ورشة اصلاح السائق المصري

بما اننا في ورشة اصلاح السيارات فقولت الاولي من اصلاح السيارة هي اصلاح سائقها اولا
دة شوية حاجات بسيطة وسهلة ومش مكلفة

1- حط كيس بلاستيك صغير علي الدواسة خلف كرسي السائق واربطة وكل متحب ترمي حاجة ارميها في الكيس واربطة تاني
مش عارف ايه تبرير او ثقافة ان الواحد يرمي الزبالة في الشارع
تجد اللي يرمي كانز البيبسي وده صفيح بتعور حد لو ماشي بشبشب او اللي يرمي الازازة الزجاج بتاعت شويبس طاب مما الازاز دة هيعور الناس اللي ماشية وهيعور القطط والكلاب اللي احنا بنمشي بيها وهيخرم كاوتشات العربيات وهيعور اللي ماشي بشبشب شوف التصرف البسيط بتاع رمي الازازة عمل ايه ياراجل دة انت مؤذي بحالة مرضية تخليك تصعب عليا وتلاقي اللي بياكل لب ويرمية في الشارع واللي يرمي اكياس السندوتشات و الشبسي في الشارع دة في ناس كيفها ترمي الحاجة من فتحة سقف العربية يحسسك انة بيلعب باسكت بول
وبعدين نقول البلد زبالة الحكومة فاشلة لا ياراجل العيب علينا احنا
في اية ابسط من كيس صغير بتحطة في العربية وترمي في حاجتك وتربط الكيس تاني وعلي اخر الاسبوع ارمي الكيس في الزبالة وهات واحد تاني

وما اكثر الاكياس في بيتنا


2- تجد اللي بيمشي يزمر علي طول طاب يعني لما يكون الطريق واقف وانت تزمر هنترعب مثلا وهنوسعلك ويا سلام لو برنس لما يعلق ايدة علي الزمارة يا مامي خلي يعدي اصل ركبي بتخبط في بعضها نفسي افهم مفهومه ايه عن الزمارة ولا اللي يقف تحت بيته ويزمر لاهلة ولا لواحد صاحبة اية ياابني الثقافة ده دة انت تلاقيك صحيت الناس من نومها ولة في بيبي نايم هيصحي يعيط ولو في واحد مريض نايم هتصحيه ولو واحد بيصلي هيدعي عليك وهتخلية يشتت انتباهه
لما واحد يقف بعربيتة وتزمرلة انت بتزمر ليه اصلا امال الاختراع اللي معمول بتاع ترعيشة النور ( تقلب النور ) دة معمول ليه
معقولة كل الحاجات ده هتحصل من الزمارة اه يا خويا امال انت فاكر صاحبك بس اللي بيسمعها

3- تجد اللي بيقعد علي عربيات الناس يابني انت عارف انك مرة في مرة الصاج هيشقق ويطبق وهيتصلح بالاف الجنيهات اللي انت اصلا مش لاقي المئات مش الالافات طاب تحب حد يقعد علي عربيتك يا عم متجيب منديل واقعد علي الرصيف حد قالك ان عربيات الناس دة الرست بتاعتك
شوفت انت كلفت الناس فلوس كتير بقعدتك علي العربية 5 دقائق ماهو مش انت بس اللي بتقعد

4- تجد اللي يمشي في شارع رايح جاي ومشغل النور العالي الناس تقوله يابني اقفل نورك يقولك ما شوفش مثلا ما هو يا ذكي نورك ده ضارب في اللي جاي في وشك فلو نظره ضعيف هيخش فيك انت يا مغفل طاب تخيل انها ممكن تكون واحدة ست وبسبب النور دة تخش في عربية راكنة ويكون طفلها الصغير جبنها ويقع في الدواسة او يخبط في الازاز او واحد كبير في السن عندوا الضغط او السكر وبالحركة دة جاتلة نوبة ضغط او سكر
طاب يا اخي الحل بسيط اقفل العالي ولو مش شايف رعش بالنور علي فترات متقطعة

5- تجد اللي معاه جركن زيت ولا بنزين ومش عايزهم ويقوم راميهم في الشارع ماهو يا ابني العربيات هتتزحلق وممكن تخبط واحد ماشي تموته او تعمله شلل يقعد طول عمره مشلول او تخبط ام امام طفلها او العكس والناس تقعد تدفع في فلوس وعلاج عشان حتت الزيت المعفنين بتوعك
ياعم ماتيجي عند اي بلاعة وارميهم فيها وما اكثر بالاعاتنا

يا جدعان فكروا

استخدموا الشئ اللي ربنا وهبنا اياه وميزنا به عن الحيوانات استخدموا عقولكم

والله العظيم المخ بيشتغل ببلاش لا محتاج بنزين ولا كهرباء ولا غاز طبيعي يعني مش هيكلفك فلوس وده عن تجربة وعلي ضمانتي جرب كده وهتدعيلي

وخلي بالكوا عشان محدش يقول محذرناش الحكومة هتحط ضرائب علي استخدام المخ بعد كده بس دة بيني وبينكم مش عايزين تسييح يعني

وانا من موقعي هذا باعلنلكوا جرب صلح نفسك اسبوع لو معجبكش الحال روح ورشة تانية

بادروا بالحجز الاماكن محدودة
علي فكره كل السلوكيات الخاطئة ده بناخد عليها ذنوب تراكمية مش ببلاش يعني لتكون فاكر ان العملية سلطة الكون بتاعنا ده خلق بدقة متناهية ( اقْرَأْ كِتَابَكَ كَفَىٰ بِنَفْسِكَ الْيَوْمَ عَلَيْكَ حَسِيبًا )
وقد اسائنا الحساب
نسال الله اللطف والرحمة والخير والهداية وان يرشدنا الي الصواب

برده الموضوع مش عارف قلب دين في الاخر

بايدك تريح نفسك وبايدك تعذبها