الموضوع: خلاص انا ههاجر يعنى ههاجر ومش راجعها تانى بجد

بص يا مصطفي ......

بسم الله الرحمن الرحيم " والكاظمين الغيظ والعافين عن الناس أولئك لهم مغفرة وأجر عظيم " صدق الله العظيم

قال رسول الله صلي الله عليه و سلم " ليس الشديد بالصرعه انما الشديد الذي يملك نفسه عند الغضب " صدق رسول الله صلي الله عليه و سلم .... كلمه الصرعه هنا المقصود بيها التصارع .يعني الخناق و الضرب .



1- هيه دي تعاليم ديننا
2- الأيه الكريمه و الحديث الشريف بذكرك بيهم و بذكر نفسي و بذكر كل الناس اللي بتقرأ الموضوع .
3- لو كل الشباب و الناس عملت زيك كده يبقي البلد كلها حتولع .
4- غلط في كل الاحوال انك تشيل مطواه ... عالاقل عشان لو اتفتشت في لجنه مباحث حتلبس قضيه حيازه سلااح ابيض ... و انت عارف االظروف اللي بتمر بيها البلاد .
5- في ظل المطواه و جركن البنزين و الولاعه ... كان ممكن ترتكب جريمه قتل .. و مش حتقتل فرد واحد ... لا دا انت ممكن تولع في كذا واحد و كذا حد ... تخيل الولد ده ولعت فيه و جري في الشارع .... متخيل المنظر ؟؟؟؟
6- مش كل واحد كلمنا بطريقه وحشه يبقي نموته .
7- اي واحد صاحب موتوسيكل بصفه عامه في مصر بيبقي حاسس انه اقل من اللي راكب عربيه .. و بيحسس نفسه انه راكب عربيه لامبورجيني ... و بيحاول ياخد حق الموتوسيكل بتاعه في الركنه زيه زي العربيه ... ف انا رأيي لازم نتعامل معاه بشيء من اللطف ... و لامانع من الابتسامه في وجهه عند طلب انه يبعد الموتوسيكل شويه . و ده من باب " تبسمك في وجه اخيك صدقه " .
8- لكن انت والدك اكيد كلمه بصوره ضايقت الولد و خلته يعند من باب ان الشارع ملكيه عامه و من حقه يركن في اي مكان .
9- لا اعيب في والدك لا سمح الله و لا افترض انه بيكلمه بطريقه سيئه و لكن انا بحاول اتخيل الحوار و اصورلك ان كل شيء ممكن يتحل بشيء من اللطف و الابتسامه و التسامح .
10- سيدنا محمد عليه الصلاه و السلام كان بيتعامل مع عرب من الجاهليه و كفار و يهود و كان بيتأذي منهم ... ارجو ان احنا كلنا نقتدي بأخلاق سيدنا محمد عليه الصلاه و السلام في اقوالنا و افعالنا ... و الا ستصبح مصر غابه .
11- لازم كلنا نبقي سفراء لديننا .... بالتعامل الصالح و كل واحد ينشر الاخلاق من خلال معاملاته مع الناس ... و الحل مش ان الناس تهاجر و تسافر و تسيب البلد .

نفس الموقف حصل معايا امام منزلي و الموتوسيكل كان واقف بطريقه تغيظ بصراحه ... و انا ندهت الاخ صاحب الموتوسيكل بكل استعلاء ...و قولتله ايه اللي انت عامله ده ياعم ... ماتركن موتوسيكلك بين عربيتين ....لازم تعرضها و تاخد مكان عربيه ؟؟؟...... الراجل بصلي بصه و كأنه عاوز يولع فيا .....و شال الموتوسيكل و مفتحش بقه .... اانا حسيت اني جيت عليه نفسيا .... ركنتت و نزلت من عربيتي و شكرته و انا بضحك ... قاللي احنا بنزعل ( و خد بالك من كلمه احنا دي ...يقصد بيها مالكي الموتوسيكلات ) ...قاللي احنا بنزعل لان كل واحد صاحب عربيه بيبهدل فينا ... و شيل الموتوسيكل و زق الموتوسيكل .... طبطبت علي كتفه و قولتله حقك عليا لو ضايقتك و انا بشكرك ... قاللي انت تؤمر .

انا لومت نفسي و اكتشفت لما قعدت مع نفسي كل اللي كتبتهولك في النقاط من 1 الي 10 .