هل تغيير الباب يعيب السيارة ؟

**wahba87** · 08-07-2013 01:17 AM

السلام عليكم

امامى سيارة نيو اكسنت و محتار فى قرار شرائها

مواصفاتها كالتالى:

موديل 2010
كم : 67000 (صيانات فى التوكيل)
فابريكة دواخل
رشة جنب يمين و اكصدامين فى الخارج (لون اسود)
صالون ممتاز
كاوتش جديد
لا تحتاج مصاريف
رخصة 3 سنوات
حالة الموتور و الفتيس و العفشة ممتازة
السعر 82000 , بعد الفصال 79000 بالعافية
البائع تاجر (من سوق السيارات) و معه توكيل من المالك من 3 اسابيع

هو طبعا عمل عليا حوار ان هى بتاعة صاحبه و هو سافر و انا بابيعهاله و الكلام ده بس مش مهم

كشفت عليها و ظهر الآتى :

*العربية مغيره باب امامى يمين , و الباب الجديد مرشوش من جوه (و كان رده ان ده لازم علشان فابريكة مش استيراد) و متغير فى التوكيل , وهو مقاليش الكلام ده من الأول

*العتب فى الجانبين فيه شغل معجون و مرشوش

*البوية مسيلة (معفرة) فى مكان قفل الباب (تحت السقف فى جسم العربية نفسه و انت فاتح الباب)

الشاسيه و القوائم زيرو و فابريكة

كبس الموتور 78%

*التكييف بحالة الى تزويد فريون و ضبط البوابات اللى يتطلع هواء من تحت , لأنها بتطلع هواء حتى و انت مختار فوق بس !

العفشة و الفتيس و الحساسات تمام

تعليق البائع

كل ده ميعبش العربية و هيشيل 250 جنيه علشان اصلاح التكييف فقط و ده كده نهائى

انا بصراحة محتار , هل السعر ده معقول ولا غالى؟
هل تغيير الباب يعيب العربية؟
هل كده العربية مش فابريكة دواخل؟

ارجو النصيحة يا رجالة

**ahmedalaahosny** · 08-07-2013 01:26 AM

طب ماتبعد عنها وتريح دماغك طالما الراجل مكنش صريح من الاول يبقى بلاش وماخفى كان اعظم

**mero100** · 08-07-2013 02:27 AM

السياره معيوبه ... انصح بالابتعاد عنها تماما .. و متشتريش من تاجر ابدا .

بالسعر ده ممكن تركب لانسر بومه محترمه .. اعتقد موديل 2008 .

**jojojojo** · 08-07-2013 02:29 AM

ياباشا نصيحه مني ابعد عنها وابعد عن المستعمل خالص الناس دلوقتي معتش عندها ضمير ولا ذمه وفيه قاعده معروفه في المستعمل لو عايز تشتري مستعمل ابعد عن التجار خالص خدها من صحبها وانا ارشحلك تجيب حاجه زيرو هتريحك كتير والفلوس اللي معاك ممكن تزود شويه وتجيب فيرنا زيرو وع فكره هتلاقيها قريبه جدا من النيو الاكسنت وقطع غيارها منتشره وبالتوفيق ان شاء الله

**lad** · 08-07-2013 03:15 AM

مش مريحة واللى يكدب فى الاول اعرف ان فيها حاجات تانية بايظة بلالاششششششش منها ودور عى حاجة مفيهاش قلم بوية زى ما بيقولو

**ياريساوي** · 08-07-2013 03:28 AM

سيبك منها الراجل مكنش صريح معاك ده تاجر و دي طريقتهم

**semi** · 08-07-2013 05:31 AM

لما انت تيجي تبيعها هتأرفك جدا في بيعتها مية واحد هيجيلك ويقولك العربية مرشوشة والعربية عمله مية حادثة
ويفضل ينزلك في السعر ومش يشتري وفي الاخر هتعمل زي صاحبها هتروح تبيعها لتاجر بخسارة
لو عايز مستعمل انصحك تدور على الفبريكا عشان لما تيجي تبيعها
لان الناس دماغها تعبانه اوي في الحته دي عربية يكون عمرها 15 سنة وعايزها زيرو
غير ان التجار حرااااااااميه بمعنى الكلمة ونصيحة ابعد عنهم تماما
وبالمبلغ اللي بتقول عليه اشتريلك فيرنا زيرو والله احسن من مية عربية مستعملة