حاجه عجيبه !!!

**yyy** · 07-06-2013 04:54 PM

هوا ليه معظم الناس ال بتبيع عربيات هنا فاكره اعضاء المنتدي هنود ؟

تلاقي واحد كاتب كسر زيرو و العربيه ماشيه 60 الف !!!!
وناس عارضه العربيه باعلي من سعرها 20-30 الف و يقولك دي زيرو
زيرو تزيد 4-5 مش 20-30

و المهم ان نفس الشخص ال بيبالغ في سعر عربيتو دا لما حد يعترض علي السعر بتاعو يضايق و يقولك دا سعري و انا حر
و بعد شويه تاقيه هوا هوا نفس الشخص داخل يعترض علي سعر واحد تاني عامل زيو بالضبط او يمكن مزود في السعر اقل شويه
ولو محدش رد عليه تلاقيه زعلان كاتب هيا العربيه مش عاجباكو ولا ايه يا جماعه !!

**paul_walker** · 07-06-2013 07:57 PM

اه والله عندك حق السوق على النت غير الواقع خالص ناس عايشه فى عالم تانى

**YahiaAshraf** · 07-06-2013 08:06 PM

مش هنا بس ده على معظم مواقع البيع و الشراء

مثال : واحد للبيع رينو لوجان فرنساوى

باللهم عليكم اللوجان فرنساوى برده

دى يا اما رومانى او مغربى

**exelence** · 07-06-2013 10:06 PM

للأسف الواحد كان متخيل لما ييجى يشترى عربية من المنتدى هيلاقى ناس فاهمه سعر العربية الحقيقى مش بتضرب فى السما لكن كله طلع سراب و اتضح ان الناس اللى برا فاهمه فى السعر اكتر بكتير من المنتدى

**lad** · 07-06-2013 10:11 PM

قليل اوى اللى بقى عنده ضمير انزل السوق و شوف السرقة عينى عينك

**aaaa2000** · 07-06-2013 10:43 PM

المسأله مرتبطه بثقافة وسلوكيات المجتمع المصرى
معظم المصريين تسيطر عليهم فكرة الفهلوه وانتهاز الفرصه وطبعا وجدوا النت ملعب مناسب لأفكارهم لأنهم يعتقدوا ان كل اللى على النت هنود زى ما حضرتك ذكرت ماعدا هو طبعا اذكى اخواته

**M.Elgergawy** · 07-06-2013 10:53 PM

السبب في دا كله هم تجار السيارات
لان الواحد فينا لو حب يغير عربيته ويجيب احدث
بينزل يبص على الاحدث يلاقيه نار
ويسال على عربيته ويعرف سعرها من التجار ويقوم مزود كمان عنهم

**el diesel** · 08-06-2013 08:14 AM

بص انا متابع اعلانات البيع من فترة سنة وزيادة والحمد لله كانت سبب فى شرا العربية اللى معايا "ألفا روميو"
المهم بالنسبة للاسعار ومصداقية الاعلان تلاقيها بجد من الناس القديمة فى المنتدى وغالبا بيبقوا معروفين فى اقسامهم وهما دول اللى بيجيبوا وصف تفصيلى لحالة العربية و سعر على قد الحالة بجد وكمان بيبقى فيه تعامل وردود كويسة منهم
اما بقى بالنسبة للاعضاء اللى بتسجل جديد لغرض الاعلان فقط على المنتدى استغلالا لشهرة المنتدى و تعداد الزيارات عليه دوا 90 % منهم تجار وبيضرب اسعار وهمية وبيكدب فى وصف الحالة الحقيقية للعربية
وللاسف مفيش رقابة عليهم :(

**ahmed.zahra** · 08-06-2013 11:55 AM

كلامكم صح بس الواحد عادي لازم يكبر دماغه و لما يلاقي اعلان فيه الهبل ده ما يردش خالص عشان الموضوع يتقفل و الأخ صاحب الموضوع ما يعملش مواضيع جديدة و يسيبنا احنا و المنتدى في حالنا