الموضوع: خواطر رمضانية

مع الصيام و صفاء الذهن و الروح ربنا بيفتح علينا ببعض التأملات والخواطر الخاصة بالشهر الكريم ممكن لما نيجي هنا نتشارك فيها تعلي من إيمانياتنا أو تنبه حد منا لحاجة ماكانش واخد باله منها مثلا.

الخاطرة الأولى لأول أيام الصيام جت على بالي النهاردة مع أذان المغرب و ارتوائي بكباية مية ساقعة تروي عطش اليوم كله.. و لما بدأت أسمي بالله و آكل البلح و حسيت بالارتواء اللي جه على بالي ساعتها ان ياااااااااااااه.. كل تعب و معاناه و ليها نهاية.. كله بينتهي و بيعدي.. مهما عانينا وتعبنا و مرينا بأزمات و حسينا ان الدنيا بتنتهي هنا لازم ييجي يوم لكل المعاناة دي انها تنتهي.

و زي ما بنفضل طول نهار شهر رمضان في جوع و عطش و بنيجي على آخر رمضان و في ليلة القدر نحس بحلاوة العبادة و القرب من الله و الجايزة في الدنيا بتكون فرحة العيد واحساس القبول من الله.. هي برضه الدنيا كده.. كل تعب و معاناة بيعانيها الإنسان بتمر والحساب في الآخر.. هي كده كده هاتعدي.. انما هانطلع من الأزمة كسبانين و لا خسرانين.. هو ده اللي بيميز الناس من بعضها.

اللهم اجعلنا من الفائزين يا رب.