الموضوع: موضوع مفصل عن خصائص المياة الخضراء ومشاكل المياة العادية والمياة المقطرة

السلام عليكم ورحمة الله وبركاتة

اسمحولى بما ان تحليل المياة من تخصصى فواجب عليا ان اشرح الفروق الجوهرية بين الانواع السابقة ببساطه عشان كل الاعضاء يبقوا فاهمين الموضوع باقتناع

مشكلة المية العادية فى استخدامها للسيارة فى ثلات اشياء:

اولا: وجود نسبة من الاملاح وبتبقى من 150 الى 500 ملى جرام والاملاح بتتراكم على السطح الملامس لها وبتعمل على تاكلة على فترات وطبعا كل مبتزود مية فى القربة بكدة انتا بتزود نسبة الاملاح تانى الموجودة على الردياتير وبتزود التاكل. ....
المشكلة التانية بمرور الوقت التاكل بيؤدى ان ان الردياتير يصدى لتفاعل المية مع الحديد او النحاس
هنا فى حد يقول طيب لو عرفت اجيب مية مقطرة وطبعا بتبقى خالية من اى املاح يبقى خلاص مش هيبقى عندى مشكلة فى التاكل ..... للاسف لا لان المية الخالية من الاملاح بتبقى مية اقرب للحامضية وطبعا دية بتنحر فى الردياتير بردة غير كدة زى ماذكرت قبل كدة ان الحديد او النحاس بيتفاعل مع اى مية سواء كان فيها املاح او لا وبيصدى بمرور الوقت
واخيرا درجة غليانها لاتتعدى 100 درجة مئوية

نيجى للمية الخضراء

1- بتبقى مية مقطرة مفيهاش اى نسب من الاملاح بس متعالجة عشان متكونشى اقرب للحامضية

2- يوجد على المية الخضراء نسبة بسيطة من مادة اسمها (صوديوم نيتريت) المادة دية بتعمل عزل لاى حديد او نحاس وتعمل على تغطيتة عشان ميتنحرش ودية فكرة موانع الصدا فيها المادة دية بس بتركيزات عالية وطبعا فى مواد اخرى بس دية اشهر مادة فيهم

3- يوجد على المية الخضراء مادة اسمها ايثيلين الجليكول بترفع درجة الغليان للمية
من 100 الى 107 درجة مئوية لو مفيش ضغط عليها من غطاء القربة
من 100 الى 130 درجة مئوية لو غطاء القربة محكم وضاغط وعشان كدة بننصح بالتاكد من ان غطاء القربة اصلى مش مضروب
واكتشفوا العلماء لما ترفع الضغط لمستوى عالى جدا فدرجة غليانة ممكن توصل الى 198 درجة مئوية

فى حاجة مهمه تانية تركيز المادة نفسها....وياريت حد يفيدنا ويطلع من كتالوج الفليشيا التركيز المناسب .... معظم العربيات انسب تركيزليهم هو 50/50 يعنى 50% ودة مع ضغط غطاء القربة بيوصل درجة الغليان الى 130 درجة ....... زيادة التركيز الى 70 % بيرفع درجة الغليان الى 135.5 درجة
طب لو تركيز المادة اكثر من70 % ..... للاسف مش هيحصل تبريد لان المادة بنفسها مبتبردشى لازم تتخلط بالمياة المقطرة وكمان يعمل مشكلة تانية ان لزوجة المياة هتزيد والطرمبة مش هتقدر تقلبها وتضخها فى مواسير الردياتير

اخر حاجة فى ميكانيكية يقولولك ان تركيزة لما بيزيد بيعمل على تاكل الجوانات .. طبعا افتكاسة لان المادة مش حارقة ولكنها سامة
فى ميكانيكية يحطلك منة 2لتر او تلاتة ويكملك مية عادية من الحنفية ويقولك اصل تركيزة عالى ... طبعا افتكاسة اسواء من القبلها لان كدة بتكون بنفسك بتدخل نسبة من الاملاح على المية الخضراء . وكأنك يا ابو زيد ماغزيت
ارجوا انى اكون وفقت فى عرض الموضوع ببساطة ومطولتش عليكما وخلى بالك من المية المضروبة باللون الاخضر
وشكرا

المشاركة الأصلية كتبت بواسطة sakr1964

والله موضوع المية دا محيرنى جدا ناس بتقول المية الخضراء والحمراء مهمة جدا وناس تقول مية الحنفية مالها مش فاهم تفتكرو ان فيه مية ملونة نضيفة اذا كان الزيت اتغش والبنزين اتغش تفتكرو المية مش حتتغش ياعم جركن مية وعلى كيس اكسيد اخضر او احمر ب 50 قرش بقى عندك جركن مية ملونه ب65 جنية طيب نعمل ايه مهو ممكن المية دى تكون وبال على العربية واشد ضرر من مية الحنفية....*

طيب ايه رئيكم فى مية التكييف ويضاف عليها علبة كنز امريكانى ب15 جنية افتكر دى مضمونة اكتر من الجراكن الجاهزة اللى بقولو عليها اسبانى وتايلاندى وغيره....

الكانز سواء من شركة abro او cyclo دى اضافة بتحط للمياه الخضراء او المقطرة وطبعا مياة التكييف مقطرة .... ولكن ابعد عن مياة صرف التكييف