الموضوع: صيانة بيجو 301

المشاركة الأصلية كتبت بواسطة Unendlich

1- قلت إنك بتاخد معاك الزيت من بره, و بعدين تقولي أنا ماشي مع التوكيل زي ما الكتاب بيقول, صح ؟
طب مش لما حضرتك تاخدلهم الزيت معاك يبقى اختيارك مش اختيارهم ؟

1-أيوة ماشي مع التوكيل في كل الشغل لأني بعمل كل أعمال الصيانة عندهم وحتي تغير الزيت ليومنا هذا عندهم حتي بعد إنتهاء الضمان ب3 سنين,
بس مش بخليهم يحطولي زيت موبيل زفت وان من اللي عندهم لأني لاحظت أدائة السئ علي العربية, ومكنوش بيطلعو لي الجركن عشان أعرف هما حطو لزوجة أيه,
فكان بالنسبة لي أفضل أني اجيب الزيت اللي مجربة قبل كدا وبثق فيه,,

وأكيد كان أختياري لزيت شيل علي حسب ماهو منصوح بيه في الكتالوج من ناحية اللزوجة,
بس كنت بغيرة في التوكيل, وأخليهم اللي يغيروة طبعاً وكل القطع من عندهم, ماعدا الزيت اللي كانو بيحطوة مكنتش باخدة.

المشاركة الأصلية كتبت بواسطة Unendlich

2- شل مشي معاك كويس عشان لزوجته مناسبة لعربيتك (5w-40)
و لو حطيت موبيل ال 0w-40 هتاخد منه أداء هو هو أو أفضل

2-الكتالوج عندي بيقول 5w40 لدرجة الحرارة من -30 تحت الصفر إلي 50 سيلزيوس,
وال 0w40 اللي أنت بتنصح بيه, مكتوب أنو درجة حرارة تشغيلة من -45 إلي 50 سيلزيوس برضه.!



وطبعاً أنت عارف إن w أختصار ل winter وإن دي أخف لزوجة اللي أنت مختارهالي ومخصصة للدول اللي فيها برد شديد, عشان الموتور يقدر يقوم و يدور من غير مشاكل,
وأكيد برضه عارف إن اللزوجة دي مش مناسبة لجو وظروف التشغيل في مصر.!!!
وهتتحرق وتبخر بسرعة أعلي من ال 5w-40 المناسب لظروف تشغيل مصر وخصوصاً إن الزيتين ليهم نفس درجة حرارة التشغيل القصوي,,

فأنا أيه اللي هيخلني أحط زيت مخصص لل winter ودرجة حرارة تشغيلة بتبدأ من -45 تحت الصفر,,
وأحنا في بلدنا مش بنوصل لل 0 أصلاً عشان أقول إن ال 0w40 الأخف واللي بيبدأ -45
هيبقي أحسن من 5w40 اللي بيبدأ من -30,, واللي بيشاركو بعض في نفس درجة حرارة التشغيل القصوي.!

المشاركة الأصلية كتبت بواسطة Unendlich

3- أستاذ كريم اللي حضرتك بتثق في رأيه بيرفض الزيوت المعبأة في مصر, يبقى مينفعش تحط شل, صح ؟
أستاذ كريم و اراءه علي راسي, بس هو بالتأكيد مش ال reference بتاعي في الزيوت

3-لا مش صح, كريم بيرفض الزيوت المعبأة في مصر, ودا رأيه,, وزي مانت قلت مش reference
وقال أن موبيل أزبل زيت ممكن تشوفه ودا رأيه الشخصي, ودا رأيي أيضاً ورأيي ناس كتير مجربة نوعين الزيت دول.
ومش معني كدا إني محطش زيوت معبأة في مصر لأني مش شايف أن زيت شيل وحش,,
وأنا بس متفق معاه أن زيت موبيل من أزبل الزيوت عندنا,, ودا اللي أكنت أقصده من المشاركة اللي أقتبستها,

المشاركة الأصلية كتبت بواسطة Unendlich

4- موضوع النسب اللي قلتها ده مش افترا
لو حضرتك حابب تتأكد انزل أي موبيل جمبيك أو اسأل أي حد تعرفه (أو متعرفوش) عن لزوجة الزيت اللي بيحطه في عربيته, و شوف نسبة كام هتعرف تجاوب و نسبة كام عارفة إيه ال recommended و إيه اللي بيتحط و رد علي
و شوف النسبة اللي بتروح تدور علي الزيت المناسب ليها عند Wolf و Valvoline و Castrol ... قصاد النسبة اللي بتروح الوكيل/البنزينة و تقوله حطلي يابني زيت ال 10 أو ال 5

4-أنا عارف إن فيه ناس كتير متعرفش الفرق ما بين الزيوت, ولا حتي الفرق ما بين التخليقي والمعندي, بس مش معني كدا تقول 99.9% مش بيفهمو من المصريين,
وإن خانك اللفظ فحصل خير,,

المشاركة الأصلية كتبت بواسطة Unendlich

5- حضرتك لما زعلت و بتقولي العربية سخنت عند 30 ألف
طب هل تعرف هم حطولك زيت إيه أصلا (بغرض حتي إنك تتفاداه في المستقبل) ؟
هل رحتلهم تسألهم عن سبب السخونية قالولك الزيت ؟
ولا جبت المعلومة منين ؟
أنا عارف إنك لو حطيت ال 5w-50 العربية هتعاني (عشان جربناه في ال 406 و نزلناه بعد 190 كم)
بس هو مسخنهاش, لكن كان في تأثير علي السحب (كنا حاطين قبله ال 0w-40 فكان الفرق ملحوظ بعنف)

أنا زي ما قلت فوق عمري ما حطيت 5w-50 ومش عارف أنت أفترضت دا منين وإزاي,
لأني زي ما قلت كل تغييري كان في التوكيل, ولو هما أغبياء لدرجة أنهم يحطهولي دا أنا مش هثق فيهم يغيرولي بيه تاني ويطلعو لي بجركن تاني مثلاً,

فكان أضمن لي أني بجيب زيتي معايا, وعارف أن لزوجته مناسبة لعربيتي, ولما الجركن هيطلع لي فاضي هتأكد أنهم حطوهولي فعلاً لأنهم مش عندهم شيل,
ولا هيحط زيت من عنده وميحاسبنيش عليه ويركن الزيت اللي أنا جايبه ليهم علي جنب مثلاً, فانا بوفر علي نفسي هري معاهم, وعشان أنا من أداء موبيل حسيت أنو زفت زي ناس كتير مجربة حتي ال 0w-40

وفي الأخر لو هما مش أغبياء ومحطوش ال 5w-50 وحطو لي ال 0w-40 أو ال 5w-40
أخر لزوجتين أو حتي الأولي كانو مسخنين الموتور,,,,
وكان بيسقف وصوته عالي, ولما غيرت لشيل كل حاجة أتظبطت والحرارة بقت معقولة,

ممكن تقولي بقي جربتو ال 5w-50 أزاي بما أنك بتفهم في اللزوجة كدا ؟؟!
وحطتيوه عن مين.؟! وهل جربت زيت شيل 0w-40 مع زيت موبيل 0w-40 عشان تشوف الفرق ما بينهم بنفسك وتحكم ما بين نوعين زيت بنفس اللزجة, بدل ما تفترض أن فيه زيت أحسن من زيت وإن الناس كلها 99.9% بتحط اللزوجة غلط!

المشاركة الأصلية كتبت بواسطة Unendlich

6- محدش قالك لازم توتال علي فكرة, هم partners مع بيجو مش أكتر

وأحنا قلنا نفس الكلام علي فكرة ومحدش قال لازم توتال,
اللي عايز يغير بزيت توتال زي ما مكتوب في الكتالوج يجيبه أهلاً وسهلاً,
اللي عايز يغير موبيل أو بشيل نفس اللزوجة أهلا وسهلاً برضة.

كلها شركات زيوت وبترول محترمة, والمهم في الموضوع اللزوجة تكون مظبوطة, والزيت يظبط في الأداء مع المحرك وميبخرش ولا يسخن الموتور ويعلي صوته, وإلا يبقي زيت سئ لو كلهم نفس اللزوجة, ودا الحال مع موبيل مصر واللي مخليه زيت سئ,, من وجهة نظري ووجة نظر كريم بما أنه مجرب كذا زيت ووجهة نظر ونظر ال99.9% اللي قالو أنو سئ, وأكيد فيهم ناس بتفهم في اللزوجة ومجربة زيوت تانية عشان تقول أنو زيت زفت.