دليل التعامل مع المرور - تجارب واقعية

**أشرف فتحى** · 08-03-2009 01:58 PM

المشاركة الأصلية كتبت بواسطة Khalid_Mostafa

انا لسه مرخص إمبارح و حصلت حاجه كده قلت انبهكم ليها...
انا مرور المنتزه(طوسون) وبعد عذاب نيبة المرور و الفحص و الذي منه رحت دفعت الضريبه و كانت 500 جنيه (3 سنوات) واشتريت ملف وورق و استمارات و دمغات بـ 55 جنيه

رحت عشان اعمل التأمين الإجباري...
تقدمت للشباك فسألت الموظفه كام سنه:
انا : 3 سنوات
الموظفة : 195 جنيه
انا: طلعت الفلوس و اخدت ورقتين وقالتلي علي واحده فيهم حطها في الملف و التانيه خليها معاك

بصراحه بعد المكتب بعشر خطوات قلت ابص علي البيانات احسن تكون فيها غلطه تكعبلي الدنيا وكنت فاكر ان الورقتين اصل و صوره
قعدت اقرأ الي مكتوب وصدمت انها عامله تأمين إجباري بـ 175 جنيه و تأمين علي الحياه بـ 20 جنيه....!!!!
طبعاً المبلغ صغير و ميستحقش بس فكرة انها بتشتغل الناس بالشكل ده رفعت ضغط الدم عندي و رجعتلها وانا بطلع دخان

انا : ممكن افهم ايه الورقه دي (وانا وشي مقلوب وماسك الورقة بتاعت التأمين علي الحياه)
الموظفه : (وعلي وجهها إبتسامه) ده تأمين علي الحياه عشان لا قدر الله الحوادث
انا : (وبرخامه) مأنا عارف و بعرف اقرأ..مين الي قالك تعمليه المفروض تسألي الناس الأول

الموظفه : مانا قلتلك قبلها
انا : لا ...انسي الكلام ده محصلش انا مش واحد بصمجي قدامك
الموظفه : (وعلي وجهها إبتسامه صفراء) خلاص مفيش مشكله ارجعهالك بالحد الأدني
انا : (وقد إرتفع صوتي) ..لا..لا..لا ...انا مش راجعلك عشان اسمع الكلام الي انتي بتقوليه ده...انسي التخاريف دي...العشرين جنيه ترجع دلوقتي احسن بالتي هي افضل
الموظفه بدون اي تعليق إضافي فتحت الدرج و ادتني العشرين جنيه و اخدت الورقه وانا مشيت وانا سامع الناس الي واقفين علي الشباك كلهم قاعدين يقولولها "واحنا كمان عايزيين العشرين جنيه بتاعتنا"