الموضوع: شوية ملاحظات على الريو الجديدة

السلام عليكم ورحمة الله وبركاته
انا الحمد لله استلمت الريو سيدان 2013 هاى لاين وكيل طبعا بعد حيرة كبيرة بين كذا عربية انا كنت حاجز الاليزيه فى الاول بس لما لاحظت عدم التزام الوكيل باى كلمة من كلامة وعدم صراحته مع العملاء فلغيت الحجز وقلت اشترى البيجو 301 طبعا كانت استلام فورى ب 140 الف جنيه ووصلت ل 143 كمان فى بعض المعارض وبالصدفة وانا معدى قدام الطارق لاقيت عنده الريو الهاى لاين هاتش باك صراحة حسيتها اشيك من الخارج والداخل الخامات انا شايفها محترمة والكماليات اكتر بكتير من البيجو انا كنت ناوى اشترى الهاتش باك بس صراحة شنطتها صغيرة اوى عشان كده جبت السيدان واقتنعت بيها اكتر دلوقتى انا كان نفسى فى اللوت الابيض بس ملقتش غير الاسود والبترولى و الفيرانى والنبيتى فجبت النبيتى شكله عليها جميل ما شاء الله والحمد لله اختها بعد الخصم عاملة 142 الف العربية لسه مامشتش بيها تقريبا عامل 400 كيلو بس ليا كذا استفسار بالنسبة للفتيس الاتوماتيك عشان دى اول مرة اسوق اتوماتيك وهى
1 العربية لما بكون ماشى على ال D او ال R واجى انقل لل N او p تحس اكنها كانت دايرة وبطلت طبعا هى بتكون لسه دايرة بس عند النقل بتحس ان الموتور اكنه وقف وفيه سنة رعشة خفيفة اووى محدش حيلاحظها الا لو مركز اووى مع العربية والموضوع ده انا ملاحظه من اول ماجبت العربية
2 وده لسه ملاحظه النهاردة فامش عارف اذا كان موجود قبل كده ومكنتش اخد بالى منه ولا دى حاجة جديدة وهو انا لما بجيب ال p عشان اركن بسمع صوت تكة من ناحية الفتيس تقريبا فامش عارف ازاى كانت التكة دى عادى ولا دليل على وجود مشكلة بس صراحة انا قلقت لحسن يكون فى حاجة فى الفتيس لاقدر الله
3 انا مثلا لما بكون واقف فى اشارة وببداء اتحرك مثلا وماشى على سرعة 20 اول اقل بحس ان العربية بعد فترة سرعتها بتزيد بدون مازود ضغط رجلى على دواسة البنزين فا مش عارف هل ده بيحصل لما مثلا العربية بتاخد الغيار التانى بدل الاول ولا ايه بالظبط
4 ودى اخر حاجة معلش زهتكوا معايا انا بسمع صوت زى رفة كده فى العجل من ناحية الشمال بقالى يومين مش عارف ده سببه ايه

واخيرا اسف على الاطالة

الفتيس زي الفل وكل الاتوماتيك كده الصوت اللي بتسمعه ده ده لوك الفتيس واي حاجه تانيه انت ذكرتها طبعيه جدا استمتع بالعربيه ومتنساش تجيب كسوه جلد للصالون والارضيه عشان تحافظ علي فرش الفبريكه والف مبروك