت التكييف لما تعليه ,, وللامانة حسييت انه بيسقع بس مع اعلى درجة

نفس احساسي انه مش قوي اوي ... بس برضه زي منت قولت في عربيات بيفرق فيها التكييف وهيا واقفه عن وهيا بتجري .. ويمكن برضه عشان المكان مقفول او العربيه لسه زيرو ..... نفس اعرف تقييمها فعلا فالشارع والشمس والجري

ممكن التكييف يكون مش ديه طريقة تقييمه وانه لازم يفضل مدة شغال شوية عشان يبتدى يسقع ,, وممكن كمان العربية تكون ماشية وانها وهى واقفة مش بيدى كامل طاقته


بس انا بحكى الواقع اللى انا شوفته

رابعا : كان اخويا الجنرال برده اتكلم فى نقطة مهمة ,, وهى ان الباب خفيف جدا ولازم ترزعه عشان يقفل

الحقيقة فعلا انه خفيف ,, ولازم تقرص شوية بقوة عشان يقفل

الباب فعلا لازم تقفله جامد بس يمكن عشان جديد , بالاضافه ان في عربيات هوا نظامها كده زي الاوكتافيا مثلا a4 كانت لازم تتهبد عشان تقفل

لكن الشبكة كويسة مفيهاش مشاكل ومش ضعيفة خالص

بصراحه الشبكه والصاج والأكصدامات تحسها قويه ومحمله وتقفيلها ممتاز

كل اللى فات ده مفيهوش اى مشكلة ,, المصيبة جاية فى السكة

نفسى اتسدت بصراحة ,, وقمت طالع على كارفور اشترى شوية حاجات
والحظ انى ركنت العربية قدام معرض الطارق للسيارات ,, وقولت ادخل من مدخل الطارق وبالمرة ابص على العربيات اللى عنده وانا معدى

المهم قابلت واحد صاحبى شغال جوه ,, وقعدت اتكلم معاه شوية لحد م الكلام جاب بعضه وقولتلوه انى حجزت الاليزيه

المهم ,, نفس الكلام اللى انتوا عارفينوه بتاع قطع الغيار والسعر والموال الحامض ده .. بس قال كلمة حرقت دمى بصراحة ,,

قالى "" عربية وكيلها مش عارف يجيبها ,, حيبجيب وحيوفر قطع غيارها ازاى ""

ده العادي لأن التوكيل مستني يجيب موديل 2014 ودي ميزه حلوه جدا انك تركب عربيه قبل موديلها بسنه كامله

المهم قولتلوه طيب قولى انت اجيب ايه فى رينج سعر 120

قالى الريو

واخدنى يفرجنى عليها ,, فقولتلوه بص انا عارفها وحافظها ,, دورهالى بس ,, قالى ما هى دايرة

العربية بينى وبينها مترين و مكنتش سامعلها صوت ,, قولتلوه افتح الكبوت وهى دايرة

ده جوا المعرض ولا بره؟؟

طبعا فتحه والموتور هادي جدا ثابت فى مكانه مفيش رعشة ,, صوته هادي جدا وانت فاتح الكبوت

طبعا انا مش حركب كورى ,, ومن اكبر اسباب اختيارى للاليزيه انها اوربى ومحترمة ومالية مركزها ,, بس المقارنة على الطبيعة ,, خلتنى اتقفلت جدا بصراحة

المهم بقى

انا بعد ما كنت مقتنع 200 % ابتديت ,, اتهز ورايي ,, وحساس انى بدأت اعيد تفكير ,, بسبب الحاجات اللى قولتها

انا بجد مش عارف اعمل ايه ,, وياريت جميع الاخوة اللى حاجزين العربية واللى افوها وجربوها يفيدونى بالرأى لانى اصبحت محتار جدا

ياريت نعمل مناقشة مفتوحة هنا لحد ما نوصل لقرار ,, طبعا كلنا عارفين اننا بناخد ريسك ومخاطرة عالية بقررار شراء عربية لسة متجربتش فى مقابل انها عربية اوربى على طراز العربيات الاوربى الفخمة اللى معظمنا عارفها ومجربها ,, فياريت نساعد بعض لاقصى درجة عشان نوصل لافضل قرار

اكيد احنا مع بعض لحد منوصل لحل سواء اليزيه او 301 او غيرها .... ان شاء الله خير