الموضوع: بأمانه ودون تحيز .. اشتري ستروين ax ولا لا ؟

حتلاقى على الجنب بحث عن مواضيع العضو شوف مواضيعى عن العربيه وكان فيها عندى مشكله جامده وهى السخونه لاكن طلع العيب من الرداتير لانى صبرت حتى اكتشفت العيب
واول ما جبتها سمعت
ايه البلوه دى الحق رجعها الخ
وحكلمك بمنتهى الامانه
العيوب
ضيق الحوض يجعل الصنايعى غير مرتاح فى الشغل فيها(او بصفه عامه اى عربيه حوضها ديق)
العربيه محركين زهر والومنيوم الزهر سهل جدا فى الصيانه زى اللادا والفيات الالومنيوم اصعب لان الشمايز حره والجسم الالومنيوم بيكون الربط عليه صعب لانه ممكن يفوت(لم تواجهنى المشكله دى لان عربيتى محرك زهر)
ضيق الحجم بتاع العربيه ادام جيده جدا ورا ديقه
بطى البيع والشراء(لم تواجهنى هذه المشكله والله عند عمل الاعلان اتصل بيا 15 واحد )
عدم وجود قنطره (لا اعتبره عيب بينما البعض يعتبره عيب)
دى العيوب بتاعتها
المميزات
نعومه الفرنساوى
الجوده فى التقفيل الاعتماديه العمر الطويل لقطع الغيار(انا كان معايا 127 وعارف انا بقول ايه)
قوه المحرك الجباره عليها 75 حصان على اللعبه دى
الثبات قمه الثبات موطى قاعده العربيه(الكراسى)مركز الثقل مع العفشه
عفشه معمره جدا
كل قطع العربيه معمره لدرجه انى بعد لما ظبطها قعدت سنتين بنزين وزيت
سنتر وزجاج كهربا فبريكا وليس متركب
تكييف معقول وليس ثلاجه
قطع الغيار اللى فاكرها
دنجل كامل خلفى(عفشه خلفى كامله)600
اسكاترا (اعتقد اغلى قطعه)500
4 ابواب 1000
رفرف 100
كشاف امامى 120
محرك كامل 2000
فتيس 500
مشط كهربا 120 (يعتبر هو نظام الدواره بالكامل فى العربيه)
كل الزجاج موجود
ولما رحت بورسعيد لاقيت حجاتها اكتر بكتير من الكبيره
الخلاصه
بتدور على ركبه كماليات دماغ ومفيش نيه بيع بسرعه افضل اختيار بسبب السعر
بتدور على البيع قبل الشرا ومقلق من كلام الناس خليك فى ال27 بالنسبالى الفرق زى السما من الارض
دى نصيحه لوجه الله انت تفكر كويس وتعمل استخاره
وعمرى ما حقول نصيحه اضر بيها حد واكبر دليل عن اقتناعى بيها انى جبت الكبيره بتاعتها وربنا يكرمك وتتخذ القرار الصح

المشاركة الأصلية كتبت بواسطة A3SAR

مع احترامي للجميع انا بحس ان قسم الستروين بيشجع الناس انهم يقتنوا الانواع دي
بما انها ستروين ومش بيحبوا يظهروا عيوبها الفعليه
وانا بعد نصائح حقيقيه قررت انى ابعد عن العربيه دي
انا اسف لو كلامي حاد بس مش لقيت حد هنا في القسم قالي بلاش علي عكس القسم العام لما كتبت فيه
وكأن كل قسم بيدافع عن العربيات اللى تخصه
يعني لو فكرت لقيت قطع الغيار وان مش اى حد يشتغل فيها واعاده بيع صعبه
كل دي كوارث تخليني مفكرش فيها
شكرا اوى علي اهتمامكم وردكم

خلاص اوك اعمل زى ما انا عملت بالظبط
اول ما فكرت فكرت فى نفس العربيه دى (ستروين ax) وطبعا عملت زيك بالظبط وسمعت كلام الناس اللى خوفونى منها واشتريت كميه عربيات مش هاتتخيلها خلال 4 سنين زى 127 و ال 128 و132 .... الخ وكل واحده صرفت عليها دم قلبى غير العطله والمفاجات الغير لذيذه بالمره خصوصا وانت معاك مراتك وعيالك والبهدله عند الصنايعيه .... الخ الخ الخ
وف مره خدت عربيه واحد صاحبى كانت رينو 9 وروحت بيها مشوار طويل وكانت العربيه موديل قديم يعنى تمانينات وبصراحه انا اتصدمت لما سوقت العربيه دى من النعومه والتجميع وحسيت بفرق شاسع بينها وبين الدبابات اللى انا بركبها لأانى ماعرفش وماسوقتش غير نوعين من العربيات اولهم الفيات الهلكان بتاع زمان وثانيهم العربيات الحديثه زى اللانسر والشيفروليه وكده وماكنتش متخيل ان ممكن عربيه رخيصه تديك اداء شبيه بالعربيات الحديثه لحد ما جربت الرينو 9 وابتديت اسأل على الفرنساوى وعرفت ان كله تقريبا نفس النعومه والسحب الممتاز اللى كنت مفتقدهم فى العربيات القديمه وبما ان شغلى كان فى شارع الحريه فى جسر السويس فكنت بشوف الورش وبتوع قطع غيار الستروين بالعبيط فى المنطقه والعربيه نفسها كانت منتشره فى المنطقة دى وقررت انى اغامر واجيبها
والحمد لله بعد التظبيطه الاولى للعربيه ماصرفتش عليها جنيه وكمان الحمد لله (ربنا يديمها علينا نعمه) ماعطلتش ولا مره واداءها ممتاز لدرجه انى ندمت انى ماجبتهاش من زمان وضيعت السنين اللى فاتت دى كلها فى عربيات قرفتنى وفلستنى وصرفت عليها اكتر ما باصرف على بيتى وعيالى وقضيت وقت عند الصنايعيه اكتر من اللى بقعده فى البيت او فى شغلى
وعموما انا بدافع عن الفرنساوى عموما مش العربيه دى بالذات ولو انت ظروفك سامحه كنت نصحتك بالميجان او الفلوينس او السى فور
وطبعا زى ما كله قالك ماحدش ليه مصلحه فى انك تشترى العربيه دى لكن نصيحه منى اسمع من اللى معاه العربيه فعلا او كانت معاه مش اللى سمع عنها وزى ما كلنا قلنا قبل كده اهم حاجه الحاله واكيد اللى العربيه دى تعبته كانت حالتها وحشه
واخيرا لك كامل الحريه فى الاختيار ولى كامل الحريه فى الدفاع عن سياره اغلى واقيم بكثير من وضعها المهين فى مصر واللى يخلى عربيات زى الفيات القديم ليه سعر عنها (مع احترامى الشديد لكل مالكى الفيات)

لا يا باشا اسلوب النقاش كان كويس بس انت هاجمتنا وحسستنا اننا عايزين نلبسك العربيه وهى نصيحه لوجهه الله
فاكيد حتلاقى اسلوبى اتغير معاك والموضوع متروك ليك اختار ما يناسبك
ولو عندك اى سؤال عن العربيه انا معاك

Hasan_EGT الثبات ممتاز التجميع قوى جدا لدرجه انى كنت بنرفز عربيات اعلى منى بكتير جدا
كنت بجيب 140 وفى فرق بين 140 مستريحه و140 قرص وخفت ازود
ال120 انت بتهزر مفيش حمل على الموتور وتسافر اى مكان مستريح
يعنى الحجم الصغير والمحرك الكبير عمل ميزتين عربيه صغيره للمدينه ومحرك كبير للسفر
والمهم ان عشان كل ده فبريكه معاه نظام فرامل متناسب مع قوه الموتور يعنى لما تفكر تقف حتقف باذن الله