الموضوع: اصعب اختيار في 2014 (( سكودا اكتافيا الجديدة )) او (( تويوتا كورولا الجديدة ))

بالنسبه للعربيتيت فانا شايف ان الحاجات اللي تتفوق فيها الكورولا هي الوسع انها اوسع من الاوكتافيا الجديده بالنسبه للركاب وثانيا سعر اعادة البيع واخر حاجه الفتيس الغريب ده علي حسب كلام الناس
غير كده الاوكتافيا تاكلها ده طبعا من خلال القعده جوا العربيتين وقيادة الكورولا الجديده و الفنتازيا مش الاوكتافيا الجديده
بس برضو في فرق سعر مش قليل

يا جماعة بلاش مقارنة بدون انك تجلس فى العربيتن ودة اللى انا عملتة اليوم فرق الخامات لصالح اﻻوكتافيا الكاسيت والصوت لصالح اﻻوكتافيا الكماليات لصالح الكوروﻻ الصاج لصالح الوكتافيا الفتيس لصالح الكوروﻻ قوة الموتور لصالح الاوكتافيا من اﻻخر العربيتن حلويين

نسيت اقول كمان ان عزل الصوت رهيب جدا فى اﻻوكتافيا علشان الشارع كان زحمة جداااا وعزل الكوروﻻ كويس بس فعلا اﻻوكتافيا مش ممكن فى عزل الصوت

المشاركة الأصلية كتبت بواسطة Ahmed TRAVCO

يعني مينفعش الكورولا تتقارن بالاوكتافيا وينفع تتقارن بالسيفيك والاسترا والفوكس؟؟؟؟
طيب على كده بقى السيفيك والاسترا والفوكس مينفعش يتقارنوا بالاوكتافيا....!!!
انا شايف ان اي واحدة منهم المفروض (تاكل) الكورولا على جميع المستويات... بس احنا هنا بنتكلم عن موديل كورولا لسة نازل جديد... نفس سعة الموتور... تجهيزات فوق الممتازة نظريا بالنسبة للكورولا... سعر بقى في رينج الاوكتافيا في بعض الفئات (اعلى فئة كورولا ب 209000 وفيها مثلا 9 ايرباج)...

فالقصة هنا اننا لازم نجرب الكورولا الاول خصوصا نظام الثبات vsc لان انا تحديدا كان سبب رفضي لشراء الكورولا موضوع الثبات ده ورحت على الشارك بدون تفكير كتير... فخلينا نشوف وبعدين نحكم خصوصا ان حتى ابعاد العربية ومساحاتها الداخلية بقت اكبر كمان...

مع العلم اني من الناس اللي مبحبش الكورولا خالص بس السنة دي منزلينها بتجهيزات بعتبرها طفرة بالنسبة لتويوتا في الفئة دي!!!

لما قلت ينفع تتقارن بالاسترا والسيفك والفوكس ده مش معناه انها تكسبهم بس هيبقى فيه مجال للكلام والاراء هتختلف بشكل كبير بينهم وأرجع وأقولك كلهم عربيات محترمه بس لو هنتكلم في حاجات زي توافر قطع الغيار وسعر اعاده البيع الكرولا محسوم ليها النقطه دي. لو اتكلمنا في الثبات الفوكس تتفوق وهكذا كل عربيه ممكن يكون ليها أفضليه في نقطه. انما كرولا قدام اوكتافيا؟ المقارنه محسومه وميعيبش الاوكتافيا فيها غير اعتماديه الفتيس وده أعتقد السبب الرئيسي ان التصويت متساوي في اللحظه دي بين العربيتين بس أكيد لو اوكتافيا مكانتش بفتيس dsg كان شكل التصويت هيختلف تماما ولاحظ اني في ردي الاول قلت في نهايته "بغض النظر عن اعتماديه الفتيس" اختياري هيكون اوكتافيا.

المشاركة الأصلية كتبت بواسطة معتز 603

انا شايف ان الكورولا احسن بكتير في كل حاجة

كل حاجه ازاي الله يخليك. موتور تربو 1400 سي سي اللي بيطلع 140 حصان قدام موتور الكرولا na 122 حصان وتقولي كل حاجه. طب فتيس ال dsg اللي بينقل أداء أي عربيه يركب عليها لدرجه أعلى يبقى زيه زي فتيس cvt مفيش فيه أي ميزه الا الاعتماديه؟

كرولا القديمه قدام فانتازيا الفانتازيا تكسب وعن تجربه سواقه للكرولا 2008 و 2010 في الكويت على طرق لو اتعملت في مصر بكارته 20 جنيه مش 5 الناس هتدفع عشان تمشي عليها وكانت الكرولا مراجيح في نزله الكباري على سرعه 160 مقابل ثبات أفضل بوضوح للفانتازيا وعلى طرق مصر كمان ده غير عزل الصوت اللي الفرق فيه واضح برضه.

تيجي للجديده في الاتنين هتلاقي اوكتافيا فيها موتور وفتيس عاملين مع بعض ثنائي ممتاز في الاداء مقابل أداء أضعف بكتير للكرولا. طب جرب حتى تفتح باب العربيتين وتقفله وشوف هتحس ان مين أحسن من غير ما تدخل ولا تسوق حتى.

مش فاهم الكرولا تتفوق "في كل حاجه" ازاي بس. لا وتتفوق بكتير كمان؟

طب نحط اوكتافيا A7 و فولفو S60 من ناحيه التسارع الفرق بتاع نص ثانيه بس الفولفو بتعمله بموتور 1600 تربو 180 حصان واوكتافيا بتعمله بموتور 1400 تربو 140 حصان لتفوق الفتيس dsg في الاداء ونقل حركه الموتور.

رأيي النهائي الاوكتافيا تتفوق بشكل كامل ماعدا اعتماديه الفتيس وفيه ناس غاويه العربيه واشترتها وهتشتريها بغض النظر عن الكلام الدائر عن الفتيس زي بالظبط اللي بيشترو الباسات والجيتا والجولف وممكن كمان نقول لو سعر أوكتافيا ينزل سيكه تبقى كده ظبطت تمام.

وأخيرا منكرش ان الكرولا اتنقلت نقله نوعيه بالموديل الجديد وبرضه أوكتافيا هيه كمان اتنقلت ودخلت فئه أعلى...