السلام عليكم
بادئ ذا بدء في هذا الموضوع بيتقال على الموتوسيكل في مصر - مكنة - مش عارف ليه بس عادي ما احنا بنقول على السيفتي بالف - سكسبالف - المهم
خلصت يوم عمل مرهق وبعدين دعاني احد الاصدقاء الي طريقة من طريقي للعودة معه على الموتوسيكل بتاعه - المكنة بتاعته - وطبعا مكدبتش خبر وقولت ياااه توصيلة ببلاش
اول ما ركبت وراه على الموتوسيكل وطبعا شغلت كل منابع ذكائي علشان اعرف ازاي اركب وراه من غير ما اقع او اوقعه بالموتوسيكل واعتبرت ان الركوب زي ركوب الخير وهوووب ركبت وقعد يضحك ويقولي انت بتركب كدا ليه ونفضلته وبعد ما ركبت حضنت جنب صاحبي زي ما بشوف في الافلام لقيته فلفص كدة وقالي ايه يا عم بتعمل ايه ؟
قولتله مفيش حاجة امسك فيها طيب وخايف اقع قالي يا عم امسك نفسك انت بس لكن كدا مش هينفع !
المهم افتكرت في الافلام الاجنبية ان الي بيركب ورا بيمسك في الشبكة الحديد الي ورا دي رحت ماسك فيها .
بعدين هو طلع نظارة شفافة كدا شكلها كوميدي عاملة زي بتاعة الغطس وكبيرة اوي وراح لابسها وشكله بقى تحفة بصراحة لكن عرفت فايدتها بعد كدا .
وبدأت الرحلة 35 كيلو متر
طلعنا من باب العمل الصغير مش الكبير بتاع العربيات ودي كانت اول انجازة
مشينا في الهواء الطلق متععععة ولكن ... تبدأ الحياة الواقعية بعد ما تطلع على الشارع الرئيسي
بصراحة انجاز ما بعده انجاز في الزحمة بيمشي بين العربيات زي السحلية يمين شمال ، اي حتة فاضية بيرمي نفسه فيها وطير يا معلم
لكن في سلبيات جامدة اوي الي اكتشتفها زي :
في المطبات هووووب الموتوسيكل بيعاملني كانه بيقلي بطاطس بطلع لفوق وانزل على ال ... البواسير عدل وبحس ان بطني بتسلم على زوري .
كمان الحتت الشمس ملهاش اي حل عمودية على الدماغ ومع الهوا تحس ان في حاجة ملخفنة مش مظبوطة
تحس كدا انك قلقان في وسط العربيات ومفضوح كانك ماشي بميوه في الشارع لا ازاز مداريك ولا بربريز كله في الهوا وسامع كل حاجة ولا تكييف بقى ولا عزل ولا اي بتاع
وصلنا للطريق الدائري وفتح هو السرعة وهوووووووب حصوة لبست في نص مناخيري بالظبط مش عارف جت منين ومناخيري وجعتني لكن مفيش مراية ابص اشوف اخبارها ايه وهنا فهمت النظارة الكوميدية الي هو لبسها وهنا فهمت ليه فوانيس الشبورة بتاعتنا بتتجرح في العربيات اتاري الحصو الهائم في الهواء بيلبس في اي حاجة وكانت من نصيب مناخيري المسكينة
وبعد ما عدينا الدائري ونزلنا طريقنا قولتله يا عم اركن بقى نشرب اي حاجة وطبعا ركنا في ثانية ومفيش اي مشكلة ولا دورنا على مكان ركن ولا بتاع يا دوب طلعنا على الرصيف قدام المكان الي هنشرب فيه وطبعا لقيت ايدي مخلدة من كتر ما انا مرتكز عليها .
اطمنت على مناخيري وشربنا الساقع وبصيت في الساعة واندهشت من الانجاز في الوقت لكن بصراحة انجاز لا يستحق المغامرة خصوصا ان الغلطة فعلا بفورة مفيش هزار ولا اي وسائل امان تديك اريحية وانت سايق ولا حتى وانت راكب ورا .
ودي كانت مغامرتي المتواضع مع الموتوسيكل واكيد هتردد لو اتعرض عليا عرض التوصيل دا تاني وربنا يستر على كل الي سايقين موتسيكلات و يا ريت نلتزم بقواعد الامان زي الخوذة وحافظات المفاصل وربنا يستر طريقنا وطريقكم ومهم اوي الكلاكس علشان محدش كان بيشوفنا في المرايات غير بعد الكلاكس .
وشكرا
المفضلات