أسعار ومواصفات اللوجان في المغرب.

**itsonlyme** · 07-09-2008 03:22 AM

الآتي هو أسعار ومواصفات اللوجان في المغرب.

اللوجان في المغرب اسمها داتشيا. تباع بأربع اختيارات حسب الكماليات.

الإختيار الأول:
فاضية تماماً. فاضية بمعنى فاضية.
الكماليات: مفهاش تكييف بارد ولا باور ولا راديو بس فيها تكييف سخن!
السعر: ما يعادل 49,000 جنيه مصري

الإختيار الثاني:
الكماليات:
زجاج كهرباء للشبابيك الأمامية.
احتمال يكون فيها باور (مش متأكد).
راديو اختياري.
مافهاش تكييف بارد!
السعر: ما يعادل 53,000 جنيه مصري

الإختيار الثالث:
الكماليات:
ايرباج للسواق.
باور ستيرنج.
سنتر لوك و ريموت.
مصابيح ضباب.
مساند للمقاعد الخلفية.
راديو اختياري.
برضو مافهاش تكييف بارد!
السعر: ما يعادل 58,000 جنيه مصري

الإختيار الرابع:
الكماليات:
ايرباج للشخص اللي جنب السواق.
اطارات مقاس 15".
مؤشرات الكترونية ( لل RPM والوقود والحرارة).
مرايات كهرباء.
زجاج كهربائي للشبابيك الخلفية.
تكييف بارد و الحمد لله.
راديو سي دي
السعر: ما يعادل 66,000 جنيه مصري.

االمصدر: موقع داتشيا المغرب
http://www.dacia.ma/showroom/logan/equipment.html
http://www.dacia.ma/showroom/logan/price.html

المحرك في جميع الحالات السابقة هو 1400 سي سي.
طبعا الفل أوبشن كده ارخص 9,000 جنبه عن الروماني. بس 1400 سي سي فقط.

**dabdob86** · 07-09-2008 03:48 AM

اولا شكرا على الاسعار و على المجهود فى الترجمة
انا دخلت الموقع لقيته فرنساوى طلعت علطول

بس انا حاسس انا كده مافيش فرق جامد لان العربية ده 1400 و لا هما هايبعتولنا عربيات 1600
و لو بعتوا 1600 مش ممكن سعرها هيكون اعلى
وجهة نظر و احب اسمع ردودكم

**NaderNabil** · 07-09-2008 03:52 AM

أسعار ممتازة....بالمقارنة بحجم السيارة و ماركتها

و ياريت تنزل بجميع فئاتها هاتعمل أحلي شغل كتاكسي و ملاكي

و ال1400 زي الفل عشان البنزين

**Amr_Moh** · 07-09-2008 03:57 AM

المشاركة الأصلية كتبت بواسطة NaderNabil

أسعار ممتازة....بالمقارنة بحجم السيارة و ماركتها

و ياريت تنزل بجميع فئاتها هاتعمل أحلي شغل كتاكسي و ملاكي

و ال1400 زي الفل عشان البنزين

we kaman 3asha el eshtara el 1600cc miz3alsh 3ala far2 el se3r

**mokhtar** · 07-09-2008 04:25 AM

يا جماعه ايه حكايه التكييف البارد اللى مش موجودفيها الا فى اعلى فئه ده ازاى يعنى واساسى تكييف ساخن هى العربيه دى نازله للمغرب ولا لروسيا

..mokhtar..

**itsonlyme** · 07-09-2008 04:43 AM

المشاركة الأصلية كتبت بواسطة dabdob86

اولا شكرا على الاسعار و على المجهود فى الترجمة
انا دخلت الموقع لقيته فرنساوى

طلعت علطول

أنا برضو معرفشي فرنساوي. بس استخدمت خدمة الترجمة في Google

المشاركة الأصلية كتبت بواسطة NaderNabil

أسعار ممتازة....بالمقارنة بحجم السيارة و ماركتها

و ياريت تنزل بجميع فئاتها هاتعمل أحلي شغل كتاكسي و ملاكي

و ال1400 زي الفل عشان البنزين

الفئة الأولى والتانية سعرهم رائع كتاكسي. كمان العربية واسعة جدا من ورا وتنفع أوي كتاكسي.
هي فعلا ناجحة اوي كتاكسي في الهند.
بس كملاكي مافيش غير الفئة الرابعة هي المناسبة لأنها الوحيدة بتكييف. سعرها كويس بس مش زي محنا تخيلنا.

**dabdob86** · 07-09-2008 05:23 AM

المشاركة الأصلية كتبت بواسطة NaderNabil

أسعار ممتازة....بالمقارنة بحجم السيارة و ماركتها

و ياريت تنزل بجميع فئاتها هاتعمل أحلي شغل كتاكسي و ملاكي

و ال1400 زي الفل عشان البنزين

انا معاك انها كتاكسى هاتعمل احلى شغل بس الملاكى لازم هاتكون بتكيف و بكده هيكون سعرها قرب اوى من ال 1600 وهو ده قصدى يعنى كانت المفروض تبقى ارخص شوية علشان نبقى حسينا بالفرق

**dabdob86** · 07-09-2008 05:26 AM

انا كان لى سؤال هى الفئة الاخيرة فيها اتنين ايرباج؟
و على كدة هيكون فيها abs لان العربية الكاملة فى رومانيا فيها abs
فلو الفئة الرابعة فيها الكلام ده يبقى انا موافق على السعر
لان ال1600 اللى هنا فيها ايرباج واحدة و مافيهاش abs

**farahat** · 07-09-2008 12:34 PM

أيوة يا شباب ، بس انتو نسيتو تكاليف الشحن و ضريبة المبيعات زائد هامش ربح المستورد نفسه ؟؟ .. بكده تمنها هيكون مقارب جداً لتمن الروماني

**Ramy_Tantawi** · 07-09-2008 03:04 PM

مش عارف ليه بدأت أحس ان الصفقه دي هاتنزل علينا أغلى من الروماني !!!! لما نحسب تمن الفئه الرابعه على اساس انها الوحيده اللي فيها مكيف بارد وغالباً هاتكون نفس كماليات الكامله اللي موجوده في مصر دلوقتي وتكون وافقه تمنها 66.000 مصري ولسه واقفه هناك في المغرب.

نضيف زي ما استاذ فرحات قال الشحن لمصر + هامش ربح للوكيل + هامش ربح التجار والموزعين !!!!!

تخيلوا تيجي العربيه بعد كل ده بي 70.000 مثلاً و 1400 سي سي !!! مش فاهم اي حاجه والله العظيم .