بسم الله الرحمن الرحيم

السلام عليكم ورحمة الله وبركاته

النهاردة وانا ماشي قررت اني لازم اتابع العربيات اللي حواليا واشوف فيهم غماز علي الرفرف الأمامي ولا لاء
ودة لأني كنت في أشارة وعلي يميني النترا 2010 وعلي شمالي النترا بردو 2010 (اقصد الشكل بتاع hd)
المهم
لقيت واحدة مراياتها عادية والتانية مراياتها فيها اشارة

طب ليه ؟؟؟؟

هل الغماز كماليات - وبينزل في العربيات الكاملة او اللي بيسموها high line ؟؟؟
زي كدة لما اعتبروا الabs والair bags والimmobilizer كماليات وبتنزل في الفئات العالية فقط ؟؟؟؟؟؟

قولت بالمرة اسلي نفسي وانا في الأشارة اللعينة (اشارة في شارع فيصل) وفضلت متابع والاحظ كل اللي حواليا
وكانت النتيجة كالتالي

- كيا سيراتو - بدون - في المرايات لو كماليات
- كيا بيكانتو - بدون
- هيونداي اكسنت - بدون (علي اختلاف موديلاتها)
- هيونداي فيرنا - بدون (علي اختلاف موديلاتها)
- هيونداي النترا - بدون - في المرايات لو كماليات
- بيجو 504 - بدون (بس دي قديمة ولا حرج عليها)

وطبعا لاحظت العكس
- بي ام - فيها
- سيات ابيزا - فيها
- فولكس بولو - فيها
- بروتون ساجاا - فيها
- دايو لانوس - فيها
- دايو نوبيرا - فيها
- اوكتافيا - فيها

وبعد شوية بحث علي النت وشوية صور للعربيات
عرفت الأتي
ان الأشارات (الغمازات تحديداً او side indicator) تعتبر من الأساسيات لبعض المصنعين (اعتقد المقصود الأوروبيين) وتعتبر غير ضرورية في بعض البلدان (زي امريكا وكندا)
ولكن بوجه عام فهي من العلامات الضرورية جداً لتحديد اتجاهاتك للغير دة من ناحية ومن ناحية اخري للتعرف علي حدود وابعاد ومقاسات العربية بالنسبة للغير وخصوصاً لما تكون االدنيا ضلمة

الموضوع دة مش شاغلني من النهاردة
بالعكس
دة شاغلني من فترة بس موضوع الأتنين هيونداي هو اللي استفزني

انت رأيك ايه في الكلام دة ؟؟
هل فعلا الغماز ضرورة ولا كماليات ؟؟؟

تحياتي للجميع

والله المستعان
،
،