الموضوع: عضه في فتيس الاف زيرو

صباح الفل

النهارده احب اشارك معاكم في مشكله صغيره حصلت معايا في العسولة الاف زيرو

العربية عامل بيها لحد دلوقتي 13 الف كيلومتر و حادثة موتوسيكل صغيره على الماشي مع سواق غشيم بيجري بموتوسيكل نحله صيني من غير نمر و دخل في الباب اللي جنبي بالعتب و الحمد لله على كل شيئ.. اصل ده الطبيعي بتاع مصر.

اول ما اشتريت العربيه كان عندي عضه بسيطه في الفتيس و عند صيانة الالف في توكيل القطامية الدولي اشتكيت من الموضوع ده. و عند الاستلام قالوا لي احنا شحمنا عصاية الفتيس و امشي بها شويه و كله يبقى تمام (دى على اساس اني شكلي هندي و اسمي سوراج) بصراحه كنت تعبان فأخذت نفسي و مشيت و قولت اجيلهم يوم تاني و من ساعتها و انا بتعامل مع الاسكندرية و نسيت اقول لهم عل العضة و ماشي بالعربيه في سلام.

من حوالي ثلاثة ايام العضه اصبحت رهيبة لدرجة اني قربت اكسر الفتيس علشان اجيب النقله و غيار المرشدير اصبح بيزعق بشكل جنوني.

من غير ما احس روحت بنزينة توتال و غيرت زيت الفتيس كله بزيت 80 90 و النتيجه كانت صفر.

كان قدامي حل من اثنين يا اروح التوكيل و انا و حظي يا اعدي على واحد صاحبي و حبيبي عنده مركز صيانه محترم في صقر قريش اخد منه استشاره ... الراجل ربنا يبارك فيه و في صحته اخد بالظبط 5 دقائق.. فك البطاريه و مد ايده من غير عده على رجلاش ماستر الدبرياج و علاه و ركب البطارية تاني

.

طلعت اجرب لقيت الفتيس حريييييير ما شاء الله ....و الله احسن من مااشتريتها بمليون مره.

الموضوع طلع تافه جدا لدرجة اني استغربت من ....... و الا بلاش احسن يزعلوا ... :)