استشارة في مشكلة مضايقاني جدا

**ham_855** · 06-09-2013 06:50 PM

انا عضة هنا معاكم لكن قررت اعمل اكونت تاني واقول فية المشكلة اللي مضايقاني جدا؟؟؟؟؟؟؟؟
واستفيد من خبراتكم ونصائحكم

انا شاب عمري 31.5 سنة خريج كلية الهندسة عملت بالخارج والان اعمل بمصر بشركة كبيرة ولدي شقة وسيارة ولدي كافة امكانيات الزواج
من اسرة والحمد لله محدش يقدر يقول لا علي اسرتي او عائلتي حاجة وحشة اهلي ناس محترمين .
دي مقدمة صغيرة انا بس عاوز اسال سؤال واحد؟

هوة فية اية؟؟؟؟؟؟؟؟؟؟

يعني سوري انا بتقدم بنات ناس من اكتر من 4 سنوات اه بيحصل رفض مني احيانا لكن في الاغلب الرفض بيكون منها..... لية
انا مش وسيم لكن شكلي كويس مش عضلات لكن مش تخين يعني ومش رفيع

انا شخص عادي مكنتش بكلم بنات وانا في الكلية وكنت مهتم بالدراسة
وعمري ما جريت ورا واحدة
بتعامل مع الناس كلها بذوق وادب
انا اعرف ربنا كويس عارف الحلال والحرام وعمر ما دخل جيبي قرش حرام وعمر ي ما سعيت اني اضحك علي بنت او العب بمشاعر حد

لكن مفيش ولا بنت بتعجب بيا يمكن علشان بقابل مهندسات زيي مثلا
فية بنات فضلوا انهم يقعدوا من غير جواز علي انهم يوافقوا عليا (من نفس سني علي فكرة) واتقدمت ليهم من 5 سنوات
انا والله في حالي تماما وشخص ملتزم لكن البنات عايزة الولد الروش الطحن.
انا بترفض علشان معرفش مطاعم شيك ومش بلبس لبس شبابي .علشان بحلق شعري قصير مش موضة يعني
انا بلبس لبس عادي يعني (كويس مقبول)
هية البنات عاوزة اية يعني واحدة تتعرف عليا وتشكر في اخلاقي وبعدين تقول عليا اني اصلا منفعش زوج ليها لانها شايفة انها احسن مني؟؟ طب واحسن لية بتكلميني اصلا؟؟؟؟
انا شخصيتي مش جذابة انا عارف لابعرف اتكلم ولا اتنيل بنيلة ولا بعرف اتكلم مع بنات اصلا انا بدخل البيت من بابة هل دي غلطة؟؟؟؟؟
اول مرة احس اني غلط واني كدة وحش
انا زمان كان بيتهيا ليا ان البنت بتدور علي االشخص المحترم اللي يراعي ربنا فيها واللي يكون قادر علي تحمل المسؤلية اللي يكون انسان يبيني نفسة ومسؤل عن نفسة اول مرة اعرف ان دة ملوش تمن وان كل دة كلام فارغ

هوة يعني علشان انا مش مقطع السمكة وديلها ابقي وحش وبنات عاديين واقل من العاديين يرفضوني
انا بقعد مع البنت من دول(لاول مرة) بحس انها بتحاول تقنع نفسها بيا وانها بتقول لنفسها اية الوقعة السودا دي همشي من هنا امتي)
مع اني والله محترم مش بتاع بنات ومش بعرف اتكلم اصلا مع حد في حالي تماما
انا والله مش بكدب لكن انا اتفقعت خلاص مش قادر عاوز اعرف هما بيعاملوني كدةلية لية كل واحدة فاكرة نفسها ليدي وان مستحقهاش

**midoabdeen** · 06-09-2013 06:59 PM

فى البدايه ربنا يرزقك ببنت الحلال اللى تفهمك
المشكله مش فيك المشكله فى المجتمه اللى احنا عايشين فيه
بس ممكن تكون حضرتك كنت بتختار غلط ياعنى البنات اللى بتبان قدام الناس انها مافيش بعد كده فرفوشه ودلوعه والجو دا احب اقولك انها ماتنفعش مع حضرتك وانا شخصيا احب النوعيه دى اوووووووووى فى التعامل بس انها تبقى مراتى ابدااااا
انما البنات اللى تلاقيها مدياك الوش الخشب انت او غيرك وبتتعامل بحساب اوووى مع الرجاله ومش بتهزر مع اى حد وواقعيه ولو عرفتها عن طريق الشغل دايما تبقى مهتمه بشغلها لا غير اعرف ان دى تنفع تبقى مراتك
ياعنى من الاخر دور على اسره متدينه وربت بنتها تربيه سويه مش دلع وخروجات واللذى منه

وبعدين هما البنات لاقين جواز اصلا دلوقتى

**أحمد كمال** · 06-09-2013 06:59 PM

احمد ربنا انهم بيرفضوك ...... لان العقليات دي ممكن جدا تخاف على نفسها من العنوسة و تقنع نفسها بيك عشان مادياتكو بس و تتجوزك و هي عاصرة على نفسها لمونة و بعد الجواز توريك النجوم في عز الضهر

بنات هايفة و ما بتعرفش قيمة عريس كده الا اما بتعدي التلاتين و يبتدي نوعية اللي بيتقدموا لها تحتلف شكلا و موضوعا

من الاخر انت الكسبان ........ كنت بازعل زيك زمان و اكتئب و اتضايق بعدين اكتشفت ان ده من رحمة ربنا بيا

و اللي مستكترة روحها عليك تقعد جنب امها لحد ما يجيلها توم كروز يتقدم لها ..........

**أحمد كمال** · 06-09-2013 07:01 PM

و لكم في فتكات عبرة يا أولي الالباب ........ خش اقرا و شوف تفكير البنات المصريات اما بييجي لها عريس و اقرا كمية القمامة الفكرية اللي موجودة ....

تلاقي واحدة متقدم لها واحد زيك و هي لسه بتحب واحد سرسجي فاشل عايش على فلوسها و تقعد تقول اصلي باحب التاني ........ بلا قرف يا راجل

**hugan** · 06-09-2013 07:03 PM

وليه ماراحش تفكيرك ان العيب مش منك
وان مفيش ولابنت من اللي اتقدمت ليها من بنات العائلات المحترمه المتربيه
معلش يعني وارد جدا ان تكون اتقدمت لبنات ولا مؤاخذه يعني
شمال
علي كلامك وبامكانياتك واخلاقك
مفيش بنت من عيله
ترفضك
هو في حد لاقي عريس محترم ومتعلم وابن ناس وميسر ماديا
في الايام الهباب اللي احنا عايشين فيها
ماتحاولش تتهز وتفقد ثقتك في نفسك

**dedi** · 06-09-2013 07:36 PM

لا تفقد الامل والايمان بان لكل شئ ووقت اعرف صديق تقدم الى 55 عروسة و لم يحصل نصيب بعد وبعدين بلاش النوعية دى موش هى التى تعيش و تعمر و تربى العيال وتتحمل على الحلوة و المرة
ممكن اعرف اية المقايس الحضرتك حاططها لاختيارك

**marsguy** · 06-09-2013 08:29 PM

السلام عليكم ورحمة الله وبركاته،،،

هل حضرتك طلبت المشوره من حد تعرفه شخصياً عن يا ترى إيه هو السبب الحقيقي اللي بيخلي البنات ترفضك؟

أصل المشكله إن ساعات رأي الواحد في نفسه بيكون مختلف تماماً عن راي الناس فيه.

يعني أنا مثلاً ممكن أكون شايف نفسي في حالي وهادي بس المجتمع شايفني مغرور ومتعالي على البشر.

أكيد لما تسال الناس هنا مش هايكون كفايه عشان هنا الناس بتحكم وفقاً للي حضرتك كاتبه بس, وعشان برضه الناس مش شايفاك.

نصيحه حاول تستشير حد خبره ويا ريت مايكونش صاحبك من زمان وبيحبك أوي عشان يبقى عنده قدره إنه يصدر حكم موضوعي عليك. ونصيحه كمان لو تعرف واحده تثق فيها حاول تستشيرها برضه.

شكراً