مشكلة في إستهلاك البنزين محتاج إفادة

**sherifsewailm** · 03-08-2013 03:10 PM

مساء الفل دكاترة الصني..رمضان كريم

أنا إشتريت صني 2006 أوتوماتيك إكس صالون

العربية بتقطع تقريبا 7.5 كيلو أو 8 كيلو في اللتر بالتكييف ببنزين 92..عندي إحساس إنها كده زاطت و هأبدأ أتضايق منها لأن البنزين مش متوفر بسهولة في المنوفية و بأظطر أقف الطوابير المعهوده المقرفة أكتر من الأول عشان أشربها بنزين.

أنا كان معايا صني 2001 و هيا كانت مانيوال 1300 سي سي..أنا عارف إن طبعا لازم يبقى فيه فرق في الإستهلاك عشان موتور أضعف بس بجد العربية القديمة كانت بتقطع تقريبا 12 لتر في الصفيحة على الرغم من إنها مانيوال...هو مش المانيوال يستهلك بنزين أكتر من الأتوماتيك بردة؟!

ولا أنا غلطان وتقديري للموضوع غلط ...أرجو الإفادة عن ما إذا كان الإستهلاك كده طبيعي أم لا و لو مش طبيعي هل ممكن حد يدلني ع الأسباب اللي تخليها تستهلك اكتر....ملحوظة العربية ماشية بجنوط سبور 16 و كاوتش سرعات مقاس 195 مش مقاس المصنع العادي.

**kazamodia** · 03-08-2013 05:36 PM

الصني معروف انها بلاعة بنزين واسهلاكها عالي جدا
وطبعا الاوتو هو اللي بيستهلك بنزين اكتر مش المانيول

**Msanad** · 03-08-2013 06:01 PM

استهلاك البنزين بيعتمد على السرعة وظروف التشغيل لو فيه تكييف او فاتح النوافذ زى ما هو معروف - وطبعا معروف ان السرعة اكتر من 90 كيلو تقريبا بيزيد فيها استهلاك البنزين اكثر - مثلا انا معايا الصنى 2013 - معدل استهلاك البنزين لو ماشى على طرق كويس مفيش اشارات ومش معدى ال 90 بيكون فى حدود 6 لتر لكل 100 كيلو وده بيبان من كمبيوتر الرحلات - غير كده الظروف بتاثر وساعات بتوصل 7 لتر

**wama00** · 03-08-2013 06:02 PM

نفس المعدل عندى اللتر بيعمل 7.5 كم وساعات 6 كم

**hassanin_lada** · 03-08-2013 06:57 PM

طبيعي جدا واستهلاك معقول طالما في نص البلد

**Youssef.Awad** · 05-08-2013 06:37 PM

حضرتك غلطان لأن الاتوماتيك بيستهلك بنزين اكتر من المانيوال

سؤال: هل طريقة الحساب اعتمادا على قراءة امبير عداد البنزين او كومبيوتر رحلات او طريقة يدوية وهى الاصح تفويل من مكان وسير والعودة لنفس المكان وتفول مرة تانية مع حساب كام لتر فى كام كم

كمان تغيير مقاس الجنوط والكاوتشات بيأثر لكن بنسبة لا تتجاوز 7% من الاستهلاك

من فضلك راجع موضوعاتى عن قراءات عداد بنزين الصنى n16 من 2002-2013 واستهلاك البنزين على مدار سنة ونص لمانيوال واتوماتيك بالتاريخ واللتر والمسافات

تحياتى ولا تضحى بعربية محترمة امان فى سبيل بضع جنيهات لا تغنى ولا تفيد