مشاكل طرق اسكندرية-فين الرجالة؟

**ehabahmedie** · 14-08-2013 02:34 AM

السلام عليكم ورحمة الله وبركاته

الموضوع خاص بشباب اسكندرية: والحكاية هي مشكلة الحفر اللي على بعض الطرق.....شوية تفاصيل:

الطريق الدولي اللي اغلبنا بنستعمله للهروب من زحمة البحر وقت الصيف هنلاقي فيه أماكن كتير فيها حفر، والمشكلة ان الحفر دي بتبقى في وسط الطريق، وحتى لو انت حافظ مكانها ممكن تلاقي سواق نقل أو مشروع زنق عليك وتنزل بعربيتك في الحفر دي. والحفر دي أغلبها بسبب ان سواقين النقل بيولعوا كاوتش لما تحصل معاهم أي مشكلة والنتيجة انه بيحرق الإسفلت اللي تحته

المشكلة ان الحفر اللي باتكلم عنها كبيرة لدرجة ان كاوتش العربية ينزل فيها بالكامل ولو بسرعة عالية ممكن تكسر مقصات،وأنا عن نفسي مرة حصل الموضوع معايا وطلعت منه ب فردتين بدون هوا لأن العربية لما نزلت في الحفرة شفة الجنط الحديد شالت وزن العربية وقعدت ساعتين ع الطريق لحد زمايلي ماوصلو واستعدلوا الجنوط أي كلام مؤقتا لحد مانوصل، ويومها كان في عربية أفيو برضه واقفة قبلي وحصل معاه نفس الموضوع (فردتين ع الأرض مرة واحدة)، وكنت ناوي أنا وزمايلي نصلحها بس كان في تجديد في الحتة دي وصلحوها

واحد زميلي برضه كان رايح الورديان من ع الدولي وفي حفرة واخدة أغلب مدخل طريق الورديان من الدولي، كانت النتيجة ان العربية (لانسر بومة) جابت مقصات وكبالن ( سرعة لا تتعدة 80) وبالطبع فقد التحكم ودخل قي الرصيف وكان وراه نقل كملت على الشنطة
يعني حفرة ممكن تتصلح بمبلغ بسيط خلت واحد يدفع من جيبه حوالي 20 ألف عشان يرد عربيته

طيب والحل:
فكرتي ان كل مجموعة شباب اسكندرانية يشوفو ايه الحفر الخطرة اللي فعلا ممكن تؤذي العربيات ويجمعو مع بعض وشوية رمل واسمنت وزلط ممكن نحاول نرمم الحفر دي، والموضوع بصراحة ثوابه كبير، يعني تخيل نفسك لاقدر الله في وقت متأخر وحصللك الموضوع ده ولو معاك أسرتك هتبقى مشكلة تانية، يعني احنا بنحاول نمنع الأذى عن الناس بدل مانستنى المحليات والطرق لما ربنا يسهلهم ويشوفوا المشاكل دي

ولو حد عنده طرق تانية للحل ياريت يشارك بيها

أغلب الحفر اللي باتكلم عنها هتلاقوها في المناطق الآتية:
أول الدولي من طريق التعمير
الدولي من وصلة 45 لحد كارفور
طريق التعمير
قبل مدخل بنزينة موبيل - مرغم في واحدة كبيرة

**Elawany13** · 14-08-2013 04:40 PM

بحييك على ايجابيتك وتفكيرك لحل مشكلة بتواجهنا كلنا وبتضرنا كلنا
معتقدتش ان الحفر تترمم برمل وزلط واسمنت ...
الاسمنت مش هيستحمل حركة النقل التقيلة عليه والشمس والحر وهيتفكك بسرعة
متهيألى لازم تتعمل بزفت وأسفلت
مشوفتش حلقة خواطر 9 بتاعت الحفر

‫خواطر 9 - الحلقة 4 - حفر‬&lrm; - YouTube

**aldesha989** · 15-08-2013 08:41 AM

هو لو من باب اماطه الازى عن الطريق فأنا معاك ولكن المشكلة ان الحفر دى علشان تتصلح مش بمبالغ قليله وده كمان ان المصايب دى فى كل اسكندريه

دا فى حضرتك حفره عند مكتبة اسكندريه كل مره اعدى من فوقيها احمد ربنا الحفر دى لو اخدتها انتا بتلزق فى الصقف

بس حفر الدولى حضرتك بتتكلم عن مصيبه لان الطريق محتاج اعادة ترميم كاملة ودى ميزانية محافظه مش ميزانية شباب غلبان مش لاقى حتى يتجوز

**shaddadfalcon1** · 15-08-2013 08:56 AM

الدولي عشان تريح دماغك من عند ال 45 لحد اخره عند طريق الساحل متمشيش شمال نهائي عشان كل 10 متر في حفره ومش عارف ليه وخليك دايما في النص عشان احيانا اليمين برده فيه مشاكل

**ehabahmedie** · 16-08-2013 05:46 PM

السلام عليكم

أشكركم جميعا للمشاركة والإهتمام،

الي بيستعمل الطريق بيبقى حافظ الحفر وبيحاول يتجنبها لو الدنيا مقفلتش عليه ونزل في واحدة، بس المشكلة في الناس اللي مش عارفة الطريق سواءا لأنهم اسكندرانية بس مش بيمشوا كتير عليه أو لأنهم مصطافين وأول مرة يستعملوا الطريق ده

الفكرة الأساسية ان كل واحد ممكن يكلم شباب من اللي حواليه في المنطقة أصحاب العربيات وكل واحد يدفع مبلغ بسيط ونحاول نرمم الأكثر خطورة ثم الأقل خطورة

عارف ان الموضوع بيكلف، بس لو الشباب جمعوا نفسهم: التكاليف والمجهود هيقل

وبرضه لو فكرنا: تخيل نفسك مكان اللي عمل الحادثة وصرف حوالي 20 ألف عشان يعالجها، وبتاع النقل اللي خبطه كان بيقول ان كل شوية يلاقي حد واقع في الحفرة دي

الموضوع ثوابه كبير، ومش عايزين كسل ياشباب، وتبقى صدقة جارية نقابل بيها ربنا سبحانه وتعالى

**aldesha989** · 16-08-2013 06:02 PM

المشاركة الأصلية كتبت بواسطة ehabahmedie

السلام عليكم

أشكركم جميعا للمشاركة والإهتمام،

الي بيستعمل الطريق بيبقى حافظ الحفر وبيحاول يتجنبها لو الدنيا مقفلتش عليه ونزل في واحدة، بس المشكلة في الناس اللي مش عارفة الطريق سواءا لأنهم اسكندرانية بس مش بيمشوا كتير عليه أو لأنهم مصطافين وأول مرة يستعملوا الطريق ده

الفكرة الأساسية ان كل واحد ممكن يكلم شباب من اللي حواليه في المنطقة أصحاب العربيات وكل واحد يدفع مبلغ بسيط ونحاول نرمم الأكثر خطورة ثم الأقل خطورة

عارف ان الموضوع بيكلف، بس لو الشباب جمعوا نفسهم: التكاليف والمجهود هيقل

وبرضه لو فكرنا: تخيل نفسك مكان اللي عمل الحادثة وصرف حوالي 20 ألف عشان يعالجها، وبتاع النقل اللي خبطه كان بيقول ان كل شوية يلاقي حد واقع في الحفرة دي

الموضوع ثوابه كبير، ومش عايزين كسل ياشباب، وتبقى صدقة جارية نقابل بيها ربنا سبحانه وتعالى

الموضوع اللى بتتكلم عليه ده ما ينفعش موضوع على الانترنت
لازم تنزل الشارع وتجمع ناس

**ehabahmedie** · 16-08-2013 09:56 PM

المشاركة الأصلية كتبت بواسطة aldesha989

الموضوع اللى بتتكلم عليه ده ما ينفعش موضوع على الانترنت
لازم تنزل الشارع وتجمع ناس

طيب ياديشة مش هنعرف نجمع الناس كلهم

عشان كده بنقولو ان كل مجموعة تتفق ويشتغلوا ويبعتو وبكده الناس كلها تتشجع

صاحبي اللي عمل الحادثة كلم زمايلنا في الشغل وقالو انهم هيساعدوه في الحفرة اياها