الموضوع: تجميع بيانات اوكتافيا a4 بالتفصيل

باعتذر عن تأخري عشان كنت شغال شيفتات ليل هاحكيلكم اللي حصل معانا في مشوار بورسعيد.
الحمد لله اشترينا لفريبي اوكتافيا A4 مو 2000 اوتوماتيك GLX i
ودي بعض الصور وباعتذر عن عدم احترافية الصور

طبعا اخر صورة دي صورة الاستيكر الملزوق جنب الاستبن تحت فرش الشنطة علي الشمال بتعرف منه رقم الشاسية وموديل السنة وفئة السيارة وقدرة الموتور وده طبعا ساعدني في اكتشاف عربية متسقط لها موتور مش بتاعها اساسا."ده مش استيكر العربية اللي جبتها"
اول ما هتنزل من الكوبري اللي بيدخلك بورسعيد هيصتادك السماسرة فحاول تخلع منهم وتلف براحتك وتشتري من المكان اللي يعجبك وترتاح لشغله وياريت تكون ناوي علي عربية معينة وتكون عارف كل حاجة عنها بالتفصيل او اللي يكون معاك يكون بيفهم قوي لانهم بصراحة يسرقوا الكحل من العين.
........معرض كريستال
في واحد هناك معوق اسمه دكتور علاء صاحب معرض اتفرجنا عنده علي عربية مو 2000 SLX كاملة اتو شفت ال VIN code بتاع العربية لقيت الموتور 92 كيلو وات والموتور اللي في العربية 1600 سي سي طبعا انا كنت عارف ان 1600سي سي 75 كيلو او 74 كيلو وبالتالي دي عربية كانت نازلة بمكنة 1800 سي سي ومتسقطلها موتور مش بتاعها وبالتالي سبناه ومشينا لاننا قلقنا منه

........ معرض ابو المعاطي عنده عربيات كويسة بس بيحاول يقنعك باي حاجة لما يلاقي فلوسك اقل من الحاجة اللي انت عاوزها او تعجبك وحاول يلبسنا في عربية سيات توليدو

........معرض البدري موتورز في مخزن علم الدين صاحبه ولد جنتل اسمه ايهاب البدري عربياته كويسة وبيريح الزبون علي الاخر ولو فيه حاجه ناقصة في العربية بيكملهالك زي مانت عاوزويسيبك تشييك علي العربية براحتك خالص وغيرلنا الاستبن بواحد جديد ودورلنا علي المفتاح الاحتياطي مربوط في اتيكر عليه رقم الشاسيه بتاع العربيه وكان فيه الفانوس الامامي واحد فيهم مش اصلي ومفيهوش الموتور اللي بيرفع النور ويوطيه غيرهولنا بواحد أصلي كان راكب في عربية تانية ودي برضو حاجة لفتت نظري ان مش كل العربيات عربيات بكر فلازم تركز اوي في العربية وانت بيتفحصها ولو تعرف تاخد حد معاك بجهاز الفحص اللي بيشيك علي الكنترول موديول بتاع العربية يبقي افضل لان بمجرد ما تدفع الفلوس وتخلص ورقك خلاص لو طلع في العربية مشكلة مش هيرجعالك بالساهل.هو قالنا خد العربية فولها ووديها مركز اسمه الالمانية افحص عربيتك فيه ولو فيها حاجة بتاعتي لكن اعتقد انه كلام بس .
طبعا فولت العربية من بورسعيد ولغاية ما وصلت بني سويف 310 كيلو استهلكت نصف التانك هل ده استهلاك كويس؟
ثانيا بقي المفروض اعمل ايه؟
زيوت ايه افضل الانواع لو هاحط 1000 او 3000
وفلاتر وسيور ومياه تبريد والاسعار
ياريت بقي نصايح بالتفصيل عشان العربية ما تزعلش صاحبها وادعولي انا كمان ابقي عضو اوكتافياوي معاكم

بالنسبة للاسعار
A4 من 45000 وطالع حسب الحالة ده طبعا للمانيوال.
A5 مو 2005 كان فيه حاجة ب 80000 وده طبعا قبل الفصال
الاتوماتيك عموما هتلاقي سعره رافع خصوصا لو حالته نضيفة وهما هناك بيعتبر انك جاي تشتري من عندهم عشان الحالة ف عادي لو سعر العربية عندهم وصل لسعر السوق بره
ماتريكس 1600 سي سي مواصفة الماني مو 2004 ب 4800
اوبترا 2002 48.000
النترا 2002 46.000
دي بعض الاسعار قبل الفصال

بالنسبة لمياه التبريد انا اعرف انها مياه حمرا.طيب لو الموجود في اربة المياه مياه خضراء عادي لو زودتها بمياه حمرا ولا لازم افضي المياه القديمة خالص

هو مفيش حد يرد عليا ليه مع ان المشاهدات كتير

شكرا ليك وربنا يبارك فيك يا استاذ عمرو طيب وبالنسبة للزيت انا سمعت ان فيه زيت شل احمر واصفر مين الافضل؟؟؟ معلش لاني جديد في موضوع العربيات