اقتباس المشاركة الأصلية كتبت بواسطة Meggieboy مشاهدة المشاركة
احب أوضح ان الهدف الأساسى من المقارنة دى هو توضيح مميزات السيارتين للعايز يشترى و ليس لإثبات مين أحلى و مين أوحش
تتبع الشارك المدرسة الآسيوي للعربيات السيدان الكومباكت فى التصنيع و هى تتميز بالأتى
- موتور قوى و ناعم و جراى جداً و بيساعده خفه وزن صاج العربية
- تكييف خرافى فى التبريد
- اعتمادية بدرجة عالية جداً مقارنة بالأوروبى
- قلة و عدم الأهتمام بوسائل الأمان
٦ ايرباج مقابل ٢ فى الشارك
مفيش فوج خلفى
مخادع الرأس رباعية الضبط فى الفلوانس علشان الwhiplash
- دهان و سمك صاج أقل من الأوروبي ....أنا جربت اللانسر البومة و التيريوس و الألنترا و السيراتو .....جرب تقفل الباب بتعهم و تحس بتقله و جرب تقفل باب أى عربية أوروبى زى الميجان أو الأوكتافيا أو غيرهم و شوف الفرق الرهيب.....نفس الموضوع فى الشنطة. دوس بأيدك على الصاج لجوه و شوف رد الفعل....تبعا أى حكه فى صاج الإسيوى يتلاقى قشرت و كشفت صاج و جابت برومه بعكس الأوروبي و سماكة بطانة الدهان و نادرا لو تجد صاج الأوروبي كشف و جاب برومه ....ده غير أن جسم الأوروبي مجلفن و معالج ضد الصدأ لمدة ١٢ سنة

اتفق مع حضرتك فى موضوع تقشير الدريكسيون و عوامة البنزين ( انا مسمعتش عن مشكلة مساحات قبل كده بصراحة) بس هل دول حضرتك مشاكل ميكانيكية او كهربية؟ و ايه كان رد فعل توكيلها؟ تغيير فورى تحت الضمان و لو مش موجودة بيكلمك لما توصل علشان تركبها و طبعا الكلام ده أنتهى فى الشكل الجديد و عداد البنزين بقى ديجيتال و الطارة مختلفة
و ده بيوصلنا لنقطة هامة جداً و هى مدى جودة دايموند موتورز كتوكيل لان الfeedback الأخير عليه مكنش كويس.
بالنسبة لنتشة الفتيس ده موجود فى الرينو و البيجو و السيتروين و مش عيب و لكن طبعا إحساس مش لطيف مع وجود هذه النتشة.....و لكن فتيس الfacelift عبارة عن Xtronic cvt من نيسان و ملهوش تروس أساسا فمفيش أى أحساس بأى شىء و كأنك سايق عربية كهرباء و مجرب فى النيسان قشقاى و الجوك والكورولا الجديدة و بعض فئات اللانسر بدون أى مشاكل

برجع أأكد نقطة حضرتك مرة أخرى، اللى بيشترى عايز أيه من العربية؟ لو قيادة رياضية رشيقة و أعتمادية عالية يبقى أكيد يبعد عن الفلوانس و يفكر فى الشارك زى ما حضرتك تفضلت و نصحت أما لو عايز executive sedan و فخامة و عوامل أمان يبقى الفلوانس أختيار جيد فى هذه الفئة السعرية
طبعا بشكرك وبأكد اني مكنتش بحاول أثبت مين أوحش ومين أحسن... كل الحكاية اني حاولت أشرح ليه الشارك ممكن تكون أفضل (من وجهة نظري) وانقل التجربة دي لصاحب الموضوع واقوله انا اخترت الشارك علشان كذا وكذا...

أتمنى من كل قلبي حضرتك تبص بس على الشارك وتشوف تقل الأبواب بتاعتها وصوت قفلتهم هم والشنطة... صدقني حاجة مختلفة نهائيا عن البومة لو الناس دايما مصرة تربط بينهم كده... والله لي صديق معاه فانتازيا 2012 خليجي جابها بعد كورولا هايلاين 2011 وقالي بالحرف الواحد ا قفلة باب الشارك لا تقل عن احساس الالماني بالمرة وانها لا تقل عن الفانتازيا في اي شيء غير ان فرامل الأخيرة افضل شوية وعزلها احسن... انما هو شايف انها على الطريق لا تقل عن الالماني خالص...

النقطة اللي بعد كده ان مش صاج الاوروبي بس هو اللي مجلفن... لان الياباني برضه صاجه مجلفن ومجهز للظروف الجوية السيئة ودهانه محترم جدا جدا ومعمول أساسا للدول بتاعتنا اللي الحرارة فيها قاتلة... ده غير ان الشارك بتنزل مطابقة لواصفات دول مجلس التعاون... وحضرتك عارف ان في الكويت مثلا الحرارة بتعدي الـ50 عادي جدا... ولو دهان الياباني لا يعتمد عيه كده كنا شفنا الاوروبي مغرق الخليج... ناهيك طبعا عن التكييف الياباني... الاكصدامات فقط لا غير هي اللي دهانها فعلا اقل من الاوروبي وده في كل الياباني من الشارك للسيفيك للكورولا لكله...

الحاجة التانية ان صاج الشارك مش ضعيف... والعربية مدعمة بالكامل من تحت الصاج ده بهيكل الومنيوم صلب ولكن خفيف الوزن بيسموه في ميتسوبيشي Reinforced Impact Safety Evolution أو اختصارا RISE Body... ولو حضرتك قريت شوية عنه على الويكيبيديا هتعرف انه حاجة محترمة جدا جدا تضمن بشكل كبير حماية من وما بداخل السيارة في حالة التصادمات لا قدر الله...

وللعلم فقط... الشارك واخدة 5 نجوم في الـEURO NCAP والفلوانس واخدة 4 نجوم...

وفي النهاية أنا معروف اني بحب الفلوانس جدا ولو حضرتك بصيت على مشاركاتي المتعلقة بيها ختلاقيني دايما بشكر فيها... كل الحكاية اني حطيتها في الترتيب التاني بعد الشارك... وده طبعا من وجهة نظري اللي خلتني اشتري الشارك وما اشتريش الفلوانس في وقتها...

تحياتي!