الموضوع: أجمل معلومة لحل مشكلة غطاء بنزين البومة

المشاركة الأصلية كتبت بواسطة ehabahmedie

السلام عليكم جميعا

ازيكم ياشباب؟

الحكاية باختصار اني لما جبت اللانسر والحمد لله لقيت ان غطاء تانك البنزين مش بيفتح لما تشد اليد اللي جنب كرسي السائق، وبصراحة مشغلتش بالي بالموضوع، بس مرة كنت في التوكيل في اسكندرية وسألته عن السوستة قاللي انها موجودة و بـ 75 جنييييييييييييييييه، وانا كنت مصورها من عربية واحد صاحبي ولقيتها هايفة ومش مستاهلة المبلغ ده، وممكن أجيبها وتقع تاني، ودي فكرة عملها:




ولقيت عمال البنزينة عارفين ان أغلب العربيات بابها مبيفتحش فتلاقيه جاهز انه يدوس ع الباب بدل السوستة، وبصراحة مرة جبت منظف دورة البنزين وكنت هتجنن، تشد اليد وتسيبها تلاقي الباب مكانه تاني، وكان ممكن الواحد يعمل زي اسماعيل ياسين: تقف على رجل واحدة وتشد اليد بإيد وتمد رجلك التانية تخبط بيها الباب :c_laugh[1]:

طبعا هتلاقي الناس واقفة بتصورك وصورك تاني يوم ع الفيس مع تعليقات مصرية أصيلة وتبقى فضيحة بجلاجل

طبعا في حل تاني انك تستنى لما اي طفل معدي وبإبتسامة جميلة تطلب انه يساعدك (طبعا ده اللي انا عملته....احسن من موقف اسماعيل ياسين)

طب والحل؟؟؟ طبعا عارفين المصري لما بيشغل دماغه ايه اللي بيحصل........ ممكن يخرب الدنيا.....طيب تيجي ندور على حاجة ظريفة ورخيصة وتحل المشكلة
لقيتها






انزل شوية







شوية كمان


أيون (يعني yes بس بالإنجليزي) مشبك الورق.......بس أكبر مقاس



تروح زي أي طالب شاطر بيذاكر ف الكلية وتطلب مشبك الورق بس يكون أكبر مقاس يعني زي الصورة



طيب ليه المشبك ووجع الدماغ؟؟؟؟ عشان محتاجين حديد صلب سوست، يعني يستحمل الضغط ويرجع تاني لنفس الشكل قبل الضغط، و نشيل مقابض المشبك، ومن كل مشبك نقدر نطلع على الأقل 3 سوست بإننا نقص منه شرائط بالطول وده هنحتاج نروح عند حد عنده صاروخ أو سمكري عشان هتلاقي عنده مقص صاج يدوي (زي مقص القماش بس أقوى منه)



يقدر يقص بيه صلب المشبك بالشكل التالي، يعني يقص من كل ضلع شريط بعرض 1 سم تقريبا (الخط الأحمر في الصورة)




بعد كده نعمل ثقب في الشريط (بس الأول هتحتاج مسمار بصامولة لتثبيت السوستة، و شوف تخانة المسمار عشان تحدد قطر الثقب، أنا لقيت مسمار قطره 4 مم زي اللي في الصورة ولقيته مناسب للفتحة بداخل بوابة البنزين، ومكان الثقب هو عند علامة الخط على رسمة السوستة، يعني خلي بنطة الشنيور بعد 6 مللي تقريبا من حافة الشريط) وهيبقى كده



وبعدين نمسك زرادية ونتني الشريط حسب الشكل ده (وده رسمة كربون من سوستة أصلية في عربية صاحبي)



وهو ده شكل السوستة بعد ماعملتها



ولتفادي ان المسمار يسبب صدأ كان عندي كاوتش عجلة داخلي قصيت منه قطع وخرمتها بخرامة الورق عشان تعدي المسمار (هتلاقيهم في الصورة اللي فوق)واستعملت قطعتين واحدة تحت السوستة والتانية تحت الصامولة، يعني تحمي صاج العربية من الناحيتين، وهو ده الشكل النهائي






أنا تعمدت تفصيل الشرح عشان تكونوا معايا خطوة بخطوة، بس الموضوع سهل جدا والموضوع مش هياخد أكتر من نص ساعة لو معاك الشريحة مقصوصة، يعني تثقيب الشريحة والثني والتثبيت في نصف ساعة
تبقى التكلفة:
مشبك ب 2 جنيه تقريبا
مسمار ب ربع جنيه على الأكثر
ابتسامة وشكر مع أي حاجة للي هيقص الصاج لو مش معرفة
نص ساعة
دعوتين حلوين للي كتب الموضوع اللي هو أنا، وشوية شكر و اللي ربنا يقدره على حاجة يجيبها (تعاطفك لوحده مش كفاية..... اتبرع ولو ب bmw :oc_sun1[1]:


وشكرا لكم جميعا وأيضا للمهندس خالد اللي فكر معايا (وطبعا كان من نصيبه سوستة هدية عشان كان عنده نفس المشكلة) و الأستاذ محمد اللي غشيت من عنده رسمة السوستة وعم عمرو ومحمد اللي قص الصاج


الموضوع ده من تفكيري،وأرجو ذكر المصدر عند النقل للأمانة

وبصراحة أنا كتبته محاولة لرد الجميل للمنتدى اللي استفدت منه كتير

دعواتكم لي بالخير

عارف اكتر جملة لايقة على موضوعك دا غير تسلم ايدك طبعا وربنا يجازيك خير
نحن قادمون ايها اليابانيون
لو مخترع العربية شاف الموضوع دا هيتعقد يامعلم

لا شاى ايه بقىى خليها كابتشينو

واحد قهوة سكر زيادة يارجالة