الموضوع: تقييم سئ ل بيجو 301

و انا بركن العربية بتاعتي ( رينو أوبتيما 97 )
كان في بيجو 301 واقفه مكاني .. فا طلعت و ركنت ف مكان تاني
انا طبعا بعد اللي سمعته عن بيجو 301 قولت لازم انزل اتفرج عليها

أولا شكل العربية .. العربية مش عريضة بعكس السيراتو و الكرولا و الإلنترا .. ولو ان دا اكيد معمول حسابة ف الثبات بما ان العربية أوروبي
ثانيا : الخامات .. خامات الطابلوة جيده جدا و أيضا خامات الكراسي و فرش الأبواب
ثالثا : صوت الموتور .... مززززززززززززعج جدا و عالي أوي لدرجة أنه كان أعلي من صوت اللانوس موديل 2001 بتاعه جاري و اللي كان بيركن ف نفس الوقت
إضائة الفوانيس الأمامية ... سيئة للغاية و لونها أصفر أوووي كأن العربية البطارية بتاعتها ضعيفة
و كأن الفوانيس منقوعة ف مية و ملح ف الشمس بقالها شهرين ولا حاجة
ياريت اللي معاه العربية دي أو جربها يقولي رأيه فيها عشان انا مش عارف العربية دي مالها كدا معاكسه كل كلامكم عنها
العربية كانت سايقاها بنت .. مش عارف بقي هي هلكتها بالسرعة دي ولا أيه النظام

متابع

لأ هى فعلا زى ما حضرتك قلت
بس جودة التابلو و الخامات مش قد كدا بردو

المشاركة الأصلية كتبت بواسطة mohamed_rhem

واحد صعيدي بيقول "وكل الحلاوة حلو قوي يابوي"

الثاني بيسأله "انت دوقتها"

رد عليه "لاء بس واد عمي شاف اللي عيلحس الورقه"

يعني لا هو ولا ابن عمه اللي شاف ولا حتي اللي لحس الورقه داق طعم الحلاوة

طب ما بدل الأسلوب دا .. كنت تتكلم بطريقة احسن من كدا و تقولي انتا مجربتهاش ولا خلاص

المشاركة الأصلية كتبت بواسطة mohamed_rhem

باشمهندس سلامة

سبيك من جربتها او مجربتهاش

النقاط السلبية من وجهة نظرك

صوت الموتور اغلب العربيات الاقتصادية مش بيبقا فيها عازل للكبوت

وكمان لو الموتور بارد عدد لفات الموتور بيعلي لحد ما العربية تسخن احد 1.5 ثم يهبط الي 1.00

كمان حط في الاعتبار فترة التليين وكمان زيت موبيل بيعلي صوت الموتور

وكمان سير الكاتينة لو جنزير مش كاوتش بيخلي صوت الموتور عالي

بالاضافة الي نوع الصلب المستخدم في الموتور ونسبة الشوائب به

ومعلوم لجميع محترفي السيارات ان في عربيات بيبقي صوتها واطي علي السرعات البطيئة

وصوتها عالي ومزعج علي السرعات العالية

علي العكس بعض العربيات صوتها بيهدأ علي السرعات العالية

طبقا لتصميم الموتور واقصي عزم والتورك

ولو الموضوع بصوت الموتور كانت الفيراري والبوجاتي والبنتلي والميزاراتي وغيرهم عربيات تعبانة

ننقل للنقطة اللي بعدها

شكل الفوانيس ولونها

ده اسمها اضاءة صفراء (worm)هالوجين

وطبعا في فروق كتير بينها وبين الاضاءة العادية والزينون

نيجي بقا وبسرعة لموضوع العرض والثبات

الثبات ملوش دعوة بعرض العربية له علاقه بقاعدة العجلات ووصلات العفشة والمساعدين

كمان عرض العربية لا يعني انها واسعة فأحدي سياراتي سيريون تبدو صغيرة وهي من الداخل من

اوسع السيارات

الاوربيين ليهم مواصفات واختبارات امان

العربية مكانتش بارده .. دي كانت سخنه جدا .. و صوت المروحه فيها كان عالي اوي و مزعج و دا نسيت اقوله ف التقييم

البيجو ال 301 المفروض انها مش عربية اقتصادية .. دي سعرها 130 الف .. احنا مش بنتكلم ع ال206 او ال 206+ اللي هما ارخص عربيات ف البيجو و دول فعلا الإقتصاديين
انا معرفش نوع الكاتينه ف العربية دي ايه و اعتقد ان ناس كتير لسه متعرفش هي جنزير ولا كاوتش ولو ان الفرق مش هيبان و العربية زيرو
و نوع الصلب و الشوائب اللي فيه .. اكيد الصلب اللي فيها المفروض يكون كويس لأن دي عربية اوروبي
العربية دي صوتها كان عالي جدا و مزعج و كله تكتكه علي السلانسية و كان حتي اعلي من اللوجان و من عربيتي الأوبتيما و الفيراري و البوجاتي صوتهم ف السلانسيه بيبقي هادي و العربيات دي صوتها بيبقي عالي اوي عشان نظام الأكسوست اللي فيها اصلا بيعلي الصوت و ف الماركات دي صوت العربية بيبقي زي العلامه التجارية كدا لازم يبقي قوي و مميز لأنها سيارة رياضية بالدرجه الأولي
اما بالنسبة للفوانيس .. ف لما نور العربية انطفا الفوانيس نفسها هي اللي كانت صفرا شوية
كأنها فوانيس قديمة .. نفس اللي بيحصل لما تغسل فوانيس عربيتك كتير و تسيبهم ف الشمس
موضوع الثبات دا انا قولت انه اكيد متراعي ف تصميم العربية طبقا للمواصفات الاوربية
و مجبتش سيرة وسع او ضيق العربية

المشاركة الأصلية كتبت بواسطة mohammed dodda

.....قولت اللى انا عايز أقوله والله

والله كلك زوق و ربنا يكرمك يا سيدي