الموضوع: للخبراء والدكاترة : هل هناك علاج لمحبين الكركبة... واصحاب هواية تخزين الملابس !!!

موضوع هايل فكرنى باخر مرة تخلصت فيها من كراكيب واشياء كتير حسيت بعدها براحة نفسية رهيبة .. عشان كده بنصح اى حد عايز يعمل ريستارت لحياته ويخطط لبعض الاهداف انه يتخلص من الكراكيب والاشياء اللى ملهاش لازمة .. اى شئ وكل شئ طالما مش بيخدمه فاكيد هيعطله او على الاقل مش هينفعه وهياخد حيز بدون فايدة

كان عندى صنارة اشتريتها ومطلعتش بيها طلعتين بعتها
راوترين زاحمين الدنيا بعتهم
2 صب ووفر فتحتهم وفكيتهم حتة حتة وفى الاخر كسرتهم ورميتهم
صور قديمة بتخنقنى ولعت فيها
بعض الالكترونيات وراديوهات ترانسستور
دراعات بلاى ستيشن ومواتير لعب اطفال وريموتات وحاجات كتييير
عشرات الامتار من سلك النت ووصلات مختلفة
كتب مش محتاجها
رسيفر قديم
لوح مفاتيح فيها اللى شغال وفيها اللى بايظ
اوراق وحاجات ملهاش لازمة
كله يا اما بعته او رميته او فكيته وكسرته ميت حتة (حب استطلاع) :)
و الملابس الجديدة غير المستخدمة اتبرعت بيها لرسالة
حتى الارقام اللى عالموبايل حذفت كتير منها لاسباب او لاخرى (فلترة)

ومش عاوز اقولك على كم راحة البال بعد الموضوع ده
دى دعوة للتخلص من الكراكيب والاشياء غير المستخدمة فى الحياة
جرب وانت الكسبان

ايوه انا عندى نفس الحالة دى

لو حد نضف الاوضه بتاعتى معرفش الاقى حاجتى فيها خالص
يعنى ترابيزة الرسم الهندسى - ترابيزه الكمبيوتر - الكومودينو - فوق الدولاب دى اماكن محظوره لو حد وضبها اتوه فى الى عليهم

و عندى من الكراتين الكثير و الكثير و الكثير

ياترى فى علاج للحالات الى زى دى

موضوع جميل يا جماعة ، انا مؤخرا بقيت اجمع كل ما هو يندرج تحت بند كراكيب او شىء لن يتم استخدامه و بقيت اجمعه عند باب الشقة و اكلم جمعية خيرية لتاخذهم جميعا ، و هذا الصراحة فرق ، مع ان المسألة تحتاج الى مرات عديدة من هذه العملية حتى يصبح مكان سكنك ملائم ، المسألة ديه صحية جدا جدا ، و عدم التخلص من كل ما هو مستخدم سوف يؤدى بك الى وضع اشياء قيمتها الحالية بعد تقادمها 50 جنيه مثلا فى مساحة 2 متر مربع فى الشقة سعرهم 3000 جنيه فى المتوسط ، و هذا طبعا غير مقبول ، العين نفسها لما بتاخد على الكراكيب بعد فترة مش حتحس ان فيه مشكلة ، في حين ان اللى بيحس بيها هو اللى بيبقى جاى عليك و يشوف الوضع المأساوى الذى تعيشه ، و هذا ما يحدث مع معظمنا ، لى صديق قام مؤخرا بترجمة كتاب اجنبى اسمه عبودية الكرايب ، و من اسم الكتاب يتضح ان الموضوع ليس بسهل و يعتبر ادمان و التخلص منه بالوسائل التقليدية لن يصلح ، ان شخصيا مع حرصى على التخلص من اشياء بانتظام و لكن اشياء كثيرة جدا لازالت على اللائحة ، مؤخرا ابتديت اشترى كراتين فارعة لتخزين كل ما هو ليس مستخدم ، علشان الشكل العام و بعد فترة اعتقد انى ممكن اتخلص من الكراتين ديه واحد تلو الاخر ، مع انى اهوى بعض الهوايات التى تحتاج الى اشياء كثيرة و اجزاء وتفاصيل كثيرة تتراكم حولى ، لكنى احاول السيطرة على رغبة الاحتفاظ بنثريات كثيرة و احاول الرجوع الى مبدأ تخلص من ما هو ليس مهم كلما امكن