السلام عليكم .. اذيكم يا جامعه .. انا عندي استفسارين

الاول هو ان العربيه كانت بتقطع مني و ساعات الموتور بيقف .. فلما روحت التوكيل قالولي ان الانجكشن في وساخه و ف الغالب هي وساخع بنزين .. المهم دفعت هناك 80 جنيه بالرغم ان العربيه لسه ف الضمان و عامله 7000 كيلو بس المهم هو راح فاكك خرطوم و بعدها رش اسبراي و طلع حاجه كده نضفها و بعدين ركبها تاني (انا مليش في الميكانيكا لانها اول عربيه ليا بس حسيت انه معملش حاجه يستاهل ياخد عليها 10 جنيه حتى) و قالي ان الموضوع ده مش مشمول ف الضمان .. ده غير ان لمبه الواطي كانت اتحرقت وفالي انها مش تبع الضمان برده .. قولتله طيب ايه ممكن يعطل ف العربيه والضمان يغطيه .. لما قولتله كده قالي مش هحاسبك على تمن الاسبراي (نزلي حوالي 6 جنيه) ..

المهم الموضوع ده حصل معايا امبارح تاني بعد مفولت من بنزينه التعاون اللي انا لما اتعاملت معاهم حسيت انهم اي كلام لان وانا خارح من البنزينه بصيت في المرايه لقيت غطا التانك مفتوح ولما نزلت اقفله لقيت الغطا البلاستيك مش موجود .. ولما رجعتلهم لقيت الغطا مرمي ع الارض ناهيكم عن شكل الولد اللي كان بيفولي .. مكنش لابس افارول ده غير اني حسيت اني واقف قدام واحد من بتوع السوق السودا) انا بقول الكلام ده عشان الناس تدور ع الافضل مش دعايه سودا والله .. المهم ان انا لقيت الاسبراي بيتباع بره عادي قانا عاوز اعرف لو كان في امكانيه اني اعمله بنفسي ياريت لو حد يفيدني ؟؟

ألسؤال التاني ان في الصيانه غيرولي زيت و فلتر في صيانه الخمسه و كلفتني حوالي 320 جنيه .. بس في واحد معرفه قالي الموضوع ده انه عمله بره و كلفه حوالي 160 جنيه بس و بس انا حاطط زيت 5000 موبيل ومش عارف نوع الزيت اللي هو حاطه .. فهل ممكن اني اعمل الصيانات دي بره التوكيل بحيث انها تخفض من تكلفه الصيانه .. لاني بصراحه لما روحت عملت صيانه الخمسه حسيت اني "بتقرطس" و الحاجه ام جنيه بتقف عليا بـ 2 .. فانا عاوز اعمل الصيانات العاديه دي بره التوكيل بس خايف لحسن اخرج كده من الضمان .. فهل الحاجات دي تخرج من الضمان؟؟

موضوع الفلوس ده انا عارف اني مش بتكلم في الالافات بس انا طالب و باخد مصروف من والدي و كتر الف خيره انه جابلي العربيه فانا مش عاوز كل شويه اكلفه فلوس فوق الفلوس اللي دفعها

وشكرا مقدما