السيارة الشيفرولية اللانوس والمشى فى المدقات

**elfiky81** · 09-06-2013 10:53 PM

بعد التحية والإحترام لكل الأعضاء
قررت وبعد بحث وتحرى انى اشترى شيفرولية لانوس 2013 لاحتياجى لها فى السفر من البحيرة مقر سكنى الى سيوة مقر عملى بمعدل مرة شهريا 700 كم لكن يوجد فى سيوة مسافة بين المدينة والشركة التى اعمل بها تقدر ب 15 كم عبارة عن مدق ترابى .
والسؤال هنا هل الانوس حلوة فى السفر الطويل وكمان فى المدقات الترابية؟
وهل يمكن انى أحطلها بنزين 80؟
وهل يلزم تغيير الزيت كل شهر على اقصى تقدير حتى ولولم تقطع السيارة المسافة المقررة لتغيير الزيت؟
وجزاكم الله عنى خبر الجزاء

**abo rodina** · 09-06-2013 11:18 PM

ماانصحكش باللانوس في الطرق الغير ممهدة....العفشة مش هتستحمل

**truss** · 10-06-2013 12:33 AM

اللانوس حلوة فى السفر, بنسافر بيها الصعيد مسافة 450 كم
عموماً كل العربيات مش مصممة انها تمشى فى المدقات الترابية, عدا عربيات الدفع الرباعى.
اللانوس ممكن تمشى ببنزين 80 مع ظبط فيشة الاوكتان.
تغيير الزيت على حسب نوعه و على حسب استخدامك, لكنه على الاقل ممكن يقعد 3 شهور.

**elfiky81** · 10-06-2013 12:53 AM

أشكركم على سرعة الرد

**mostafa mahmod** · 10-06-2013 01:02 AM

عفشه اللانوس من احسن العفشات فى فئتها
و ممكن بنزين 80 عادى مع تظبيط فيشه الاوكتان
و مبروك مقدما

**kokowasfy** · 10-06-2013 01:29 AM

طيب معلش انا عارف الانوس جميلة و زى الفل لكن مش مناسبة ليك انت تشوفلك عربية دفع رباعى مستعمل حالة نضيفة جدااااااااااا اقترح لك لو فلوسك من 50 الى 70 الف شوف شيروكى موديل 99 او 98 ممكن تاخد حااااااااالة نضيييييييفة اوى و انسى المطبات و الطرق الوعرة و تحياتى ليك

**elfiky81** · 10-06-2013 01:31 AM

طيب تنصحونى باللانوس الجديدة ولا اجيب حاجة مستعملة انا اخرى حاجة شامل كل شىء ب 80000 جنيه سواء جديد او مستعمل بس يكون بحالة جيدة
افتونى يا اهل الخبرة انا مصدقت جمعت المبلغ مش عايز اندم
انا راجل معنديش غير مرتبى يعنى مش عايز اصرف كتير بعد كده على السيارة من قطع غيار لكن البنزين مش فارق معايا 80 من 90 من 92 يعنى هدلعها بنزين واكسسسوارات
ارجو افادتى على وجه السرعة لانى فى اجازة وعايز اشترى
والف شكر

**elfiky81** · 10-06-2013 01:55 AM

بالنسبة للطريق الترابى اللى بقول ليكم عليه انا مش همشى عليه كل يوم لانى مقيم داخل الشركة يعنى مش هستعمله غير وانا راجع الشغل من الاجازة وكمان وانا مروح بعد 22 يوم يعنى مرة واحدة كل شهر
انا استعمالى ليها هيكون فى السفر من البحيرة الى سيوة طريق مطروح وبعدين فى البلد لما ارجع هنزل بيها القاهرة او الاسكندرية ده اخرى
فأيه رايكم اجيبها ولا اجيب ايه فيما لا يزيد عن 80000 جنيه على ان تكون قطع غيارها مش غاليو ومتوفرة
أسف على الاطالة واشكركم

**graffittiii** · 10-06-2013 02:45 AM

المشاركة الأصلية كتبت بواسطة mostafa mahmod

عفشه اللانوس من احسن العفشات فى فئتها

من حيث إيه ياباشا ؟
يعني أحسن في إمتصاص الصدمات ولا مساعدتها علي الثبات ولا تحملها للطرق المكسرة
برجاء اللإفادة
عن نفسي كل لانوس ركبتها كان صوت أجزاء العفشة فيها مسموع ومحسوس بوضوح داخل الكابينة أكتر من الفيرنا بشوية وأكتر من اللوجان بكتيييييير .
وهي عربيات من نفس الفئة .

**YahiaAshraf** · 10-06-2013 03:10 AM

منصحكش باللانوس لان من يوم ما شيفورليه مسكتها بقت أى كلام

أولا عفشتها غير عفشة اللانوس الكورى او المصرىلغاية 2008

خامات الطابلوه بقت أى كلام

اركب لانوس من 96 لغاية 2008

واركب لانوس 2013 و هتعرف الفرق كويس جدا

الانوس حتى 2008 احلى موديلات اللى هى تبع الدايو

تحياتى