اقتباس المشاركة الأصلية كتبت بواسطة adelsalama مشاهدة المشاركة
والله انا فاهم كلام حضرتك كويس جدا وعارف الفرق المقصود فى نوع العفشه كويس قوى لكن يا جماعة انا مش بعيب على العربيه لكى اجد الهجوم الجامد داه انا حددت نقاط معينه فى ظروف قياده معينه بمعنى حالات السرعه العاليه والمناوره وليس المقصود من كلامى السرعه العاديه او القياده الهادئه واتحدى اى شخص يقدر انه يقارن بين ثبات 508 و لbmw فى المناوره والسرعه ارجو ان يتم فهم المقصود من كلامى والى يأكد كلامى كميه العربيات المعروضه للبيع استعمال عندنا فى الاسكندريه معظم الى ركب 508 كان راكب سوبيرب او a5 لان التوكيل والموزع عندنا واحد ( نور الدين ) وهما نفس الاشخاص الذين عرضوا سيارتهم البيجو للبيع تانى بعد حاله الندم التى اصابتنا بعد النزول من اسكودا وللعلم البيجو فى القاهره ناجحه جدا بسبب ظروف القياده والزحام التى لا تتشابه مع طرق الاسكندريه وبالاخص طريق الكورنيش ومنحنياته
هوا طبعاً الهجوم مش جاي من فراغ, ثبات الألماني مفهوش كلام ومحدش هيجادلك فيه,,
بس أنت مش جاي تقارنة بثبات عربية كوري عشان تقول الكلام دا اللي ممكن يقلق ناس كتير من العربية وأنت في الأساس مجرتش العربية غير 1000 كيلو متر فقط.!!!!!!

وطبعاً دا مش رقم يعتبر مقياس للتجربة, وسامحني بس أنا مش مقتنع أنك هتجيب بيجو 508 وتبيعها بعد 1000 كيلو,, بس دا رأيي الشخصي ومش بكذبك.!

فاللي أنا عايز أقوله أن عندك عربية زي ال 307 وهيا علي عفشة خلفية torsion beam
بتجيب 170 وبتبقي ثابتة زي الحجر علي الارض,, وممكن تجربها بنفسك مع حد أو هات حد بيركب ألماني طول عمرة وقوله قارن وهيقولك بنفسه أنو مش هيحس بفرق يذكر,,
ودا يرجع لأن تصميم ال torsion beam بتاع الأوربي غير الكوري, دي حاجة
والعربية كاوتشها عريض زي مخليها زي رجل البطة 205/55R16

نفس الكلام مع ال 406 وال 407 اللي عفشتهم الخلفية أفضل multi link زي ال 508 الجديدة, وزي ال BMW وال Mercedes
الناس بتجيب بيها 200 وكله بيقول إن ثبات العربية علي الأرض عالي, ومحدش محتاج يقول دا لأن العربية العادية بتجيب نفس السرعات وهيا ثابتة,, فأكيد المالتي لينك هيكون ثابت أكتر.

دلوقتي الناس اللي مالكة للبيجو 508 ومعروفة هنا في المنتدي, ومجربتهاش ل 1000 كم فقط زي ما حضرتك عملت, قالت ان العزل بس هوا اللي مش حلو أووي وأنك ممكن تسمع صوت هوا علي السرعات العالية فوق ال 150
بس محدش علق علي ثبات وأتزان العربية علي السرعات العالية, ولو كان في حاجة زي كانت قالت.

فعشان كدا أنا وباقي الناس اللي بتقول رأيها ومش بتهاجمك أن ال 1000 كيلو اللي حضرتك حكمت بيهم علي العربية مش مقياس,,
لأنك كدا بتتكلم زي اللي بيأجر عربية يوم أو أتنيم وينزل يقول دي وحشة ف كذا وكذا وكذا لمجرد أنو ركبها.!




وأخر حاجة اللي بتأكد لي أن كلامك مش منطقي, أنك مرة بتقول
انا مش بعيب على العربيه لكى اجد الهجوم الجامد داه انا حددت نقاط معينه فى ظروف قياده معينه بمعنى حالات السرعه العاليه والمناوره

وليس المقصود من كلامى السرعه العاديه او القياده الهادئه <<<
وبعدين تقول,,

وللعلم البيجو فى القاهره ناجحه جدا بسبب ظروف القياده والزحام التى لا تتشابه مع طرق الاسكندريه وبالاخص طريق الكورنيش ومنحنياته
هيا الناس بتمشي في أسكندرية علي سرعات عالية علي الكورنيش فوق ال 150 مثلاً عشان تقول وبالأخص كورنيش الأسكندرية ومنحنياته.!! هوا الكورنيش بقي طريق سريع.! أو أحنا مش بنسوق عليه مثلاً.!!
ولا بتمشي علي السرعات العادية والقيادة الهادئة <<< اللي أنت ذكرتها من شوية في الأقتباس اللي قبل كدا,, واللي هيا حاجة معليهاش أعتراض منك ناحية العربية.!!


مع العلم أني أغلب وقتي في أسكندرية ومش من القاهرة,, وبجري علي الكورنيش,, والناس في القاهرة بتجري في طرق برضة زي صلاح سالم, الدائري, والمقطم ودا كله منحنيات.

وواضح كدا أنو موضوعك تسويقي للأسكودا,, أوتسويئ لسمعة ال 508
ودا اللي أنا حسيته من أول ما قريته,,


فأحب أقولك ربنا يوفقك,, سواء كنت قاصد دا أو لأ.
لأن تاني ال 1000 كم اللي أنت سقتهم مش مقياس للحكم علي العربية,
وأنا لو مكانك هعتبرها فترة تليين وتأقلم علي العربية, قبل ما تحكم علي العربية بالكلام دا.

تحياتي لك,