الموضوع: ليه العمرة مش بترجع الموتور زى الاول !! سؤال يطرح نفسة

اه قولتلى السعودية :) انا افتكرت فى مصر كنت هقوم ارقص يا راجل !! :)

تحياتى

لأ هيا كذا مشكله مش مشكله واحده
اول حاجه (كالعاده مع مصر يعني) الدنيا كللها اتطورت واحنا لسه زي ما احنا
وبالتالي نفس عقلية ميكانيكي الستينات فاهم قصدي ؟؟
عشان كده في مواتير زي مابتقول مش بيتعملها عمره

يعني مراكز الصيانه حاليا لأن العربيات تطورت شغاله بأدوات جديده وكده واجهزة قياس عالشعره
هنا طبعا بالبركه :) وانت ونصيبك خصوصا في مواضيع الخرط زي ما الاساتذه قالوا
انما تغيير صبابات وكده مافيش مشكله ان شاء الله
وربنا يوفقك وتلاقي اللي انت عايزه

يا رب :)

المشاركة الأصلية كتبت بواسطة ahmed nasser

بص ياباشا من الاخر
لما تحب تعمل اى حاجة فى الموتور شنبر او سبيكة الموتور هيرجع احسن من الاول
بس لو عملت شغل خراطة يبقى الموتور الله يرحمه

يعنى انا دلوقتى عندى الموتور مرزع .. كنت بفكر اجيبله عمود كرنك و سبايك و بيللات .. كدة هنخرط ؟!

المشاركة الأصلية كتبت بواسطة Muahmmad Honda

السلام عليكم

اموت و افهم ليه يقولك العمرة عمرها بترجع الموتور زى الاول !!

ليه يعنى ؟!

و فيه مواتير زى الهوندا و البى ام و الفولكس يقولك لا مبتتعمرش !!

ازاى يعنى مبتتعمرش ؟!

لو اتعمرت مش هترجع زى الاول ..

لا حول ولا قوة الا بالله !!

طب ليه يعنى ؟!

و امتى العمرة ترجع الموتور زى الاول ؟!

ارجو الرد على السؤال دة عشان انا هتتجن منه !!!

تحياتى :)

شوف حضرتك اي عمرة موتور في الدنيا عشان تتعمل صح لازم يكون في 4 حاجات اساسية متوفرة ولو حاجه واحده منهم بس نقصت هتطلع العمرة مش تمام
1- ميكانيكي متعلم وشاطر وامين ومتدرب صح (غير موجود بالخدمه)
2- خراط متعلم وشاطر وامين (ابحث مع الشرطة)
3- قطع غيار اصليه ومضمونه 100% (لنا الله)
4- النظافة (من الإيمان)

اولاً الميكانيكى وده عليه 50% من الشغل وهو انه يبقى محترف وعارف كل جزء في الموتور وظيفته ايه وبيشتغل ازاي وازاي لو فيه مشكلة يعمله Rebuild صح ولازم كمان يكون عنده السيرفيس مانيوال بتاع العربية عشان يبقى عارف الخلوصات المسموح بها بين البستم وغرفة الأحتراق وبين السبيكه والكرنك وهكذا وكمان يبقى عنده Tools يقدر يقيس بيها الكلام ده لأنه لازم يراجع على الخراط بعد ما يخلص شغله ويتأكد ان الخراط عمل شغله صح قبل ما يفل موتوره .
ثانياً - الخراط وهو ده بقى اساس المشكله لازم لازم يكون معاه القيم المظبوطه لكل موتور عربية بيشتغل فيه لآن كل موتور وليه قيم مختلفه عن التاني وطبعاً عشان ده مش بيحصل فبتكون النتيجه ان العمرة مش بتعيش وحتى لو جايب قطع الغيار اصليه وعشان ده يحصل لازم يكون خراط متعلم ومحترف وبيقبل النقاش وحضرتك تديله الداتا بتاعة موتورك وهو يلتزم بيها

ثالثاً - قطعه الغيار الأصليه وديه الهدف منها انك تضمن ان الموتور يعيش نفس المده الى اشتغلها وهو جديد
رابعاً - النظافه مش عاوز اقولك انك بتفك موتور عليها Oil Leaks السنين فلازم لازم يتنضف كل جزء فيه بعناية فائقة وكمان يراعي بعد شغل الخراطه واثناء التقفيل الغسيل الجيد جداً لكل قطعه لأن وجود اتربه او رايش داخل الموتور بيدمر الموتور .

اما بقى لطريقع عمل العمرة بتبقى فبتبقى كاتاتي
الموتور بينقسم جزئين
جزء علوي (وش السلندر) وده الموجود فيه الصبابات ودلايل الصبابات وكاوتش الصبابات وقواعد الصبابات وعمدان الكامة والكستبانات او الشواكيش (على حسب نوع الموتور)
جزء سفلي (بلوك) وده بيبقى فيه البساتم والبيلات والشمايز وعمود الكرنك والسبيكه وهلايل الكرنك وطلمبة الزيت .
طيب دلوقت حد هيقولي يا كابتن لطيف انتا رغاي اوي عرفنا بقى ازاي نعمر الموتور طيب ...
اولاً عمرة وش السلندر
1- قياس وش السلندر للتأكد من انه مش مقفع ثم فحصه جيداً بالنظر (ايام ماكان عندي نظر) للتأكد من انه مفهوش ثقوب او شروخ او كسور ولو فيه حاجه يبقى مش هتنفع فيه العمرة وفي الحاله ديه هنحتاج وش جديد او استيراد اما لو كان سليم يبقى نتوكل على الله ونبداء
2- طقم صباب جديد
3- كاوتش صباب اصلي
4- مراجعه الخلوص بين الصباب وبين الدليل بتاعه لو فيه مشكله يبقى محتاجين دلايل صبابات
5- مراجعه احكام قاعده الصبابات لضمان احكام غلق الغرفه ولو القواعد الأصليه سليمه بيتم عمل مسح ليهم وعمل روديه كويس (زي الصنفرة كده) للصبابات الجديده مع القواعد (اهم عمليه في وش السلندر) ويتم بعد ذلك اختبار للصبابات مره اخرى للتاكد انهم مش بيهربو كبس وبكده يبقى خلصنا الوش نقفل الكستبانات او الشواكيش وبعدين عمدان الكامة وده بأستخدام torque wrench وقيم الربط بتبقى في السرفيس مانيوال ونركن الوش على جمب لحد مانخلص الجزء الى تحت او البلوك

ثانياً - عمرة البلوك
1- المراجعه بالنظر للبلوك زي ما راجنا الوش بالظبط برضه لو فيه حاجه يبقىوساعتها ممكن نجيب شورت بلوك استيراد (مجبر اخاك)
2-مراجعه الخصلوص ما بين البساتم والشمايز وده الى على اساسه هيتحدد مقدار الشغل في البلوك .. بمعني لو كان الخلوص داخل النسبة المسموح بها يبقى هنحتاج طقم شمبر فقط اما لو كان الخلوص كبير يبقى كده ادامنا حلين ملهمش تالت الأول ان فيه مواتير الشمايز بتاعتها بتتفك وبيتاعلها طقم عمرة كامل اصلى (طقم شمايز بالبساتم بالشمبر) وده بيبقى حل ممتاز بعيداً عن مشاكل الخراطه اما لو الشمايز ثابته يبقى هنجيب طقم بستم اكبر من الأصلي والخراط هيوسع الشميز (بنسب مسموح بها) عشان يبقى على قد البساتم الجديده مع مراعاه والتأكد من الخلوص وانه في النسبه المسموح بها طبقاً للسيرفيس مانيوال وميقولكش اعملهولك محمل يابيه ولا اعملهولك مريح عشان الأكس في التاكس لا قوله اعمله مظبوط على القيمة الى اديتهالك ومتفتحش بقك يا ابن التيت
3- مراجعه خلوص السبيكة ولو كان الكرنك نسبه التأكل به داخل المسموح به يبقى نجيب طقم سبيكة ستاندرد اصلي وكفى الله المؤمنين شر القتال اما لو الكرنك متأكل يبقى هتجيب طقم سبيكة اكبر 010 او 020 ويتخرط الكرنك ويتم التأكد على ان الخصلوص بين السبيكة الجديده والكرنك بعد الخرط مظبوط طبقا للقيم بتاعه السيرفيس مانيوال برضه وبكده يبقى خلصنا العمرة بالسلامه

نغير بقى طقم جوانات واويلسيلات اصليه وطلمبة زيت وطلمبة مياه وطقم سيور وبلى الكاتينة وبوجيهات وفلاتر ونغسل كويس جداااااا كل الأجزاء ويبداء الميكانيكي يقفل الأجزاء كلها بأستخدام مفتاح العزم وكده إن شاء الله تطلع العمرة مظبوطه

اما تجربتي انا في العمرات انا عملت عمره كاملة بأيدي لعربيتي 128 1100 القديمة وقعدت معايا 4 سنين وبعتها موتورها 100% وعملت عمرة بأيدي لعربية والدي القديمة لادا 2017 1600 وبرضه قعدت 5 سنين وبعناها موتورها سليم وعملت طقم شمبر لعربيتي اللانوس سنه 2009 بس مش بأيدي عملهالى ميكانيكي ابن حلال بس كنت واقف على ايده والحمد لله حتى الأن موتورها سليم وعملت عمره بأيدي لعربية اخويا ريتمو 84 1500 وديه بقى كانت تحفه بس قعدت سنه واحده وبعناها وبرضه موتورها ماشاء الله عليه والخلاصة والى اتعلمته من تجاربي ديه
ان اهم مافي الموضوع خراط وميكانيكي ولو الأتنين دول اتوفرو + قطع الغيار يبقى العمرة اضمن اما لو اي شرط منهم نقص يبقى البقاء لله في العمره