استلمت صنى 2013 الشكل الجديد 5/8/2013 و هرجعها للاسباب التالية و هاخد فلوسى

**khaledamr.90** · 09-08-2013 05:39 PM

LeitoSR متشكر جدا يا رايس والله انا مش قافش ولا حاجة بالعكس انا بضم صوتى لصوتك فى موضوع الناس المتعلمين اللى بيضحك عليها اوعى تكون فاكر انى قفشت والله ابدا . و بعدين انا مهندس ميكانيكا و بعيد شوية عن المجال العملى جدا زى موضوع الصاج و الكلام دة , عموما انا اتشرفت بمعرفتك والله و معرفة جميع الاعضاء و مستنى الردود من الاعضاء

**khaledamr.90** · 09-08-2013 07:57 PM

الحمد لله وصلت لواحد مسئول فى المعرض و ادانى كلمة ان العربية هتتبدل و على ضمانته الشخصية ان شاء الله رايح يوم الاحد استبدلها , معرض محترم و امين و توكيل و تقفيل سيىء

شكرا للمشاركة و الافادة

**Ahmed Amin** · 09-08-2013 10:25 PM

المشاركة الأصلية كتبت بواسطة khaledamr.90

LeitoSR متشكر جدا يا رايس والله انا مش قافش ولا حاجة بالعكس انا بضم صوتى لصوتك فى موضوع الناس المتعلمين اللى بيضحك عليها اوعى تكون فاكر انى قفشت والله ابدا . و بعدين انا مهندس ميكانيكا و بعيد شوية عن المجال العملى جدا زى موضوع الصاج و الكلام دة , عموما انا اتشرفت بمعرفتك والله و معرفة جميع الاعضاء و مستنى الردود من الاعضاء

الشرف ليا, ومحصلش حاجة. :)

المشاركة الأصلية كتبت بواسطة khaledamr.90

الحمد لله وصلت لواحد مسئول فى المعرض و ادانى كلمة ان العربية هتتبدل و على ضمانته الشخصية ان شاء الله رايح يوم الاحد استبدلها , معرض محترم و امين و توكيل و تقفيل سيىء

شكرا للمشاركة و الافادة

ألف مبروك يا باشا,
والله ناس محترمين,, متناساش بقي تبقي تحكي لنا علي باقي التفاصيل لما تستلم عربيتك الجديدة وتبص عليها كويس من كل النواحي وتجرب تكييفك وتبص علي العربية من تحت وعلي حوض موتورك وكل حاجة.

**Ahmed_m7md_A5** · 11-08-2013 09:01 PM

المشاركة الأصلية كتبت بواسطة khaledamr.90

استلمت صنى 2013 الشكل الجديد 5/8/2013 و هرجعها للاسباب التالية,,

الباب ال جنب السواق مفارق حوالى 10 mm عمودى على مستوى جنب العربية , و فى صوت رخم اوى فى الفتح و الاقفل

باب السواق تقيل, يعنى كدة البابين تقال منهم واحد فى صوت فى الفتح و القفل

ضبطة الاكسدام مع الفنوس الشمال مفارقه حوالى 5mm و شكلها باين و رخم

التكيف على واحد و اتنين بيفصل كل 10 ثوانى و بيشتغل تانى بس مش علطول بيعمل كدة

العربية كدا ال يشوفها شكلها مخبوطة و متصلحة عند سمكرى معفن

استلمت عربية معيوبة و انا لسه ملف العربية هاستلمه بعد العيد و العربية مترخصتش ,, العيوب دى تعتبر عيوب تقفيل و ضبط ابواب فقط ولا العربية مخبوطة و متصلحة فى التوكيل و نزلت السوق تانى ؟؟

حاجة سيئة جدا, انا فقدت المصداقية مع الشركة و المعرض عشان يطلعوا عربيات فيها العيوب دى و نايمين مش شايفين شغلهم , انا هابعت شكوى ل نيسان الام بصور العيوب و تقرير كامل بيها .

هل من نصائح ؟

ايوه ابعت فيهم عشان يطلعوا عين ابوهم مصريين مينفعش معاهم توكيلات خالص

**Youssef.Awad** · 12-08-2013 05:21 AM

السلام عليكم يا باشمهندس .. لى بعض النقاط العامة والخاصة بنيسان اود عرضها كالاتى:

1. الافضل فى الشراء التعامل مع الوكيل مباشرة او موزعيه المعتمدين .. لرسمية التعامل معهم لا قدر الله فى حال ظهور عيوب صناعة زى اللى ذكرتها .. لأن معارض كتير جداااا بتتعامل فى العربيات التالفة من النقل والشحن والتفريغ ودى رسميا سعرها بينزل عن اختها اللى بحالة ممتازة من الوكيل وبكده المعرض واخدها باقل من ثمنها وبيبيعها فى نفس الوقت باوفر برايس بحجة الاستلام الفورى او توافر اللون المراد من قبل المشترى
2. كون العربية عدادها اكتر من 90 كم .. تأكد تماما انه كداب لما قالك انه جابها على ساطحة لأن العربية دى جاية سواقة من المصنع فى 6 اكتوبر او اى مكان تانى لحد المعرض .. واى عربية زيرو منقولة على تريلا او كاسحة ما يكونش عدادها ماشى اكتر من 20 كم بأى حال من الاحوال .. والخوف فى الحالات دى هو السواقة المتهورة ليها وعدم الاكتراث بالمشترى اللى ياعينى اول ما يستلم يقعد يحسس ويحافظ وهما بيقرصوا عليها وانا بنفسى باشوفهم طايرين فوق ال100-120 وغرز على الطريق الزراعى والدائرى واكل مطبات ونقر وكل اللى نفسك فيه !!!
3. من حق حضرتك انك ترجع العربية خلال 14 يوم من تاريخ فاتورة الشراء حسب توصيات حماية المستهلك وباسباب طبعا والافضل ان حضرتك كنت فحصت العربية كويس وقت الاستلام ورفضت استلامها مهما كانت الضغوط او الظروف .
4. وارد جدااا ان حضرتك بحكم المهنة - وده عرفته من القياسات اللى ذكرتها اول الموضوع بالمللى قبل ما اكمل قرايته - وانك دافع مبلغ محترم ونازل من مستعمل لزيرو انك تكون موسوس شوية او حساس شويتين جهة الملاحظات دى خاصة ان العربية جديدة عليك عن لو كنت بتشترى انت راكبها قبل كده ومجربها وعارفها .. وده مش عيب ابداااااا .. وكل واحد فينا بياخد وقت على ما يتعود فى الاول وفيه اللى مش بيتأقلم ونفسه بتقفل من العربية وفيه العكس اللى بيزداد اعجابه بيها وبيتمسك بيها مع الوقت مهما حصل
5. ممكن حضرتك تروح اى مركز خدمة معتمد لنيسان قبل الترخيص وتكشف عليها .. وانا متأكد ان فروقات الابواب والصوت ممكن اصلاحهم على الضمان بدون اى تكاليف فى اى وقت او مع اول صيانة تروحها باذن الله
6. نصيحة لا تقارن بين عربيتك القديمة وعربيتك الجديدة لا شكلا ولا موضوعا عشان ما تتعبش والخيرة فيما اختاره الله لك
7. موضوع فصل كومبريسور التكييف طبيعى جداااا فى النيسان عموما والصنى خصوصا .. والعبرة بالتبريد والتأثير على الموتور وليس بالصوت

تقبل تحياتى والف مبروووووك لو رخصت على خير وربنا يعوضك بغيرها لو قررت انك ترجعها فعلا

**ramymoharram** · 12-08-2013 11:28 AM

يا باشا العربية دي فيها حاجة غلط أنا شاري نفس العربية ومستلمها زي المسطرة من سمير ريان ......مترخصش واطلع علي حماية المستهلك وروح المعرض واعمل هليلة.....بس حقك كنت تستلمها منهم صح.....أنا اقعدت استلمها من سمير ريان في 3 ساعات والناس كانوا زي الفل وسابوني اعمل اللي أنا عاوزه قبل مستلمها

**gold_777** · 14-08-2013 12:19 AM

السلام عليكم
العربيه مزعلاك فى حاجه لسه
موضوع الباب والدهان
ده عيب تقفيل طبعا وفى فى جميع السيارات النيسان الجديده لازم تلاقى با اما عيب فى مفصلات الابواب يا اما الكابوت
ريح نفسك وقبل ما تطلع على حماية المستهلك لازم تكون متاكد من كلامك روح اى مركز معتمد وامشف على الدهان والصاج ...
لو فى حاجه ساعتها تقدر تتكلم بس اتاكد
بالنسبه للكيلو متر طبعا كتير والعيال اللى بيجبوها للصاله عياله تعبانه بينحر فيها انا شوفتهم
انا مستلم برده العربيه كانت عامله 80 ك .م
لفيت عليها لفه وكان بالنهار الحمد ﻷه كانت معقوله بس انا كنت عارف بن كان فيها فرق من عند الكابوت عادى هعمل ايه انا شوفت كذا عربيه كده
بالنسبه للتكبف عادى كله كده وبعدين انا راكب جوه مالى ومال الفصل وصوته
وبعدين تكيفها هتلاقيه ضعيف فى الاول ومش زي ما انت عاوز متزعلش
هيتظبط بعد فتره ممكن الالف وبعدين انا استعملت التكيف بعد 500 ك
سحب العربيه برده هيبقى مش مظبوط هيتظبط بعد الالف

هو اللى مش مظبوط معايا لحد دلوقتتى استهلاك البنزين
اللى تعبنى دلوقتى بس هو استهلاكها عالى فى البنزين
وقالو ان بعد ال5000 ك هيطظبط هنشوف
الخلاصه ريح نفسك واكشف عليها

**ramymoharram** · 15-08-2013 01:13 AM

والله يا جماعة انا شوفت كذا حد بيقول التكيف ضعيف مع اني شايف انه كويس....مش فاهم موضوع انه بيفصل كل شوية اللي بتتكلموا فيه ....انا كل اللي يهمني ان التكيف شغال كويس ومش محسسني بحر.....موضوع البنزين مرتبط جدا بمشيك بمعني ان العربية بتسحب بنزين جامد في الزحمة بس موفرة جدا لو طريقك طوالي....بعد معديت الخمسة اﻻف ابتديت اﻻحظ فعﻻ ان استعمال البنزين بيقل وبصراحة الموضوع ده مكيفني