المشاركة الأصلية كتبت بواسطة LeitoSR
هوا مفيش حاجة غلط في كلامك غير أنك قلت توكيل بيجو, واللي أنت روحته دا وبتحكي عليه مركز خدمة.
بمعني أنك في توكيل بيجو زي غمرة, أو أبو رواش, أو صلاح سالم, عندهم مش هيركب لك حاجة من حاجة قديمة في جديدة زي مانت وصفت, بأنه ياخد من الطرمبة القديمة ويركب في الجديدة والكلام دا.!
المهم اللي عملوة بتاع المركز دا غلط, لأن الريشة حساسة والمفروض ميتلعبش فيها, ولا تتشال من مكانها,,
وكان أولي أنو مادام دبسك في حق طرمبة بنزين جديدة, كان يشيل لك الماتور الجديد من الطرمبة الجديدة ويحطة في القديمة اللي كانت قرايتها مظبوطة.
لأن الريشة حساسة, وأي عوجة أو تنية فيها هتديك قراية مش مظبوطة.
وأنت عشان تبقي عارف بعد كدا, أن الطرمبة دي عبارة عن جسم بلاستيكي أو فبر, متعلق علي جنبها الريشة بتاعت قراية كمية البنزين في التانك, وجواها موتور كهربائي بيضخ البنزين لموتور العربية,
لما يحصل معاك مشكلة بعد كدا في طرمبة البنزين, الماتور الداخلي بيتغير لوحدة, وتمنه بيتراوح من 90 ل 120 ووممكن أزيد, بس كلهم واحد..
فمكنش فيه داعي أنهم يركبو لو لك طرمبة جديدة بتكلفتها الغير مبررة, بس هوا دا نظام التوكيل ومراكز الخدمة.
المهم بالنسبة لمشكلتك الحالية,
لازم قبل ما تركب الطرمبة تتأكد من إن حركة الريشة حرة, وبتلطع فوق لحد الأخر وبتنزل بسهولة,
وتتأكد إن السنون اللي بيبقي متثبت عليها الريشة بتبقي ملمسة وتشوف هل الريشة بتفضل لامساهم كلهم ولا لأ,
ومادام ما المشاكل دي حصلت بعد التغيير للطرمبة, وكمان أتكررت بعد ما ركبت الريشة القديمة, أنا شاكك أن يكون في حاجة دخلت أو وقعت جوا التانك, وبتحوش الريشة لما بتفول من أنها تترفع لفوق لحد الأخر.
وعايزين نتأكد برضه العربية بتاخد كام لتر بنزين من الأحتياطي يعني تخلي العربية تخلص كل البنزين اللي فيها او تبقي علي أقل حاجة في الأحتياطي في مرة, وتدخل تفولها تفويلة لحد الأخر علي السرعة البطيئة من مسدس البنزين في البنزينة عشان مشرقش وتطلع لك بنزين من فتحة التانك,
وتشوف هتاخد كام لتر بنزين معاك بالظبط.