الحمدلله ربنا اكرمنى بعربية فيكترا98 ويرجع الفضل بعد ربنا والاستخارة لأستاذ محمد طنانى الرجل اللى مشافنيش و ميعرفنيش بس بيرد عليا ويكلمنى بكل ذوق وصبر
طبعا كان اهم نقطة بياكدها عليا انى اكشف ف مكان محترم ورشحلى مقار وحبيت اشارك الاعضاء خبرتى القليلة المتواضعة عند مقار يوم29/5/2013
رحتلهم مع صاحب العربية الصبح الساعة9الصبح وطلبت كشف كامل على العربية قالولى التكلفة 440 جنيه قلت تمام نبدأ
اول حاجة كشفو على الزوايا والعجل وده ف المكان الواسع اللى بيستقبلوا فيه العربيات وده كان قدامى
بعد كده العربية دخلت المكان المخصص للموظفين فقط وطبعا مشفتش اى حاجة تانى
طلعت بعد كده الساعة12 الظهر ولقيتهم ف التقرير مش كاتبين كبس الموتور قلت للراجل اللى استلم العربية فرجعهلهم تانى وطلعت 12ونص وكاتبلى كبس الموتور بس مش نسبة مئوية انا كنت فاكر هيقولى 70 او 80 فى المية بس لقيت مكتوب واحد على 175 مفهمتش طبعا وسالته قالى تقريبا 80 ف المية
ومشيت من عندهم الساعة 1 تقريبا
وطبعا طلعوا كشف مكتوب بالكومبيوتر ومختوم بختمهم هبقى اصورة وارفعه للمنتدى بس دى اول مشاركة ولسة مش متمكن قوى
اللى انا عاوز اقوله واللى قلته لأستاذ طنانى انى كان نفسى اشوف الكشف بنفسى,يعنى انا من شهرين كشفت على عربية بيجو307 لأخويا ف بنزينة التعاون اللى ف المطار الراجل لففنا على العربية حته حته ونزلنا تحتها وطلع جربها و كشف على كبس الموتور قدامى. تحس انك واخد العربية وانت مستريح وكل ده ب 180جنيه بس
فأنا رأيى ومعرفش استاذ طنانى وباقى اعضاء المنتدى الكرام يوافقونى عليه ولا لأ.انى ممكن اكشف عالموتور والفتيس بالكومبيوتر واشوف هيطلع اى اكواد او لأ ف مكان محترم زى مقار وده تكلفته100جنيه بس.والباقى يكون ف اى بنزينة
وطبعا مش بتكلم ف نقطة الفلوس انا بتكلم انك تبقى شايف الكشف بنفسك ومطمن
ف النهاية وللمرة التانية والالف بحمد ربنا وبشكر محمد باشا طنانى على سعة صدره وذوقو