افضل موتور يتجمع للفلشيا او الفيفوريت

**Ahm662** · 27-06-2013 02:07 PM

السلام عليكم اعضاء القسم الكرام ...........مبدايا موتور الفليشيا مش مضمون انك تجيبه كامل وخصوصا لو انجكشن او هاف انجكشن فانا حبيت اعمل الموضوع ده علشان الناس تبقى عارفة ايه الافضل ...نبدا علي بركة الله

1.النص السفلى (من غير فتيس )من ماتور هاف انجكشن الكود بتاعه 781.136b طب ليه (نسبة انضغاط الموتور ده 9.7 وده بيشتغل 80 بس لازم يبقى مظبوط علشان ما يتعبكش . ثانيا قدرة الموتور ده 67 حصان وده افضل اكيد من ال54 في الماتور الكاربراتير .ثالثا الدينامو بتاعه قدرته 70kw والكربراتير55 )

2.وش السليندر من موتور انجكشن لان الفينيش بتاعه من جوه افضل من اى موديل تانى (يفضل تغيير جلد الصباب لانه بيتاكل من الركنة )

3.الفتيس ممكن اي حاجة بس الفتيس ال1300 عيبه حكاية تنقيط الزيت منه فيفضل فتيس 1600 كامل بمجموعة الدبرياج بتاعته (على فكرة قاعدة الفتيس بتاعت الفلشيا مختلفة عن الفيفوريت ويا ريت حد يفيدنا فى امكانية تركيب الفتيس بتاع الفليشيا فى الفيفوريت ) ولو عايز فتيس 1300 خليك في موديلات 98 فيما فوق .

4.الكربراتير اي كربراتير بتاع فليشيا مافيش مشاكل بس يكون حالة كويسة ,ويفضل اسبراتير جديد لو حالة الاستيراد وحشة .

شوية ملاحيظ (جمع ملحوظة): -اللى عايز يجيب نص موتور كربراتير781.135 مافيش مشاكل بس من غير دينامو و اسبراتير وهات زى ما قولنا فوق (وبلاش نص موتور الانجكشن لان نسبة انضغاطه 10 وده استحالة مع ال80)

-راجع على طرمبة المياه قبل ما تسقط الموتور علشان وجع الدماغ بتاع الفك والتركيب والماتور راكب في العربية.

_غير اولسيهات الكبالن علشان ما تسربش زيت من الفتيس وراجع على شداد الموتور السفلى .

_غير الرادياتير بواحد فيكا صينى لان الردياتير ده ليه عمر افتراضى وبيفقد قدرته على التبريد

في النهاية ده موضوع من اجتهادى وبحث طويل في مشاكل موتور الفليشيا وياريت ما اكون نسيت حاجة ولو فى حاجة غلط يا ريت تراجعونى فيها .........مع تحياتى
Ahmed Helmy

**sakr_skoda** · 27-06-2013 07:50 PM

وعليكم السلام ورحمة الله وبركاته

نورت القسم استاذ احمد:-

بالنسبة لموتور الفليشيا والفيفوريت انجكشن او كاربرتير كلهم اسطنمبة واحدة معادا اختلاف الانجيكشن فى ضفيرة الكهرباء وطريقة التغذية....

بالنسبة للفتيس بيركب عادى بيتم تغير حالة قاعدة الفتيس وبيركب انا شخصيا ركبت فتيش فليشيا كومبى بنفسى على فيفورتى مع تغيير الاسطوانة والديسك ودا حتلاقى شرحة فى الموضوع دا*

http://www.nilemotors.net/Nile/320693-a.html

**أحمد جودة** · 29-06-2013 11:17 AM

كلام جميل وموضوع مفيد

بالنسبالي أنا شاري العربية متسقطلها موتور استيراد انجكشن موديل 2002 بس عامل تعديل ومركب مانيفولد وكاربيراتير

يعني العربية شغالة كاربيراتير

والحمد لله ملاحظاتي على العربية انها ممتازة جدا مع الموتور وبحط بنزين 80 عادي بدون اى مشاكل بخلاف ظاهرة التسقيف اللى ممكن تحصل معايا فى بنزين 92 لو رجلي تقيلة على دواسة البنزين

والحمد لله السحب معايا تمام وأدائها كويس وحتي السرعات العالية بجيب بيها 140 وممكن اكتر من كدة

بس عندي ملاحظة مش عارف ليها علاقة بالموضوع ولا لاء استهلاك البنزين داخل البلد وفى الزحام بيبقي بزيادة شوية بس مش كتير اوي أما على الطرق المفتوحة والسفر الاستهلاك بيبقي تمام

**المنسي** · 01-07-2013 01:41 PM

شكرا لموضوع حضرتك وياريت تقول لنا الكود بتاع الموتور ايه بالظبط

**المنسي** · 01-07-2013 03:51 PM

معلومة عرفتها من workshop skoda fleicia ان المواتير فئة 781.135B الاوكتان بتاعه 91 والموتور اللى الكود بتاعه 781.136B الاوكتان بتاعه 95 والموتور 781.136B اقصى سرعة ليه 150 وده اللى بينزل فالعربية LXI-GLXI اللى هيه الكاملة بالعربى عندنا
ودى صورة للمقارنة

**المنسي** · 03-07-2013 07:23 PM

المشاركة الأصلية كتبت بواسطة ahm662

نسبة الانضغاط صحيحة بس رقم الاوكتان ده علشان تاخد اداء كامل من الموتور (حسب الناس اللى بره ) اما عندنا فانا كان معايا فيفوريت بعتها من شهر واحد اللى فات وغيرت الموتور بتاعها فى شهر 11.2012 بواحد هاف انجكشن (بس ركبتله كربراتير) الكود بتاعه 781.136b وكان شغال 80 مافيش مشاكل بس ابتدى يظهر فيه مشاكل لان الموتور طلع تعبان فا خدتها من قاصرها وبعت العربية والحمد لله يعنى الموتور ده يشتغل 80 بس يكون مظبوط جداااااااااااااااا علشان الكركرة

كلامك صح فى جزئية الاداء الكامل للموتور ولو تلاحظ ان اللى بيستعمل 92 بيحس بفرق فى السحب واستجابة العربية