الموضوع: Civic 1992 SI مشكله فى التكيف و الموتور ارجو المساعده

السلام عليكم.
انا محمد ابو النجا من الاسكندريه و ديه اول مشاركه ليا رغم انضمامى من مده للمنتدى المحترم ده، بدايتاً كل الشكر للاعضاء اللى عملوا موضوعات كتير مثبته بخصوص الهوندا و جزاكم الله خير و خصوصاً المهندس سامح.
انا معايا Civic 1993 SI بس مكعبله شويه و محتاج مساعدتكم.
الموتور و الفتيس:
انا الموتور اللى عندى دلوقتى هو ZC نفس شكل 16a9 بس الجيربوكس الاوتوماتك بتاعه اتكسر و حاليا ماشى بجيربوكس 1500 cc و العربيه اخرها 150 كم/س و بتجعر، و الECU بتاعى هو نفسه القديم بتاع 16a9 كوده P29 و معمول فيه شغل لحامات و باظ قبل كده و صلحته بس دلوقتى ماشى و لمبه Check Engine مضبوطه من غير Errors، ذى ماانتم متخيلين اداء العربيه سىء جداً.

التكيف:
كنت ظبط التكيف من 3 سنين فى بورسعيد و اشتغل تلاجه بس بعديها باظ و روحت اصلحه لقيت بلى الفلتر (Dryer) اتفرط فى كل المواسير و اعدنا نسلك فيها حته حته و غسلنا الدايره و بعد الشحن، التكيف اداؤه وحش جداً، يدوب الهوا درجة حرارته اقل من الخارج بدرجه او اتنين و بعدين يبدا يدخل هواء نفس درجة الحراره الخارجيه بعد 5 دقائق من التشغيل، و لاحظت ان الماسوره اللى فى الكابوت اللى المفروض تكون ساقعه مش ساقعه خالص و لاكن دافئه و الماسوره اللى المفروض تكون سخنه بتكون ناااااار، و بعد 3 سنين نفس الحال و الغريب الفريون متسربش و اصيل :).

ايه رأيكم فى الفيلم ده :)

1- اغير الموتور و يبقى حليت مشكلة الجيربوكس و الكارته و جالى كمبرسيور مع الموتور الجديد. (ياريت تقولوا لى احسن موتور يتسقط ايه و بكام و منين).
ولا اشترى جيربوكس 1600 بتاع SI او 16z6 g لو قيست كبس الموتور و لقيته كويس و بالمره اغير الكارته بس معرفش تتجاب ايه.
2- ايه رأيكم فى مشكلة التكيف، تفتكروا سدد فى الدائره رغم اننا نضفناها و لا الكمبريسور مكن يكون باظ لما اشتغل و الدايره مسدوده.

معلش طولت عليكم بس سامحونى انا لسه مبتدء هوندا :)، و ياريت من الاعضاء الاسكندرانيه اللى يعرف صنايعى و تاجر قطع غيار هوندا كويس فى الاسكندريه يبعتلى بياناته.