الحمد لله اشتريت الجميلة ال m 11

**tarekhassan88** · 22-07-2013 10:55 PM

باركولى يا احبابى النهارده اشتريت عربيه m 11 موديل 2011 و عامله 25000 كم

البداية انى معجب بالعربيه دى من فتره طويله و كانت هى اللى داخله دماغى و خصوصا انها كانت مع واحد صاحبى قبل ما يبعها و يجيب ماتريكس الجديده

المهم بعد فتره بدات افكر فى البى واى دى و فعلا اقتنعت بيها لانها منتشره اكتر و اوسع و خصوصا انى كان معايا نوبيرا فكنت بقارن و سعها بالنوبيرا

و بدات فعلا اتابع على النت و فى السوق البى واى دى علشان اشترى عربيه تكون كسر زيرو لكن محصلش نصيب فى كذا عربيه شفتها

رجعت تانى ابص على الام 11 لحد ما لقيت عربيه معروضه على النت من حوالى شهر موديل 2011 و عامله 25000 كم بس وقتها كنا داخلين على يوم 30 يونيه فقلت مش هتكلم دلوقتى صاحب العربيه

و لما بدات احس ان الدنيا الحمد لله بدات تستقر فكلمت صاحب العربيه يوم السبت و اتفقت معاه انى اشوف العربيه بالامس الاحد بعد الفطار و فعلا اخذت معى ميكانيكى العائله اللى بثق فيه و رحت قابلت صاحب العربيه فى مدينة نصر و فى اثناء ذهابى الا هناك كلمت اخى المحترم باسم نجيب و اللى قلى نصيحه هامه و هى انى ارفع العربيه فى بنزينة كالتكس اللى على تقاطع مصطفى النحاس مع عباس العقاد و فعلا عملت بنصيحته و الحمد لله طلعوا ناس ممتازين جدا و كشفوا على العربيه بالكامل و عملى تقرير بان حالة العربيه جيده و ان فيها رفرفين الامامين رشين و رفرف خلفى يمين راشش

بعد كده اتكلمت مع صاحب السياره على الثمن و على فكره هو كان طالب 58000 جنيه و توصلنا لسعر اتفقنا عليه و هو 53000 جنيه

النهارده الصبح اتقابلنا عند شهر عقارى سوق السيارات و عملى عقد مسجل و استلمت العربيه و الحمد لله

شوية ملحوظات على الماشى

صاحب العربيه معملش صيانة 20000 كم فان شاء الله هروح اغير لزيت وولف و ابص على باقى الزيوت عندهم ان شاء الله ( العربيه كده خارج الضمان )

ان شاء الله هبص على الكاوتش و احتمال كبير اغير يا فردتين كاوتش يا الاربعه كلهم بالمره حسب حالة الكاوتش اللى راكب

هعملكم تقرير عن كل حاجه هعملها ان شاء الله

شكر خاص لاخواتى باسم نجيب و هيما على مجهودهم معايا و اكيد لسه هتعبهم تانى

و شكر لكل من شارك بمعلومه فى هذا المنتدى الرائع و لكل المشرفين و القائمين عليه

**M I D O** · 22-07-2013 11:36 PM

الف الف مبروك يا غالي وربنا يحفظهالك ويعطيك خيرها ويكفيك شرها ومنتظرين التقارير وصور للعربية وتقييم مبدئي عنها

**hugan** · 23-07-2013 12:27 AM

10000مبروك ربنا يعطيك خيرها ويكفيك شرها
اظن الكاوتش مش محتاج تغيير
استني شويه علي كلامك العربيه عامله 25000
يعني الكاوتش ممكن يشتغل معاك 20000 كيلو
صيانه العشرين هاتكون عباره عن مراجعه السوائل والزيوت
وتغيير قلتر هواء
فلتر بنزين
بوجيهات
وتربيط عفشه

**bassem.naguib** · 23-07-2013 01:27 AM

ألف مبروك يا طارق باشا .. وربنا يديك خيرها ويكفيك شرها ويباركلك فيها يا رب .

أنا رأيي زي رأي أ/ هوجان أنك تستنى على الكاوتش شوية وخاصة أن العربية ماشية 25 ألف بس يعني ممكن تصبر عليه 5 أو 10 آلاف كم كمان .

ومفيش شكر ولا حاجة وكلنا زي ما بتقول اخوات وبنساعد بعض إن مكنش بالفعل فبالمعلومة .. وربنا يديم الروح دي في المنتدى العامر بيكم .

**tarekhassan88** · 23-07-2013 03:45 AM

المشاركة الأصلية كتبت بواسطة hugan

10000مبروك ربنا يعطيك خيرها ويكفيك شرها
اظن الكاوتش مش محتاج تغيير
استني شويه علي كلامك العربيه عامله 25000
يعني الكاوتش ممكن يشتغل معاك 20000 كيلو
صيانه العشرين هاتكون عباره عن مراجعه السوائل والزيوت
وتغيير قلتر هواء
فلتر بنزين
بوجيهات
وتربيط عفشه

شكرا هوجان باشا على نصيحتك و معلوماتك

هو الحقيقه الميكانيكى اللى بتعامل معاه هو اللى قلى على موضوع الكاوتش وفعلا لما وضحلى لقيت كلامه صح و فى فردتين تعبانين جدا

فى بقه سؤال مهم لانى مكنتش عارف انى المفروض اغير البوجيهات فكنت عايز اعرف اشتريهم من فين و هل اغيرهم قبل تغير الزيت و لا مش هتفرق

و شكرا مقدما

**tarekhassan88** · 23-07-2013 03:50 AM

المشاركة الأصلية كتبت بواسطة m i d o

الف الف مبروك يا غالي وربنا يحفظهالك ويعطيك خيرها ويكفيك شرها ومنتظرين التقارير وصور للعربية وتقييم مبدئي عنها

ربنا يبارك فيك ميدوووووووووووو باشا و عقبال ما تجيب عربيتك الجديده

و ان شاء الله هكملكم كل حاجه عن العربيه و هقول كل حاجه ان شاء الله

**eleanor** · 23-07-2013 04:30 AM

الف مبروك وربنا يزيدك ويباركلك فيها ويكفيك شرها ويديك خيرها

**M I D O** · 23-07-2013 04:57 AM

المشاركة الأصلية كتبت بواسطة tarekhassan88

ربنا يبارك فيك ميدوووووووووووو باشا و عقبال ما تجيب عربيتك الجديده

و ان شاء الله هكملكم كل حاجه عن العربيه و هقول كل حاجه ان شاء الله

ربنا يخليك يا باشا وان شاء الله انا ناوي علي ام 11 برضو بس جديدة ومستني من حضرتك تقرير بقي عن العربية بس مش دلوقتي قدام شوية عشان نشوف عاملة اية معاك وربنا يحفظهالك

الموضوع: الحمد لله اشتريت الجميلة ال m 11

LinkBack

أدوات الموضوع

عرض

-

-

-

-

-

المواضيع المتشابهه

عملت حادثة بسبب المطبات الجميلة !! الحمد لله

الحمدلله ربنا وفقني انهاردة وانضميت لأسرتكم الجميلة بميجي 2008 الجميلة :)

الحمد لله .اشتريت بريسونا الجميلة .وعندى اسئلة رجاء الافادة

الحمد لله .. استلمت الجميلة 2

الحمد لله بنوتى الجميلة frv تحت البيت

الكلمات الدلالية لهذا الموضوع

المفضلات

المفضلات

ضوابط المشاركة