الموضوع: فين ممكن أشتكي مستشفى؟

السلام عليكم ورحمة الله وبركاته
كنت محتاج نصيحتكم بخصوص موقف سخيف متعرض له.
زوجتي أجرت عملية في عينيها في أحد المستشفيات الشهيرة عند واحد من أشهر الأطباء في مصر.
كنا رحنا للدكتور العيادة ورفض يتكلم في الفلوس لكن عمل لنا جواب للمستشفى اللي بيشتغل فيها - واللي عرفت فيما بعد إنه شريك فيها-وهناك قالولنا التكلفة وتمت العملية بحمد الله.
بعد العملية أخدت فاتورة من المستشفى ولما جيت أقدمها في شغلي لاسترداد المبلغ من التأمين الصحي اللي انا تابع له اعترضوا عليها بسبب إن التكلفة اللي مكتوبة في الفاتورة مكتوب "تكلفة شاملة مبلغ كذا". طلبوا إن التكلفة تكون مفصلة واضح فيها أجر الطبيب والمستلزمات والتخدير وخلافه.
لما رجعت المستشفى رفضوا بشدة ولا التعديل ولا حتى إنهم يقولولي شفوي. واضح طبعاً إنهم بيحموا الطبيب من إنه يتعرض ضريبياً لخطر معرفة أجره كام.
حاولت بكل الطرق الودية وفشلت إني أجيب المعلومة ولو شفوياً وإني أوصلها للتأمين الصحي اللي انا تابع ليه.
رجعت أحاول مع التأمين تاني لغاية ما جالي رفض نهائي على الطلب.
كلمت حماية المستهلك وقالولي إني من حقي الفاتورة التفصيلية والنهاردة قمت بالفعل بعمل شكوى عن طريقهم.
انا بصراحة مش متفائل أوي إن حماية المستهلك يجيبلي حقي. فكنت عاوز نصيحتكم بخصوص طرق التصعيد الفعالة التانية اللي ممكن أعملها.
هل ممكن أشتكي المستشفى في الضرايب؟ طب أروح فين بالظبط وأقول إيه؟
هل فيه جهة في وزارة الصحة بتختص بالرقابة الادارية على المستشفيات ممكن أشتكي فيها؟
هل أروح لمحامي؟
بصراحة المبلغ كبير، وإحساسي إني اتضحك عليا مضايقني بشدة.

في انتظار نصائحكم القيمة

ههههههه بتفكرنى لما روحت مستشفى مصر الدوله مستشفى اقل ما يقال عليها بنت حرميه روحت عملت فيها عمليه رباط صليبى مع دكتور احمد عبد العزيز قعد فى المستشفى يوم واحد دفعت 12 الف جنيه روحت بعت الفتورة للنقابه قالت لى عاوز فتورة تفصيلية روحت جبت فاتورة لقين 190 اشاعه على الساعد و180 اشاعة على الكتف وانا رايح اعمل عمليه فى ركبتى شوف الكذب دة طبعاً غير الادوية وطبعاً انا مش دكتور مش فاهم حاجة بس العيب مش عليهم العيب على الدكتور اللى ودانى هناك الحمد لله على كل شىء