اولا انا اشكركم جدا جدا جدا على هذا التجاوب والنقاش الهادف الذى طرح كثير من الأفكار واثرى الموضوع
لأان فعلا هو ده الهدف الحقيقى من المنتدى، تبادل الأفكار والخبرات واثراء معلومات بعضنا البعض
كان فيه استفسار شدنى لأن محدش رد عليه وهو الاستفسار الخاص بموضوع الصمام اللى بيشتغل من خلال سولينويد بيفتح ويقفل على زيت وهذا الزيت هو اللى بيتولى فتح وغلق صبابات الوقود والعادم وان هل الزيت يمكن ان يقوم بالفتح والقفل بالسرعة المطلوبة ام انه سيكون بطئ
للاجابة على السؤال ده هنستعير قاعدة بسيطة من قواعد علم ميكانيكا الموائعfluid mechanics تقول : ان فترة التأخير بين حدوث الفعل ورد الفعل فى اى سائل تساوى المسافة بين نقطة الفعل ورد الفعل مقسومة على سرعة انتشار الموجات التضاغطية فى هذا السائل
معنى هذا الكلام ببساطة انى لو ضغطت على سائل مثلا، فالضغط ده بياخد وقت لحد ما يوصل للجدار التانى للاناء اللى فيه السائل ، الوقت ده مقداره هو المسافة بين النقطة اللى انا ضغطت فيها والجدار التانى اللى انا عايز اقيس التأثير عنده مقسومة على سرعة انتشار الموجة التضاغطيه فى السائل ده، او بتعبير آخر سرعة الصوت فى السائل ده لأن الصوت بينتشر فى السوائل فى شكل موجات تضاغطية
طيب، لو عرفنا ان سرعة الصوت فى السوائل بتلف حوالين الرقم 1500 متر فى الثانية ، يعنى كيلومتر ونصف فى الثانية الواحدة، او متر ونصف كل 1 مللى ثانية، او 15 سنتىمتر كل 1 على عشرة آلاف من الثانية،
طيب لو تخيلنا ان عندنا محرك شغال على سرعة اقصى قدرة حصانية،6000rpm ، فده معناه ان المحرك ده بيعمل لفة كامة كل 1 على 100 من الثانية، او بالأصح لفة كل 10 مللى ثانية، المطلوب من الصباب انه يقفل ويفتح مرة كل لفتين، اى مرة كل 20 مللى ثانية ،لو فرضنا ان الاشارة الكهربية وصلت للسولينويد والسولينودي اخد 1 مللى ثانية علشان يفتح، تأثير الزيت بينتقل للمكبس الصغير اللى هيفتح ويفل الصباب فى ال0.1 مللى ثانية التالية لأان اكيد المسافة بينهم اقل من 15 سم، ومع تصميم ضغط طرمبة الزيت المناسب ممكن الزيت ينتقل بالكمية اللى تكفى لدفع المكبس لفتح الصباب فى ال 1 الى 3 مللى ثانية التالية حسب التصميم المطلوب لسرعة فتح الصباب (وده مش شيء صعب لأن مطبق فى طرمبة البنزين والرشاشات للعمل بسرعات مشابهة)وبنفس الفكرة يمكن غلق الصباب فى توقيت مشابه وبالتالى يبقى الصباب فتح وقفل فى ال 10 مللى ثانية لمخصصين له ويبقى ساكنا طوال ال 10 مللى ثانية التالية
ققط لانجاح التصميم يجب تصميم مساحة المكبس الصغير الخاص بالصباب مع مساحة مسار الزيت من السولينويد الى المكبس بشكل متوائم، كما يجب ان تكون مسارات الزيت من الطرمبة الخاصة برفع ضغط الزيت وحتى السولينويد مصنوعة من مواد غير قابلة للمط( يعنى مواسير حديد وليس خراطيم كاوتش) حتى لا تضيع جزء من ضغط الزيت